நாவலப்பிட்டியவில் தமிழக எழுத்தாளர் சந்திப்பு

நாவலப்பிட்டி தமிழ்ச்சங்கம் ஏற்பாடு செய்துள்ள தமிழ் எழுத்தாளர்களுக்கிடையிலான சந்திப்பு நிகழ்வொன்று நாளை மறுதினம் 19 ஆம் திகதி முற்பகல் 9.30 மணிக்கு நாவலப்பிட்டி தமிழ்க்கலாசார மண்டபத்தில் இடம் பெறவுள்ளது.

நாவலப்பிட்டி திமழ்ச்சங்கத்தின் இணைத்தலைவர் த.இராஜேந்திரன் தலைமையில் இடம் பெறவுள்ள இந்த நிகழ்வில் இந்தியாவிலிருந்து வருகைத்தந்துள்ள பிரபல நாவலாசிரியர் கு.சின்னப்பாரதியின் சிறப்புரை இடம் பெறவுள்ளது. அத்துடன் இந்த நிகழ்வில் தமிழக எழுத்தாளர்களான சி.கருப்பண்ணன் ,ளு.ரெங்கசாமி மற்றும் கலாபூஸணம் அந்தனிஜீவா ,கலாபூஸணம் குறிஞ்சி நாடன் ஆகியோரின் சிறப்புரைகளும் இடம் பெறவுள்ளன. மேலும் கடியன்லேன தமிழ் வித்தியாலய மாணவர்களின் கவியரங்கமும் இடம் பெறவுள்ளதாக நாவலப்பிட்டி தமிழ்ச்சங்கத்தின் செயலாளர் அ.லெட்சுமணன் தெரிவித்தார்.

தலவாக்கலை கொத்மலை ஓயா ஆற்றில் பெண்ணொருவரின் சடலம் மீட்பு

தலவாக்கலை கொத்மலை ஓயா ஆற்றில் பெயார்வெல் தோட்டத்துக்கு அருகிலிருந்து பெண்ணொருவரின் சடலத்தினை இன்று பிற்பகல் வேளையில் லிந்துலை பொலிஸார் மீட்டெடுத்துள்ளனர். இவ்வாறு சடலமான மீட்கப்பட்டவர் அக்கரப்பத்தனை ஆட்லோ தோட்டத்தைச்சேர்ந்த செபஸ்டியன் ஞானசுந்தரி ( வயது 55 ) என்ற பெண்ணாவார். இவரின் சடலம் லிந்துலை வைத்தியசாலையின் சவச்சாலையில் தற்போது வைக்கப்பட்டுள்ளதாக லிந்துலை பொலிஸார் தெரிவித்தனர். சடலமாக மீட்கப்பட்ட பெண் தனது உறவினர்களுடன் இன்று காலை அக்கரப்பத்தனையிலிருந்து தலவாக்கலைக்குச் செல்வதற்காக பஸ் ஒன்றில் வந்துகொண்டிருந்துள்ளார். லிந்துலை நகரில் பஸ் நிறுத்தப்படவே உறவினர்களுக்குத் தெரியாமல் பஸ்ஸை விட்டு அந்தப்பெண் இறங்கியுள்ளார்.மனநோயால் பாதிக்கப்பட்டவரென்று சந்தேகிக்கப்படுகின்ற இவர் லிந்துலை நகருக்கு அருகிலுள்ள கொத்மலை ஓயா ஆற்றோரத்துக்குச் சென்றிருந்த போது ஆற்றில் தவறி விழுந்திருக்கலாமென்று லிந்துலை பொலிஸார் சந்தேகம் வெளியிட்டுள்ளனர். இந்தச்சம்பவம் தொடர்பான விசாரணைகளில் லிந்துலை பொலிஸார் மேற்கொண்டு வருகின்றனர்.

நாவலப்பிட்டியவில் மலைப்பாம்பு குட்டி

நாவலப்பிட்டி பவ்வாகம கிராமத்தில் நேற்று 15 ஆம் திகதி மலைப்பாம்பு குட்டி ஒன்றினை பிடித்த கிராம வாசிகள் அதனை வனவிலாகா அதிகாரிகளிடம் ஒப்படைத்துள்ளனர்.நாவலப்பிட்டி இம்புல்பிட்டி தோட்டத்தை அண்டியப்பகுதிகளில் அண்மைக்காலமாக மலைப்பாம்புகள் மற்றும் இவற்றின் குட்டிகளைப்பிடித்து பிரதேச மக்கள் வன இலாகா அதிகாரிகளிடம் ஒப்படைத்து வருகின்றமைக்குறிப்பிடத்தக்கது.

