கலபொட தோட்டத்தொழிலாளர்கள் ஆர்ப்பாட்டம்

நாவலப்பிட்டி கலபொட தோட்டத் தேயிலைத் தொழிற்சாலையின் உபகரணங்கள் மற்றும் இரும்புப் பொருட்களைத் தோட்டத்தொழிலாளர்களுக்கு அறிவிக்காமல் தோட்ட நிருவாகம் பலவந்தமாக அப்புறப்படுத்தி வருகின்றமைக்கு எதிரப்புத் தெரிவித்து இந்தத் தோட்டத்தைச்சேர்ந்த தொழிலாளர்களும் எனையவர்களும் இன்று 4 ஆம் திகதி கலபொட தேயிலைத் தொழிற்சாலைக்கு முன்னால் ஆர்ப்பாட்டமொன்றில் ஈடுபட்டனர்.
ஜனவசம நிருவாகத்துக்கு உட்பட்ட நாவலப்பிட்டி கலபொட தோட்டத்தின் தேயிலைத் தொழிற்சாலை நீண்ட காலமாக கைவிடப்பட்ட நிலையிலுள்ளது.அத்துடன் இந்தத் தோட்டத்தில் தொழில் புரிகின்ற 200 தொழிலாளர்களுக்கு வாரத்தில் மூன்று நாட்கள் மாத்திரமே வேலை வழங்கப்படுகின்றது.
இந்த நிலையில் கைவிடப்பட்ட இந்தத் தோட்டத்தின் தேயிலைத் தொழிற்சாலையின் ஒரு தொகுதி உபகரணங்களைத் தோட்ட நிருவாகம் தோட்டத்தொழிலாளர்களுக்கு அறிவிக்காமல் நேற்று 3 ஆம் திகதி லொறி ஒன்றின் மூலம் மிகவும் ரகசியமாக அப்புறப்படுத்தியுள்ளது. இதனைக் கேள்வியுற்ற தோட்ட மக்கள் உடனடியாக தோட்ட தேயிலைத் தொழிற்சாலைக்கு வருகைத் தந்து தேயிலைத் தொழிற்சாலையின் உபகரணங்களை அப்புறப்படுத்துவதற்காக வருகைத் தந்தவர்களின் கார் ஒன்றினை தடுத்து வைத்துள்ளனர். இந்தச்சம்பவம் தொடர்பாக கலபொட தோட்டத்தொழிலாளர்கள் தொழிற்சங்கங்களுக்கும் நாவலப்பிட்டி பொலிஸாருக்கும் அறிவித்துள்ளனர்.

அடிப்படைச்சம்பளத்திற்கான வேலையின் அளவு குறித்த பிரச்சினையால் தோட்டத்தொழிலாளர்கள் பாதிப்பு

