ஆஞ்சநேயரின் முகம் போன்ற தோற்றத்தில் வண்ணத்துப்பூச்சி

அட்டன் செனன் தோட்டத்தில் வித்தியாசமான முகத்தோற்றத்தில் வண்ணத்துப்பூச்சி ஒன்றை தோட்ட மக்கள் இனங்கண்டுள்ளனர். அட்டன் செனன் தோட்டத்தில் வசிக்கும் மருதமுத்து சுப்பையா வீட்டில் தற்போத அந்தப் பூச்சி உள்ளது.
சுப்பையாவின்  மனைவி கடந்த வெள்ளிக்கிழமைக் காலை வீட்டில் உடைகளை கழுவி உலர்த்துவதற்கு வெளியில் வந்த பொழுது கூரையில் வித்தியாசமான பூச்சியொன்று இருப்பதை அவதானித்து கணவரிடம் கூறியுள்ளார். இந்தப்பூச்சித் தொடர்பாக தோட்டத்தின் கோவில் குருக்களிடம் கேட்ட போது  அவர் ஆஞ்சநேயர் முகத்துடன் கூடிய வண்ணத்து பூச்சியொன்று கூறி வீட்டின் சுவாமி படங்களின் முன் வைக்குமாறு கூறியுள்ளார். இந்த வண்ணத்து பூச்சியின் தலைப்பகுதி  ஆஞ்சநேயரின் முகம் போன்று அமைந்துள்ளது.எனினும் இந்தப்பூச்சி  வீட்டை விட்டு செல்லாமல் அவ்விடத்திலேயே உள்ளதாக வீ;டார் தெரிவிக்கின்றனர். அதிகளவிலான மக்கள் வண்ணத்துப் பூச்சியைப் பார்வையிட வருவதாக அவர் தெரிவித்தார். மற்றவர்களுக்கு தெளிவாக காட்ட வண்ணத்து பூச்சை பூவுடன் அவர் கையில் எடுத்து வெளியில் கொண்டு வந்த பொழுதும் அது பறக்காமல் அவரின் கையிலேயே இருந்தது.

திகாம்பரம் எம்.பி தலைமையில் தலவாக்கலையில் கொங்ரீட் பாதைகள் திறந்து வைப்பு

தொழிலாளர் தேசிய சங்கத்தின் தலைவரும் நுவரெலியா மாவட்ட பாராளுமன்ற உறுப்பினருமான பி.திகாம்பரத்தின் வேண்டுகோளுக்கிணங்க பொருளாதார அபிவிருத்தி அமைச்சின் நிதியொதுக்கீட்டில் தலவாக்கலை ஹொலிரூட் , லோகி , தலவாக்கலை ஆகிய தோட்டங்களில் செப்பனிடப்பட்டுள்ள கொங்ரீட் பாதைகளைத் தொழிலாளர் தேசிய சங்கத்தின் தலைவரும் நுவரெலியா மாவட்ட பாராளுமன்ற உறுப்பினருமான பி.திகாம்பரம் இன்று திறந்து வைத்தார். இந்த நிகழ்வில் தொழிலாளர் தேசிய சங்கத்தின் தொழிலுறவு மற்றும் நிருவாகத்திற்கான சிரேஸ்ட ஆலோசகரும் மத்திய மாகாணசபை உறுப்பினருமான சிங்.பொன்னையா , தேசிய அமைப்பாளர் எஸ்.ஸ்ரீதரன் , நுவரெலியா பிரதேச சபை உறுப்பினர்களான வி.சிவானந்தன் , கல்யாணகுமார் , அப்துல் அஸீஸ் , யோகேஸ்வரி பிரதேச அமைப்பாளர்களான  ரவிச்சந்திரன் , தமிழ்ச்செல்வன் ,பொதுஜன தொடர்பு அதிகாரி ராமகிருஸ்ணன் உட்பட பலர் கலந்து கொண்டனர்.