நவநாதர் சித்தர் கோவில் திருவிழா

நாவலப்பிட்டி குயின்ஸ்பெரி ஸ்ரீ நவநாதேஸ்வரத்தில் ஸ்ரீ நவநாத சித்தரின் 109 ஆவது வனபோசன நிகழ்வு இன்று 15 ஆம் திகதி ஆரம்பமானது. இன்று 15 ஆம் திகதி காலை நவநாதர் சித்தரின் ஜீவ சமாதியில் விசேட பூஜை இடம் பெற்றது. அதன் பின்பு சித்தரின் திருவுருவப்படம் தேரில் வைக்கப்பட்டு தபோவனத்திற்கு கொண்டு செல்லப்பட்டது. இந்த நிகழ்வுகளில் பெருந்திரளானோர் பங்கு பற்றினர்.

அமரர் பெ.சந்திரசேகரனின் நினைவு தினம் அனுஸ்டிப்பு

மலையக மக்கள் முன்னணியின் முன்னாள் தலைவரும் முன்னாள் அமைச்சருமான அமரர் பெரியசாமி சந்திரசேகரனின் ஓராண்டு நினைவு தினத்தினை முன்னிட்டு மலையகத்தின் பலதோட்டங்களில் நினைவு தினக்கூட்டங்கள் இடம் பெற்றன.இதற்கேற்ப கொட்டகலை டிறேட்டன் தோட்டத்தில் இடம் பெற்ற நினைவாஞ்சலிக்கூட்டத்தில் நுவரெலியா பிரதேச சபை உறுப்பினர் மலர்வாசகம் ,மலையக மக்கள் முன்னணியின் முக்கியஸ்தர் விஸ்வநாதன் உட்பட மலையக மக்கள் முன்னணியின் ஆதரவாளர்கள் பலர் பங்குபற்றியிருப்பதைப்படங்களில் காணலாம்.

நுவரெலியாவில் தீ விபத்து : 23 குடும்பங்கள் பாதிப்பு

நுவரெலியா கந்தப்பளை பண்டாரநாயக்க மாவத்தை பகுதியில் அமைந்துள்ள லயன் வீடுகள் சிலவற்றில் நேற்று 31 ஆம் திகதி இரவு ஏற்பட்ட தீவிபத்து சம்பவமொன்றில் 22 வீடுகள் முற்றாக எரிந்து சேதத்துக்கு உள்ளாகியுள்ளன. இந்தத் தீ விபத்துச் சம்பவத்தில் உயிர் சேதங்கள் ஏற்படவில்லை எனவும் 23 குடும்பங்களைச் சேர்ந்த சுமார் 108 பேர் வரையில் இந்த சம்பவத்தால் தமது உடமைகளை இழந்து நிர்க்கதி நிலைக்கு உள்ளாகியுள்ளதாகவும் தெரியவருகின்றது. இந்தச்சம்பவம் தொடர்பான விசாரணைகளில் கந்தப்பளை பொலிஸார் ஈடுபட்டு வருகின்றனர்.இந்த நிலையில் தீவிபத்தினால் பாதிக்கப்பட்டு நிர்க்கதி நிலைக்கு உள்ளானோர்க்குத் தேவையான தங்குமிட வசதிகளை ஏற்படுத்திக் கொடுத்துள்ளதாக நுவரெலியா மாவட்ட செயலாளர் டி..பி.ஜி . குமாரசிறி அறிவித்துள்ளார்.சம்பவம் இடம் பெற்ற இடத்துக்குச்சென்ற மலையக மக்கள் முன்னணியின் அரசியற்பிரிவு தலைவரும் பாராளுமன்ற உறுப்பினருமான வி.இராதாகிருஸ்ணன் சேதவிபரங்களை ஆராய்ந்து அவைத்தொடர்பாக அனர்த்த முகாமைத்துவ அமைச்சரின் கவனத்திற்கு கொண்டு வந்துள்ளார். தீ விபத்து இடம் பெற்ற இடத்திற்கு நுவரெலியா மாவட்ட பாராளுமன்ற உறுப்பினர் பி.இராஜதுரை இன்று நேரிடையாக விஜயம் செய்து சேதவிபரங்கள் குறித்து தகவல்களைத்திரட்டிச் சென்றுள்ளார்.