கடந்த வருடம் மேற்கொள்ளப்பட்ட தோட்டத்தொழிலாளர்களின் சம்பளம் விடயம் தொடர்பாக மேற்கொள்ளப்பட்ட கூட்டொப்பந்தத்தில் தோட்டத்தொழிலாளர்களின் அடிப்படைச்சம்பளத்திற்கான வேலை அளவு குறித்து தீர்க்கமாக குறிப்பிடப்படாத காரணத்தினால் தற்போது தோட்டப்பகுதிகளில் தோட்டத்தொழிலாளர்களின் உழைப்பு சுரண்டப்படக்கூடிய நிலைமை ஏற்பட்டுள்ளது. தோட்டத்தொழிலாளர்களின் சம்பள விடயம் தொடர்பிலான கூட்டொப்பந்தம் மீளாய்வு செய்யப்பட்டு புதிய கூட்டொப்பந்தம் கடந்த வருடம் ஜீன் மாதம் 6 ஆம் திகதி கைச்சாத்திடப்பட்டமையும் இந்தக்கூட்டொப்பந்தம் 2013 ஆம் ஆண்டு மார்ச்சு மாதம் 31 ஆம் திகதி வரை அமுலில் இருக்குமென்பதும் அனைவரும் அறிந்த விடயமாகும். 21 பெருந்தோட்டக்கம்பனிகள் , இலங்கை அரச பெருந்தோட்ட கூட்டுத்தாபனம் ,மக்கள் தோட்ட அபிவிருத்தி சபை என்பனவற்றின் நிருவாகத்துக்கு உட்பட்ட தோட்டங்களில் பணிபுரிகின்ற தொழிலாளர்களுக்கு புதிய கூட்டொப்பந்தத்திற்கேற்ப வேதனம் வழங்கப்படவுள்ளமைக் குறிப்பிடத்தக்கது. புதிய கூட்டொப்பந்தத்தில் அடிப்படைச்சம்பளமாக 380 ரூபாவும் நிலையான விலை பங்கு கொடுப்பனவாக 30 ரூபாவும் மாதமொன்றுக்கு வழங்கப்படுகின்ற வேலை நாட்களில் 75 வீதம் அல்லது அதற்கு மேலாக வருகைத்தருகின்ற தொழிலாளர்களுக்கு நாளொன்றுக்கான வருகைக்கொடுப்பனவாக 105 ரூபாவும் வழங்கப்படுமென குறிப்பிடப்பட்டுள்ளது. அடிப்படைச்சம்பளம் மற்றும் நிபந்தனைக்கொடுப்பனவுகள் உட்பட தோட்டத்தொழிலாளி ஒருவர் 515 ரூபா சம்பளத்தினைப் பெற்றுக்கொள்ள முடியுமென புதிய கூட்டொப்பந்தத்தில் மேலும் குறிப்பிடப்பட்டுள்ளது. அத்துடன் தேயிலைத்தொழிலாளர்கள் மேலதிகமாக பறிக்கின்ற ஒவ்வொரு கிலோ தேயிலைக்கொழுந்துக்கும் 17 ரூபாவும் இறப்பர் தொழிலாளர்கள் மேலதிகமாக சேகரிக்கின்ற ஒவ்வொரு கிலோ இறப்பர் பாலுக்கும் 25 ரூபாவும் வழங்கப்படுமெனவும் தெரிவிக்கப்படுகின்றது.
இந்த ஒப்பந்தத்தில் தோட்டத்தொழிலாளர்களின் அடிப்படைச்சம்பளத்திற்கான வேலை அளவு குறித்து குறிப்பிடப்படாத காரணத்தினால் சிலதோட்டங்களில் ஒரு நாள் அடிப்படைச்சமபளத்திற்காக 13 கிலோ கொழுந்தினையும் மேலும் பல தோட்டங்களில் 14 கிலோ ,15 கிலோ ,16 கிலோ ,17 கிலோ ,18 கிலோ ,20 கிலோ என்ற ரீதியில் கொழுந்து பறிக்க வேண்டிய நிலைமை ஏற்பட்டுள்ளது. இந்த நிலையில் இந்த அளவையும் சில தோட்டங்கள் தன்னிச்சையாக அதிகரிப்பதற்கு எத்தனித்து வருவதால் பொகவந்தலாவை ,அட்டன் போன்ற பிரதேசங்களைச் சேர்ந்த தோட்டத்தொழிலாளர்கள் தத்தமது தொழிற்சங்கங்கள் ஊடாக தொழிற் திணைக்கள ஆணையாளரிடம் முறைப்பாடு தெரிவித்துள்ளனர். மேலும் சில தோட்டங்களில் அவ்வப்போது கவனயீர்ப்புப் போராட்டங்களும் இடம் பெற்று வருகின்றன. எனவே அடிப்படைச்சமபளத்திற்கான வேலையின் அளவு தோட்டத்துக்குத் தோட்டம் வேறுபடுவதால் தோட்டத்தொழிலாளர்களின் உழைப்பு மறைமுகமாக மீறப்பட்டு வருகன்றமைக்குறிப்பிடத்தக்கது. இவ்விடயம் குறித்து கூட்டொப்பந்தத் தொழிற்சங்கங்கள் எவ்வித நடவடிக்கைகளும் எடுபப்தாக தெரியவில்லை.
பொகவந்தலாவை பிரதேசத்தில் தோட்டமொன்றின் தொழிலாளர்கள் ஒரு நாள் அடிப்படைச்சம்பளத்திற்காக 14 கிலோ கொழுந்தினைப் பறித்து வந்ததாகவும் இந்த அளவினை 16 கிலோவாக அதிகரிக்குமாறு தோட்ட நிருவாகம் கோரியதாகவும் இதற்கு தொழிலாளர்கள் மறுப்புத் தெரிவித்த போதும் தோட்ட நிருவாகத்தினால் 16 கிலோவுக்குக் குறைவாக கொழுந்து பறித்த தொழிலாளர்களுக்கு கொழுந்து ஒரு கிலோ 23 ரூபா வீதம் சம்பளம் நிருணயிக்கப்பட்டதாகவும் 16 கிலோவுக்கு அதிகமாக பறித்தவர்களுக்கு 16 கிலோவுக்கு அடிப்படைச்சம்பளம் நிருணயிக்கப்பட்டுள்ளதாகவும் தெரிய வருகின்றது. தோட்ட நிருவாகங்களின் இந்தத் தன்னிச்சையான தீர்மானம் ஏனைய தோட்டங்களுக்கும் தொழிலாளர்களின் சம்மதமின்றி பரவக்கூடிய நிலைமை தோட்டப்பகுதிகளில் ஏற்பட்டுள்ளமைக்குறிப்பிடத்தக்கது.
எனவே இவ்விடயம் குறித்துப் பொறுப்பு வாய்ந்த தரப்புக்கள் தீர்க்கமான முடிவொன்றுக்கு வராவிட்டால் தொழிலாளர்களின் உழைப்பு சுரண்டப்படுவதைப் பார்த்துக்கொண்டிருக்க வேண்டிய நிலைமையே ஏறபடப்போகின்றது.