சீரற்ற கால நிலையினால் சாமிமலை பிரதேச தோட்ட மக்களுக்குப் பெரும் பாதிப்பு

 நிலையினால் சாமிமலை பிரதேச தோட்ட மக்களுக்குப் பெரும் பாதிப்பு
மலையகத்தில் தற்போது ஏற்பட்டுள்ள சீரற்ற காலநிலையினால் மஸ்கெலியா சாமிமலை பிரதேசத்தைச்சேர்ந்த தோட்டமக்களின்  நூற்றுக்கணக்கானோர் இடம் பெயர்ந்து தற்காலிக இருப்பிடங்களில் தங்க வைக்கப்பட்டுள்ளனர்.
நேற்று 31 ஆம் திகதி பிற்பகல் வேளையில் வீசிய புயல்காற்றினால் தோட்டத்தொழிலாளர்களின் குடியிருப்புக்களின் கூரைத்தகரங்கள் காற்றினால் அள்ளுண்டு சென்றதைத் தொடர்ந்து குடியிருப்பாளர்கள் இடம் பெயர்ந்துள்ளனர். சாமிமலை ஸ்டொக்கம் தோட்டத்தில் பாதிக்கப்பட்ட 9 குடும்பங்களைச் சேர்ந்த 49 பேர் தோட்டத்திலுள்ள சனசமூக நிலையத்தில் தங்கவைக்கப்பட்டுள்ளனர். சாமிமலை கிங்காரோ தோட்டத்தில் பாதிக்கப்பட்ட 9 குடும்பங்களைச் சே;ரந்த 47 பேர் தோட்ட ஆலய மண்டபத்தில் தங்க வைக்கப்பட்டுள்ளனர். சாமிமலை பாகினி தோட்டத்தில் பாதிக்கப்பட்ட 7 குடும்பங்களைச் சேர்ந்த 35 பேர் தோட்ட நூலகத்தில் தங்கவைக்கப்பட்டுள்ளனர். சாமிமலை பெயார்லோன் தோட்டத்தில் பாதிக்கப்பட்ட 7 குடும்பங்களைச் சேர்ந்த 40 பேர் தோட்ட பாடசாலை கட்டிடத்தில் தங்கவைக்கப்பட்டுள்ளனர். மேலும் ஓமிடல் , சோளங்கந்தை , ஓல்டன் ஆகிய தோட்டங்களில் பாதிக்கப்பட்ட குடும்பத்தினர் உறவினர் வீடுகளில் தங்கவைக்கப்பட்டுள்ளனர். இவர்களுக்குத் தோட்ட நிருவாகங்கள் சமைத்த உணவுகளை வழங்குவதற்கு ஏற்பாடு செய்துள்ளன.
இந்த நிலையில் இவ்வாறு பாதிக்கப்பட்டவர்களை தொழிலாளர் தேசிய சங்கத்தின் தலைவரும் நுவரெலியா மாவசட்ட நாடாளுமன்ற உறுப்பினருமான பி.திகாம்பரத்தின் பணிப்புரைக்கேற்ப பாராளுமன்ற உறுப்பினரின் இணைப்புச்செயலாளர் எஸ்.ஸ்ரீதரன் நேரில் சென்று பார்வையிட்டதோடு பாதிக்கப்பட்டவர்கள் தொடர்பாக அம்பகமுவ பிரதேச செயலாளரின் கவனத்திற்குக் கொண்டு செல்வதற்கான நடவடிக்கைகளில் ஈடுபட்டுள்ளார்.

நோர்வூட் காசல்ரீ நீர்த்தேக்கத்தின் நீர் மட்டம் வெகுநாட்களுக்கு பிறகு உயர்வு

காசல்ரீ நீர்த்தேக்கப்பகுதிகளிலுள்ள நீரேந்துப்பகுதிகளில் பெய்த அடைமழையினால் இந்த நீர்த்தேக்கத்தின் நீர்மட்டம் வெகுவாக உயர்ந்து வருகின்றது.
பொகவந்தலாவை , நோர்வூட் , டிக்கோயா , சாஞ்சிமலை , வெஞ்சர் , ஒஸ்போன் போன்ற பகுதிகளில் பெய்த அடைமழையினால் இந்தப்பிரதேசத்திலுள்ள ஆறுகளில் வெள்ளப்பெருக்கேற்பட்டதால் காசல்ரீ நீர்த்தேக்கத்தின் நீர்மட்டம் சடுதியாக உயரத் தொடங்கியுள்ளது. கடந்து சிலவாரங்களுக்கு முன்பு இந்த நீர்த்தேக்கம் நீர் வற்றிய நிலையில் இருந்தமைக் குறிப்பிடத்தக்கது.

