நுவரெலியா மாவட்டம் அக்கரப்பத்தனை பொலிஸ் பிரிவுக்கு உட்பட்ட எல்பியன் தோட்ட ஆட்லோ பிரிவில் இன்று காலை ஏற்பட்ட தீவிபத்தொன்றில் 12 வீடுகளைக்கொண்ட லயன் குடியிருப்பொன்று எரிந்து சேதத்துக்கு உள்ளாகியுள்ளது. மின்சாரவொழுக்கினால் இந்தத்தீவிபத்து ஏற்பட்டிருக்கலாமென்று சந்தேகிக்கப்படுகின்றது. இந்த விபத்தினால் எவருக்கும் உயிராபத்தோ காயங்களோ ஏற்படவில்லை.எனினும் தொழிலாளர் குடும்பங்களின் உடைமைகளுக்குப்பலத்த சேதம் ஏற்பட்டுள்ளதாகத் தெரிவிக்கப்படுகின்றது. இந்தச்சம்பவத்தினால் பாதிக்கப்பட்ட 75 பேர் தற்போது தோட்டத்தின் தற்காலிக இடங்களில் தங்க வைக்கப்பட்டுள்ளனர். இந்தச்சம்பவத்தினால் பாதிக்கப்பட்டவர்களுக்கு உரிய நிவாரணங்களை வழங்குமாறு நுவரெலியா மாவட்ட செயலாளர் பி.ஜி.குமாரஸ்ரீ உரிய அதிகாரிகளுக்குப் பணிப்புரை வழங்கியுள்ளார். இந்தத் தீவிபத்துத்தொடர்பான விசாரணைகளில் அக்கரப்பத்தனைப்பொலிஸார் ஈடுபட்டு வருகின்றனர்.