கொட்டகலை கே.ஜி.கே. தோட்ட தொழிலாளர்கள் பணி நிறுத்தம்

கொழும்பிலிருந்து சடலமொன்றினைக் கொண்டு வருவதற்கு தோட்டத்தின் லொறியை வழங்குவதற்கு மறுப்பு தெரிவித்த தோட்ட நிருவாகத்துக்கெதிராக கொட்டகலை யுலிபீல்ட் கே.ஜி.கே. தோட்டத்தைச்சேர்ந்த 220 தொழிலாளர்கள் கடந்த இரண்டு நாட்களாக பணிநிறுத்தத்தில் ஈடுபட்டு வருகின்றனர்.
இந்தப்போராட்டம் தொடர்பாக மேலும் தெரிய வருவதாவது :
கொட்டகலை யுலிபீல்ட் தோட்டத்தின் கே.ஜி.கே. பிரிவில் தொழில் புரிகின்ற தொழிலாளர் குடும்பத்தைச்சேர்ந்த 23 வயது இளைஞனொருவன் கடந்த 31 ஆம் திகதி கொழும்பு வத்துபிட்டியவில் இடம் பெற்ற விபத்தொன்றில் உயிரிழந்துள்ளார். இவரின் சடலத்தினைத் தோட்டத்துக்கு எடுத்து வருவதற்கு தோட்டத்தொழிலாளர்கள் தோட்டத்தின் லொறியைக் கேட்டுள்ளனர். எனினும் இந்த லொறியை வழங்குவதற்கு தோட்ட அதிகாரி மறுப்பு தெரிவித்துள்ளார்.
இதனைத் தொடர்ந்து தமது சொந்த செலவில் சடலத்தினைக் கொண்டு வந்த தோட்டத்தொழிலாளர்கள் குறிப்பிட்ட இளைஞனின் சடலத்தினை 2 ஆம் திகதி அடக்கம் செய்துள்ளனர். இந்த நிலையில் தோட்டத்தொழிலாளர்களின் குடும்பங்களில் மரணம் சம்பவிக்கின்ற சந்தர்ப்பங்களில் சடலத்தினை வைத்தியசாலையிலிருந்து கொண்டு வருவதற்கு தோட்ட லொறியை வழங்குவது வழக்கமாகும். இந்த நிலையில் மேற்படி சம்பவத்தில் மரணமான இளைஞனின் சடலத்தினை கொண்டு வருவதற்கு தோட்ட நிருவாகம் லொறியினைக் கொடுப்பதற்கு மறுப்பு தெரிவித்தமைக்குக் கண்டனம் தெரிவித்தே கே.ஜி.கே. தோட்டத்தொழிலாளர்கள் பணி நிறுத்தத்தில் ஈடுபட்டு வருகின்றனர். இந்தப்போராட்டம் தொடர்பில் கருத்துத் தெரிவிக்க மறுப்பு தெரிவித்த தோட்ட நிருவாகத்தினர் தோட்டத் தொழிலாளர்கள் பணி நிறுத்தம் மேற்கொள்வதை உறுதிபடுத்தினர்.