தோட்டத் தொழிலாளர்களுக்கு எதிர்காலத்தில் உற்பத்தித் திறன் அடிப்படையில் சம்பள உயர்வு : இதனால் தொழிலாளர்களுக்குப் பாதிப்பு

தோட்டத் தொழிலாளர்களின் சம்பள விடயத்தில் எதிர்காலத்தில் உற்பத்தித் திறனுக்கேற்ற சம்பள முறையொன்றினை முன்னெடுப்பதற்கு பெருந் தோட்டக்கம்பனிகள் தற்போதிருந்து முயற்சித்து வருவதால் இவ்விடயம் குறித்து தொழிற்சங்கங்கள் விழிப்புடன் செயற்பட வேண்டிய நிலைமை ஏற்பட்டுள்ளதாக தொழிலாளர் தேசிய சங்கத்தின் தேசிய அமைப்பாளர் எஸ்.ஸ்ரீதரன் தெரிவித்தார்.
தொழிலாளர் தேசிய சங்கத்தின் புசல்லாவை பணிமனையில் இன்று இடம் பெற்ற தலைவர்மார்களுக்கான கூட்டமொன்றில் கலந்து கொண்டு பேசிய போதே இவ்வாறு அவர் தெரிவித்தார். இந்தக் கூட்டத்தில் தொழிலாளர் தேசிய சங்கத்தின் மத்திய மாகாணசபை உறுப்பினர் சிங்.பொன்னையா ,பொதுச்செயலாளர் எஸ்.பிலிப் உட்பட பலர் கலந்து கொண்டனர்.
தோட்டத் தொழிலாளர்களின் உழைப்பினை உறிஞ்சும் வகையிலான சம்பளத்திட்டமொன்றோ தற்போது நடைமுறையிலுள்ளது. இதனால் தோட்டத் தொழிலாளர்கள் உழைப்புக்கேற்ற ஊதியத்தினைப் பெற்றுக்கொள்ள முடியாத நிலைமையில் வாழ்ந்து வருகின்றனர். இவ்வாறானதொரு நிலைமையில் பெருந்தோட்டக்கம்பனிகள் நட்டத்தில் இயங்குவதாக காரணம் காட்டி எதிர்வரும் கூட்டொப்பந்தக்காலத்தில் உற்பத்தித் திறனுக்கேற்ற சம்பளத்திட்டமொன்றினை தோட்டக்கம்பனிகள் முன்னெடுக்கவுள்ளதாக தெரிய வருகின்றது. இதனைத் தொழிலாளர்கள் சார்பாக செயற்படுகின்ற தொழிற்சங்கங்கள் எவ்விதத்திலும் அனுமதிக்கக் கூடாது. இவ்விடயம் குறித்து தோட்டத் தொழிலாளர்கள் விழிப்புடன் செயற்பட வேண்டுமென தொழிலாளர் தேசிய சங்கத்தின் தேசிய அமைப்பாளர் எஸ்.ஸ்ரீதரன் தெரிவித்தார்.

