பொகவந்தலாவை – அட்டன் பயணிகள் போக்குவரத்துச் சீரில்லை : பயணிகள் புகார்

பொகவந்தலாவை – அட்டன் பிரதான பாதையில் போக்குவரத்தில் ஈடுபடுகின்ற பயணிகள் போக்குவரத்துச்சேவையில் ஈடுபடுவோர் பயணிகளின் உரிமைகளை மீறுவதாக குற்றம் சாட்டப்படுகின்றது. பொகவந்தலாவை – அட்டன் பிரதான பாதையில் தனியார் மற்றும் இ.போ.ச.பஸ்கள் பயணிகள் போக்குவரத்தில் ஈடுபடுகின்றன. பொதுவாக தனியார் பயணிகள் பஸ்கள் குறித்து நேரத்துக்குள் பயணிக்காத காரணத்தினால் தமது பொன்னான நேரம் மண்ணாகி விடுவதாக பயணிகள் புகார் தெரிவிக்கின்றனர். மேலும் முதியோர் ,அங்கவீனர்களுக்கான ஆசனபயன்பாடு உரிய வகையில் கிடைக்காத காரணத்தினால் முதியோரும் அங்கவீனர்களும் கால்கடுக்க நின்று கொண்டு பயணிக்க வேண்டிய நிலைமை ஏற்பட்டுள்ளதாக பொகவந்தலாவைப் பிரதேச பயணிகள் சுட்டிக்காட்டுகின்றார். மேலும் பயணக்கட்டணங்களை அறவிடுவதிலும் நடத்துநர்கள் ஏமாற்று வேலைகளில் ஈடுபடுவதாகவும் தெரிவிக்கப்படுகின்றது. பொகவந்தலாவையிலிருந்து அட்டனுக்கு 34 ரூபா பயணக்கட்டணமாகும் ஆனால் 35 ரூபாவை அறவிடப்படுவதாகவும் அத்துடன் 9 ருபா கட்டணத்திற்கு 10 ரூபாவும் 22 ரூபா கட்டணத்திற்கு 25 ரூபாவும் 32 ரூபா கட்டணத்திற்கு 35 ரூபாவும் அறவிடப்படுவதாகவும் உரிய சில்லறைக்காசு இல்லாவிட்டால் மீதிப்பணத்தினைப்பெற்றுக்கொள்வதிலும் ஏமாற்றப்படுவதாகவும் பயணிகள் புகார் தெரிவிக்கின்றனர். இந்த நிலையில் பொகவந்தலாவை – அட்டன் பிரதான பாதையில் தனியார் பயணிகள் போக்குவரத்துச் சேவையினரின் ஆதிக்கத்தைக் குறைக்கும் வகையில் இ.போ.ச.பஸ்சேவைகளை அட்டன் பஸ் டிப்போ மேற்கொள்ள வேண்டுமென பயணிகள் மேலும் கோரிக்கை விடுக்கின்றனர்.

பொகவந்தலாவை நகரின் உட்கட்டமைப்புக் குறைபாடுகள்

அம்பகமுவ பிரதேச சபைக்கு உட்பட்ட பொகவந்தலாவை நகரில் நீண்டகாலமாக உட்கட்டமைப்பு வசதிகள் பூர்த்தி செய்யப்படாத காரணத்தினால் இந்த நகரில் வாழுகின்ற மக்களும் இந்த நகருக்கு வந்து செல்லுகின்ற மக்களும் பல்வேறு அசௌகரியங்களுக்கு முகங்கொடுத்து வருகின்றனர். பொகவந்தலாவை நகர வர்த்தகர்களிடமிருந்து அம்பகமுவ பிரதேச சபையினால் பல்வேறு கட்டணங்கள் ,வரிகள் அறவிடப்படுவதாகவும் எனினும் இந்தப்பிரதேச சபையின் சேவை தமக்குத்திருப்பி கரமாக கிடைபப்தில்லையெனவும் வர்த்தகர்கள் சுட்டிக்காட்டுகின்றனர். குறிப்பாக பொகவந்தலாவை பிரதான நகரின் வடிகான் கட்டமைப்பு முழுமையாக சீரற்ற நிலையிலுள்ளதாகவும் மழைக்காலங்களில் வெள்ள நீர் நகரை ஆக்கரமித்து விடுவதாகவும் வர்த்தகர்கள் சுட்டிக்காட்டுகின்றனர். இவ்விடயம் குறித்து வீதி அபிவிருத்தி அதிகார சபையும் உரிய நடவடிக்கை எடுப்பதில்லையென சுட்டிக்காட்டப்படுகின்றது. மேலும் பொகவந்தலாவை நகரிலிருந்து மாவட்ட வைத்தியசாலைக்குச்செல்லுகின்ற வீதி ,பௌத்த விஹாரைக்குச்செல்லுகின்ற வீதி என்பன நீண்டகாலமாக செப்பனிடப்படாதுள்ளன. அத்துடன் பொகவந்தலாவை நகரில் பஸ்தரிப்பு நிலையமொன்றுமில்லை.பொலிஸ நிலையத்துக்கு முன்னால் பஸ்தரிப்பு நிலையமொன்று அமைக்கப்படவுள்ளதாக குறிப்பிட்டத்தொழிற்சங்கமொன்றின் அரசியல் பிரமுகர்களால் தேர்தல் காலங்களில் மாத்திரம் வாக்குறுதி வழங்கப்படுவதாகவும் தேர்தலுக்குப்பிறகு இந்த வாக்குறுதிகள் மீறப்படுவதாகவும் பொதுமக்கள் சுட்டிக்காட்டுகின்றனர்.