பலரின் பங்களிப்புடன் கிடைத்த வசதியான வீடு

தேசிய இளைஞர் சேவைகள் மன்றமும் இளைஞர் விவகார அமைச்சும் இணைந்து கடந்த வருடம் நடைமுறைப்படுத்திய ' இளைஞர் வருடமும் கிராமத்துக்கான வீடும்' என்ற நிகழ்ச்சி திட்டத்தின் கீழ் சாமிமலை ஸ்டொக்கம் நாமகள் ஐக்கிய இளைஞர் கழகத்தின் அங்கத்தவர்களான தோட்டத்தொழிலாளர் குடும்பம் ஒன்றுக்கு சகல தரப்பினரின் பங்களிப்புடன் வீடொன்று அமைத்துக் கொடுக்கப்பட்டுள்ளது.
ஸ்டொக்கம் தோட்டத்தின் நாமகள் ஐக்கிய இளைஞர் கழகத்தின் தலைவர் கருணாகரன் அவரின் மனைவியும் இந்தக்கழகத்தின் அங்கத்தவருமான ரஞ்சனி ஆகிய தம்பதிகளுக்கே இந்த வீடு அமைத்துக்கொடுக்கப்பட்டுள்ளது.
இந்த வீட்டினை அமைத்துக்கொள்ளவதற்கான இடத்தினை ஸ்டொக்கம் தோட்ட முகாமையாளர் வசந்தகுணணரத்ன வழங்கியுள்ளார்.
மேலும் வீட்டினை அமைத்துக்கொள்வதற்காக இளைஞர் சேவைகள் மன்றம் ஒரு இலட்சம் ரூபாவையும் வீட்டின் கூரைத்தகடுகளைப் பெற்றுக்கொள்வதற்காக பாராளுமன்ற உறுப்பினர் பி.திகாம்பரம் தனது பன்முகப்படுத்தப்பட்ட நிதியொதுக்கீட்டிலிருந்து 50 ஆயிரம் ரூபாவையும் மத்திய மாகாணசபை உறுப்பினர் கணபதி கனராஜ் 20 ஆயிரம் ரூபாவையும் வழங்கியதோடு அம்பகமுவ பிரதேச சபை 10 ஆயிரம் ரூபாவையும் சேவா லங்கா மற்றும் வேல்ட் விசன் ஆகிய நிறுவனங்கள் தலா 30 ஆயிரம் ரூபாவையும் வழங்கியுள்ளன.
மேற்படி தம்பதிகளுக்கான இந்த வீட்டினைப் அமைத்துக்கொடுப்பதில் கினிகத்தேனை பிரNதுச இளைஞர் அதிகாரி ஏ.பாலசுப்பிரமணியம் ,விளையாட்டு அதிகாரி கிங்ஸ்லி ,அம்பகமுவ பிரNதுச சபை உறுப்பினர் கே.சுரேஷ்குமார் ,தோட்ட முகாமையாளர் வசந்த குணரத்ன ,நாமகள் ஐக்கிய இளைஞர் கழகத்தின் அங்கத்தவர்கள் ஆகியோர் பல்வேறு உதவிகளை நல்கியுள்ளனர்.
நீண்டகாலமாக வீட்டு வசதியின் வாழ்ந்து வந்த கருணாகரன் - ரஞ்சனி தம்பதிகளுக்குப் பலதரப்பினரின் பங்களிப்புடன் கிடைத்துள்ள இந்த வீட்டின் திறப்பு விழா அண்மையில் வெகுசிறப்பாக இடம் பெற்றமைக்குறிப்பிடத்தக்கது.