மலையகத்தில் கடும் மழை : நாவலப்பிட்டி நகரில் பெரு வெள்ளம்

மலையகப் பகுதிகளில் தொடர்ந்து அடைமழை பெய்து வருகின்ற படியால் ஓடைகளிலும் ஆறுகளிலும் வெள்ள நீர் பெருக்கெடுத்துச் செல்வதால் ஆற்றோரங்களில் வாழுகின்ற மக்கள் அவதானமாக செயற்பட வேண்டி நிலைமை ஏற்பட்டுள்ளது. இன்று 17 ஆம் திகதி  பிற்பகல் 4 மணிமுதல் 6 மணி வரை நாவலப்பிட்டி பிரதேசத்தில் பெய்த அடைமழையினால் பிரதேச மக்கள்; பலவேறு சிரமங்களுக்கு உள்ளாகினர். நாவலப்பிட்டி நகரில் கம்பளை வீதி வெள்ளக்காடாக காட்சியளித்தால் கம்பளை பகுதியிலிருந்து நாவலப்பிட்டி நகரூடாக அட்டன் மற்றும் தலவாக்கலை நோக்கிச் சென்ற வாகனங்களுக்கு இடையுறுகள் ஏற்பட்டன.சில மணிநேரம் தாமதித்து பயணிக்க வேண்டி நிலைமை ஏற்பட்டது. இந்த நிலையில் நாவலப்பிட்டி கம்பளை வீதியில் வெள்ள நீர் தேங்க நின்றதால் கடைகளுக்குள்ளும் வெள்ளநீர் புகுந்தமைக் குறிப்பிடத்தக்கது. நாவலப்பிட்டி நகரப்பகுதியில் அடைமழை பெய்கின்ற போது கம்பளை வீதியில் வெள்ளப் பெருக்கு ஏற்படுவது வழமையாகி விட்டமை மேலும் குறிப்பிடத்தக்கது.

தேசிய உள்ளூராட்சி வாரம் - கல்வி மற்றும் நூலகத்தினம்

தேசிய உள்ளூராட்சி வாரத்தினை முன்னிட்டு நாவலப்பிட்டி நகரசபையின் ஏற்பாட்டில் இன்று கல்வி மற்றும் நூலகத் தினம் தொடர்பான நிகழ்வுகள் இடம் பெற்றன. நாவலப்பிட்டி நகரசபைக்கு உட்பட்ட பாடசாலைகளின் மாணவர்கள் பங்கு பற்றிய விழிப்புணர்வு பேரணி நாவலப்பிட்டி நகரூடாக இடம் பெற்றது. நாவலப்பிட்டி நகரசபைத் தலைவர் நிசாந்த ரணசிங்ஹ தலைமையில் நகர சபை மண்டபத்தில் தொழினுட்பக் கல்வித் தொடர்பான செயலமர்வொன்று இடம் பெற்றது. மேலும்  கதிரேசன் இந்து மகளிர் கல்லூரியில் வாசிப்பின் முக்கியத்துவத்தினை வெளிப்படுத்தும் வகையில் நிகழொன்றும் இடம் பெற்றதாக நாவலப்பிட்டி நகரசபை உறுப்பினர் சுரேஸ்வரன் தெரிவித்தார்.

டிக்கோயாவில் பொலிஸாரால் ஒழுங்கு செய்யப்பட்ட நடமாடும் சேவை

அட்டன்  தலைமையக பொலிஸ் நிலையத்தினால் ஏற்பாடு செய்யப்பட்டிருந்த நடமாடும் சேவையொன்று இன்று ஞாயிற்றுக்கிழமை காலை முதல் டிக்கோயா மணிக்கவத்தை கலாசார மண்டபத்தில் நடைபெற்றது.
இந்த நடமாடும் சேவையில் பொலிஸ் முறைப்பாடுகளை ஏற்றுக்கொள்ளல், முறைப்பாட்டு பதிவுகளை பெற்றுக்கொடுத்தல், அடையாள அட்டைக்கான முறைப்பாடுகளை ஏற்றுக்கொள்ளல் மற்றும் பெற்றுக்கொடுத்தல், அடையாள அட்டைக்கான விண்ணப்பங்களை நிரப்புதல், திருமணப் பதிவுகளை மேற்கொள்ளல், பதிவுகளை பெற்றுக்கொள்ளல் பிறப்பு அத்தாட்சி பத்திரத்திற்கான பதிவுகளை மேற்கொள்ளல் போன்ற பல்வேறு சேவைகள் இங்கு பெற்றுக் கொடுக்கப்பட்டன.
இந்த பகுதியில் உள்ள பெருமளவிலான தோட்டப்புற மக்கள் இந்த நடமாடும் சேவையில் பங்குபற்றியிருந்தனர். தமது வேலையை விட்டு மிக நீண்ட தூரம் சென்று பெற்றுக்கொள்ள வேண்டிய சேவைகளை மக்கள் தமது ஊரிலையே பெற்றுக்கொள்ள கிடைத்தமையிட்டு மிக திருப்தியடைந்ததுடன் இதனை ஏற்பாடு செய்தவர்களுக்கு தமது நன்றியையும் தெரிவித்தனர்.

