விபத்தில் படுகாயமடைந்தவர் சிகிச்சைப்பலனின்றி உயிரிழந்தார்

நோர்வூட் - பொகவந்தலாவை பிரதான பாதையில்; சென் ஜோன் டிலரி பகுதியில் மார்ச்சு மாதம் 31 ஆம் திகதி இடம் பெற்ற வாகன விபத்தில் படுகாயமடைந்த நிலையில் கடந்த இரண்டு மாத காலமாக கண்டி வைத்தியசாலையில் சிகிச்சைப்பெற்று வந்தவர் சிகிச்சைப்பலனின்றி நேற்று நேற்று 5 ஆம் திகதி உயிரிழந்துள்ளார். கடந்த மார்ச்சு மாதம் 31 ஆம் திகதி கொழும்பிலிருந்து பொகவந்தலாவைக்குச் சீமெந்து கூரைத்தகடுகளை ஏற்றிச்சென்ற லொறி சென்ஜோன்டிலரி தோட்டத்துக்கு அருகிலுள்ள பாலத்தின் பாதுகாப்பு மதிலில் மோதுண்டு ஆற்றில் குடைசாய்ந்தது. இதன் போது சாரதி படுகாயங்களுடன் நாவலப்பிட்டி வைத்தியசாலையில் அனுமதிக்கப்பட்டு பின்னர் கண்டி வைத்தியசாலைக்கு மேலதிக சிகிச்சைக்காக அனுமதிக்கப்பட்டார். எனினும் சிகிச்சைப்பலனின்றி கடந்த இரண்டு மாதங்களுக்குப்பின்னர் தற்போது உயிரிழந்துள்ளார். இவ்வாறு உயிரிழந்தவர் வெஞ்சர் லோவ லோரன்ஸைச்சேர்ந்த அழகன் ஜெயராம் பன்னீர் ( வயது 32 ) என்பவராவார். விபத்து நடந்த இடத்தில் அமைந்துள்ள பாலம் 50 வருடங்களுக்கு மேல் பழமையானதாகும். இந்தப்பாலத்தினைச் செப்பனிடுவதற்கு வீதி அபிவிருத்தி அதிகாரசபை நடவடிக்கை எடுக்க வேண்டுமென பிரதேச மக்கள் கோரிக்கை விடுத்துள்ளனர்.