பொகவந்தலாவையில் சுவாமி விவேகானந்தரின் 150 ஆவது ஜனனத்தின நிகழ்வு

சுவாமி விவேகானந்தரின் 150 ஆவது ஜனனத்தினத்தினை முன்னிட்டு இன்று பொகவந்தலாவையில் விழிப்புணர்வு ஊர்வலமும் சிறப்பு சொற்பொழிவுகளும்
கலை நிகழ்ச்சிகளும் இடம் பெற்றன. இந்த நிகழ்வுகளில் பொகவந்தலாவைப் பிரதேசத்தின் பாடசாலை மாணவர்களும் வர்த்தகர்களும் ஏனையவர்களும் கலந்து கொண்டனர்.
விழிப்புணர்வு ஊர்வலம் பொகவந்தலாவை தர்மகீர்த்தி சிங்கள வித்தியாலயத்துக்கு அருகில் ஆரம்பமாகி  பொகவந்தலாவை நகரூடாக ஸ்ரீ தண்டாயுதபாணி தேவஸ்தனத்தினை வந்தடைந்தது. இதனைத் தொடர்ந்து ஸ்ரீ தண்டாயுதபாணி கதிரேசன் மண்டபத்தில் கலை நிகழ்ச்சிகள் இடம் பெற்றன.

ஹட்டனில் இன்று சர்வதேச முட்டைத்தினம் அனுஷ்டிப்பு

சர்வதேச  முட்டை தினம் இன்று 12 ஆம் திகதி  அட்டனில் கொண்டாடப்பட்டது. அட்டன் டிக்கோயா நகர சபை தலைவரும் கால்நடை வைத்தியஅதிகாரியுமான டாக்டர் .அ.நந்தகுமார் தலைமையில் அட்டன் சாரதா மண்டபத்தில் இஇடம் பெற்றது.

சீன ரயில் முதற்தடவையாக பதுளை பயணம்.

சீனாவிலிருந்து இலங்கைக்கு கொண்டுவரப்பட்ட புதிய ரயில்களில் ஒன்று நேற்று  கொழும்பிலிருந்து காலை பதுளை நோக்கி புறப்பட்டது.
இந்த ரயில் கொழும்பு மருதானை ரயில் நிலையத்திலிருந்து நேற்று காலை 7.30 மணியளவில் புறப்பட்டது. இப் பரீட்சார்த்த ரயில் பயணத்தில் போக்குவரத்து அமைச்சர் குமார வெல்கம இணைந்து கொண்டார்.
புதிய ரயில் அட்டன் ரயில் நிலையத்தை நேற்று பிற்பகல் 2.06 மணியளவில் வந்தடைந்தது .இதன்போது அட்டன் ரயில் நிலைய குறைபாடுகளையும் பயணிகள் எதிர் நோக்கும் பயண அசௌகரயங்கள் தொடர்பாகவும் அமைச்சர்  கேட்டறிந்து கொண்டார்.
மலையகப்பகுதிக்கு பதிய ரயில் சேவையில் ஈடுபடுத்துவது தொடர்பாக இரண்டு தடைவைகள் ஏற்கனவே பரீட்சித்துப் பார்த்த போதிலும் இம்முறையே பதுளை நோக்கி முதல் தடவையாக இந்தப் புதிய ரயில் சேவையில் ஈடுபட்டுள்ளமைக் குறிப்பிடத்தக்கது.

லிந்துலை உருளவள்ளித் தோட்டத் தொழிலாளர்கள் சம்பளம் பெற மறுப்பு

லிந்துலை உருளவள்ளித் தோட்டத் தொழிலாளர்கள் சம்பளம் பெற மறுப்பு
லிந்துலை உருளவள்ளி மேற்பிரிவு தோட்டத் தொழிலாளர்கள் தமது கடந்த மாதச் சம்பளத்தினைப் பெற்றுக்கொள்ள மறுப்புத் தெரிவித்துள்ளனர்.
இம் மாதம் 10 ஆம் திகதி வழங்கப்பட்ட கடந்த மாதத்துக்கரிய சம்பளத்தினையே உருளவள்ளித் தோட்டத்தைச் சேர்ந்த 265 தொழிலாளர்கள் பெற்றுக்கொள்வதற்கு மறுப்புத் தெரிவித்துள்ளனர்.
இந்தத் தோட்டத்தைச் சேர்ந்த தொழிலாளர்கள் கடந்த மாதம் 20 நாட்களுக்கு மேல் வேலை செய்துள்ள போதும் அரைநாள் சம்பளம் என்ற அடிப்படையில் தோட்ட நிருவாகம் சம்பளத்திட்டம் தயாரிக்கப்பட்டுச் சம்பளம் வழங்குவதற்கு முன் வந்துள்ளமையைத் தொடர்ந்தே தொழிலாளர்கள் தமது சம்பளத்தினைப் பெற்றுக்கொள்வதற்கு மறுப்புத் தெரிவித்துள்ளனர்.
இவ்விடயம் தொடர்பாக தோட்டத் தொழிலாளர்கள் தாம் அங்கத்துவம் வகிக்கின்ற தொழிற்சங்கங்களின் கவனத்திற்கு கொண்டு வந்துள்ளனர்.
 

கதிரேசன் இந்து மகளிர் கல்லூரியின் பெண் சாரணியர்களுக்குச் சின்னம் சூட்டும் நிகழ்வு

நாவலப்பிட்டி கதிசேரன் இந்து மகளிர் கல்லூரியின் பெண் சாரணியர்களுக்கான சின்னம் சூட்டும் நிகழ்வு இன்று 11 ஆம் திகதி கல்லூரியின் அதிபர் திருமதி எஸ். செல்வராஜ் தலைமையில் இடம் பெற்றது. இந்த நிகழ்வின் பிரதம அதிதியாக சாரணர் பயிற்சி ஆணையாளர் டப்ளியூ .பெரேரா கலந்து கொண்டு சாரணிய இயக்கம் தொடர்பான விளக்கங்களை வழங்கினார். இந்த நிகழ்வினை இந்தக்கல்லூரியின் சாரணர் பொறுப்பாசிரியை திருமதி ஹரிஸ்கலா ஏற்பாடு செய்திருந்தார்.

லிந்துலையில் சர்வதேச சிறுவர் மற்றும் முதியோர் தின விளையாட்டுப்போட்டிகள்

லிந்துல டிலிகூல்ற்றி பிரஜாசக்தி கணனி நிலையமும் சூரியன் அதிரடி சூரிய சொந்தங்களும் இணைந்து நடாத்திய சர்வதேச சிறுவர் மற்றும் முதியோர் தின நிகழ்வுகள்; நேற்று 7 ஆம் திகதி டிலிகூல்ற்றி தோட்ட கரப்பந்தாட்ட மைதானத்தில் டிலிகூல்ற்றி பிரஜாசக்தி இணைப்பாளர்கள் மலையரசன் , பவாஸ்கரன் மற்றும் அதிரடி சூரிய சொந்த நற்பணிமன்ற உறுப்பினர்கள் ராஜ்குமார் , விக்னேஸ்வரராஜா ,செல்வராஜ் சரத்,  பாபு , தனேஸ்வரன், மூர்த்தி, மாரிமுத்து, ராஜா ஆகியோரின் தலைமையின் கீழ்    பல்வேறு போட்டி நிகழ்ச்சிகளுடன் நடாத்தப்பட்டன.

இந்நிகழ்விற்கு பிரதம அதிதியாக லிந்துலை பொலிஸ் நிலைய பொறுப்பதிகாரி செல்வகுமார் கலந்து சிறப்பித்ததோடு டிலிகூல்ற்றி தோட்ட உதவி முகாமையாளர் அகலவத்த டிலிகூல்ற்றி தமிழ் வித்தியாலய அதிபர் சிவஞானசுந்தரம் பிரஜாசக்தி செயற்றி;ட்ட உதவி இணைப்பாளர் சரவணன் டிலிகூல்ற்றி தோட்ட வெளிக்கள உத்தியோகஸ்தர்கள் , சுகாதார உத்தியோகஸ்தர், முன்பள்ளி ஆசிரியர்கள்  தோட்ட தலைவர்மார்கள் பொதுமக்கள் முதியோர்கள் சிறுவர்களஉட்பட பலர் கலந்து கொண்டனர்.

பாக்ரோ தோட்டத்தில் தீ விபத்தில் பாதிக்கப்பட்டவர்களுக்கு உதவி வழங்கல் நிகழ்வு

சாமிமலை பாக்ரோ தோட்டத்தில் அண்மையில் ஏற்பட்ட தீ விபத்தினால் பாதிக்கப்பட்டவர்களுக்குத் தொழிலாளர் தேசிய சங்கத்தின் தலைவரும் நுவரெலியா மாவட்ட நாடாளுமன்ற உறுப்பினருமான பி.திகாம்பரத்தின் ஏற்பாட்டில் பெற்றுக்கொடுக்கப்பட்ட கூரைத்தகடுகளை வழங்கி வைக்கும் நிகழ்வில் தொழிலாளர் தேசிய சங்கத்தின் தொழிலுறவு மற்றும் நிருவாகத்திற்கான சிரேஸ்ட ஆலோசகரும் மத்திய மாகாணசபை உறுப்பினருமான சிங்.பொன்னையா , தொழிலாளர் தேசிய சங்கத்தின் தேசிய அமைப்பாளரும் பாராளுமன்ற உறுப்பினர் பி.திகாம்பர்தின் இணைப்புச் செயலாளருமான சோ.ஸ்ரீதரன்  அம்பகமுவ பிரதேச சபை உறுப்பினர் கே.சுரேஸ்குமார் ஆகியோர் உரையாற்றுவதையும் நிகழ்வில் கலந்து கொண்ட முக்கியஸ்தர்களும் தோட்ட மக்களையும் இங்கு காணலாம்.

நாவலப்பிட்டி கதிரேசன் மத்திய கல்லூரியின் பரிசளிப்பு விழா

நாவலப்பிட்டி கதிரேசன் மத்திய கல்லூரியின் பழைய மாணவர் சங்கம் மற்றும் பாடசாலை மேம்பாட்டுக்குழுவினால் ஏற்பாடு செய்யப்பட்ட வருடாந்த பரிசளிப்பு விழா இந்தக்கல்லுரிரியின் பிரதான மண்டபத்தில் இன்று 6 ஆம் திகதி சனிக்கிழமை இடம் பெற்றது. இந்த விழாவில் பிரதம அதிதியாக கல்வியமைச்சின் பெருந்தோட்டப்பகுதி பணிப்பாளர் திருமதி மகேஸ்வரி சபாரஞ்சன் கலந்து கொண்டார். அத்துடன் மாணவர்களின் கலை நிகழ்ச்சிகள் இடம் பெற்றதோடு மாணவர்களுக்குப் பரிசில்களும் வழங்கப்பட்டன.

நாவலப்பிட்டியவில் முதியோர் தின விழா

சர்வதேச முதியோர் தினத்தினை முன்னிட்டு நாவலப்பிட்டி பிரதேச ஒன்றிணைந்த  முதியோர் ஒன்றியத்தின் ஏற்பாட்டில் முதியோர் தின விழா நாவலப்பிட்டி நகரசபை மண்டபத்தில் இடம் பெற்றது.
விளையாட்டுத்துறை அமைச்சர் மஹிந்தானந்த அலுத்கமகே பிரதம அதிதியாக கலந்து கொண்ட இந்த விழாவில் முதியோர்கள் பங்கு பற்றிய பல்வேறு நிகழ்ச்சிகள் இடம் பெற்றன. இதன் போது முதியோர்கள் பாராட்டப்பட்டனர்.

ஹங்குரன்கெத்த பிரதேசத்தில் அபிவிருத்தித்திட்டங்கள் : தொழிலாளர் தேசிய சங்கம் நடவடிக்கை

தொழிலாளர் தேசிய சங்கத்தின் தலைவரும் நுவரெலியா மாவட்ட பாராளுமன்ற உறுப்பினருமான பி.திகாம்பரத்தின் வேண்டுகோளுக்கிணங்க  பொருளாதார அபிவிருத்தி அமைச்சின் விசேட நிதியொதுக்கீட்டில் ஹங்குரன்கெத்த பிரதேச செயலகத்துக்கு உட்பட்ட தோட்டப்பகுதிகளில் 10 இலட்சம் ரூபா நிதியொதுக்கீட்டில் சிறு அபிவிருத்தித்திட்டங்கள் முன்னெடுக்கப்பட்டு வருவதாக தொழிலாளர் தேசிய சங்கத்தின் தேசிய அமைப்பாளர் எஸ்.ஸ்ரீதரன் தெரிவித்தார்.
இதற்கேற்ப ஹோப் தோட்டக் கீழ்ப்பிரிவில் ஒற்றையடிப்பாதை அபிவிருத்திச் செய்வதற்கு இரண்டு இலட்சம் ரூபாவும் ஹோப்தோட்ட மேற்பிரிவு ஒற்றையடிப்பதையைச் செப்பனிடுவதற்கு இரண்டு இலட்சம் ரூபாவும் முல்ஓயா கீழ்ப்பிரிவு தோட்டத்தில் ஒற்றையடிப்பதை ஒன்றைச் செப்பனிடுவதற்கு இரண்டு இலட்சம் ரூபாவும் ரட்லண்ட் தோட்டப்பாதை செப்பனிடலுக்கு இரண்டு இலட்சம் ரூபாவும் ஹேவாஹெட்ட ஹோப் தோட்ட பாதை புனரமைப்புக்கு இரண்டு இலட்சம் ரூபாவும் நிதியொதுக்கீடு செய்யப்பட்டுள்ளமைக்குறிப்பிடத்தக்கது.

சாமிமலை தீ விபத்தில் பாதிக்கபட்டவர்களுக்கு திகாம்பரம் எம்.பி உதவி

 நாடாளுமன்ற பிரதிநிதித்துவத்தின் ஊடாக மக்களுக்கு ஆற்ற வேண்டிய சேவைகளை முனைப்புடன் மேற்கொண்டு வருவதாக தொழிலாளர் தேசிய சங்கத்தின் தலைவரும் நுவரெலியா மாவட்ட நாடாளுமன்ற உறுப்பினருமான பிதிகாம்பரம் தெரிவித்தார்.
சாமிமலை மாநெலி மாகொல தோட்டத்தில் தீ விபத்தினால் பாதிக்கப்பட்ட குடும்பங்களுக்கு அனர்த்த முகாமைத்துவ அமைச்சின் ஊடாக பெறப்பட்ட கூரைத்தகடுகளை வழங்கி வைக்கும் நிகழ்வில் கலந்து கொண்டு பேசிய போதே இவ்வாறு அவர் தெரிவித்தார்.
தோட்டத் தொழிலாளர்களினதும் ஏனைய மக்களினதும் தேவைகளையும் குறைபாடுகளையும் அறிந்து தனது நாடாளுமன்ற பதவியின் ஊடாக அந்த மக்களுக்குத் தொடர்ந்து சேவையாற்றி வருகின்றேன். இவ்வாறு மக்களுக்குச் சேவையாற்றுகின்ற போது எமது சமூகத்தினைச் சேர்ந்த சிலர் காழ்ப்புணர்வு கொண்டு தடையாக செயற்படுவது கவலைக்குரிய விடயமாகும். எனினும்  எனக்கு இருக்கின்ற மக்கள் செல்வாக்கு மூலமாக அந்தத் தடைகளையும் தகர்த்து தன்னால் சேவை செய்ய முடிகின்றது.
இதனடிப்படையில் மலையகத்தில் தீ விபத்தினால் பாதிக்கப்பட்டுள்ள தோட்ட மக்களுக்கு உதவிகளைப் பெற்றுக்கொடுப்பதற்கு உறுதுணை புரிகின்ற ஜனாதிபதி அவர்களுக்கும் இடர் முகாமைத்துவ அமைச்சர் மஹிந்த அமரவீரவுக்கும் மலையகத்தமிழ் மக்கள் சார்பாக எனது நன்றியைத் தெரிவித்துக் கொள்கின்றேன் என்று தொழிலாளர் தேசிய சங்கத்தின் தலைவரும் நுவரெலியா மாவட்ட நாடாளுமன்ற உறுப்பினருமான பிதிகாம்பரம் மேலும் தெரிவித்தார்.