மலையகத்தமிழ் மாணவர்கள் கல்வித்துறையில் முன்னேற வேண்டும் : பி.திகாம்பரம் எம்.பி

மலையகத் தோட்டப்பகுதி மாணவர்கள் கல்வித்துறையிலும் விளையாட்டுத்துறையிலும் அதிக கவனம் செலுத்தி தமது எதிர்காலத்தினை வளப்படுத்திக்கொள்ள வேண்டுமென தொழிலாளர் தேசிய சங்கத்தின் தலைவரும் நுவரெலியா மாவட்ட பாரளுமன்ற உறுப்பினருமான பி.திகாம்பரம் தெரிவித்தார்.
பத்தனை கிறேகிலி தோட்ட லயன் ஸ்டார் விளையாட்டுக்கழகத்தினால் ஏற்பாடு செய்யப்பட்ட கரப்பந்தாட்டம் மற்றும் மென்பந்து கிரிக்கெட் சுற்றுப்போட்டிகளில் வெற்றிப் பெற்றவர்களுக்கான பரசளிப்பு நிகழ்வில் கலந்து கொண்டு பேசுகையிலேயே இவ்வாறு அவர் தெரிவித்தார்.
இந்த நிகழ்வின் போது கிறேக்கிலி தோட்டத்திலிருந்து முதன் முறையாக பல்கலைக்கழகத்திற்கு தெரிவாகியுள்ள மாணவர் ஒருவருக்கு கற்றலுக்கான நிதியுதவியையும் பாராளுமன்ற உறுப்பினர் பி.திகாம்பரம் வழங்கி வைத்தார்.
இந்த நிகழ்வில் தொழிலாளர் தேசிய சங்கத்தின் தேசிய அமைப்பாளர் எஸ்.ஸ்ரீதரன் , சங்கத்தின் உபதலைவரும் நுவரெலியா பிரதேச சபை உறுப்பினருமான ராஜமாணிக்கம் ,பத்தனை அமைப்பாளர் லெட்சுமணன் ,கொட்டகலை அமைப்பாளர் சிவகுமார் உட்பட பலர் கலந்து கொண்டனர்.
பாராளுமன்ற உறுப்பினர் பி.திகாம்பரம் தொடர்ந்து பேசுகையில் கூறியதாவது :
பல்வேறு பொருளாதார பிரச்சினைகளுக்கு மத்தியிலும் தோட்டத்தொழிலாளர்கள் தமது பிள்ளைகளைக் கல்வி கற்க வைப்பதில் ஆர்வம் செலுத்தி வருகின்றனர். இவர்களின் எதிர்பாப்பினைப் பூர்த்தி செய்யும் வகையில் மாணவர்கள் தமது கல்வியில் அக்கறை செலுத்த வேண்டும். கிறேக்கிலி தோட்டத்திலிருந்து தோட்டத்தொழிலாளி ஒருவரின் பிள்ளை முதன் முறையாகப் பல்கலைகக்ழகத்திற்குத் தெரிவு செய்யப்பட்டுள்ளமை மகிழச்சிக்குரிய விடமாகும். இவ்வாறு ஒவ்வொரு தோட்டத்திலிருந்தும் படித்தவர்களும் பட்டதாரிகளும் உருவாக வேண்டும். அப்போது தான் எமது சமூகம் மேலும் முன்னேற்றமடையும். இதனால் மற்றவர்களால் எமது சமூகம் ஏமாற்றப்படுவதிலிருந்து தப்பித்துக் கொள்ள முடியும். தோட்டத்தொழிலாளர் குடும்பத்தினர் எவ்வாறான பிரச்சினைகளுக்கு மத்தியில் வாழ்கின்றார்கள் என்பதை நான் அனுபவித்தில் உணர்ந்தவன் .அதனால் தான் நான் என்றும் மக்கள் மத்தியிலிருந்து கொண்டு மக்கள் விரும்புகின்ற வகையில் சேவையாற்றி வருகின்றேன். எனது பன்முகப்படுத்தப்பட்ட நிதியொதுக்கீட்டில் மூலமாகவும் பொருளாதார அபிவிருத்தி அமைச்சினால் கிடைத்துள்ள 5 கோடி ரூபா மூலமாகவும் தோட்டப்பகுதிகளில் பல்வேறு அபிவிருத்தித்திட்டங்களைப் பாரபட்சமின்றி முன்னெடுத்துள்ளேன். டிக்கோயா போடைஸ் தோட்டத்தில் 12 இலட்சம் ரூபா பெறுமதியில் சிறுவர் முன்பள்ளி ஒன்றை அமைத்துள்ளேன். இதே வேளை மலையகத்தோட்டப்பகுதி விளையாட்டு வீரர்களை ஊக்கப்படுத்தும் வகையில் பல்வேறு உதவிகளை மேற்கொண்டு வருகின்றேன்.
இந்த நிலையில் இன்று தோட்டத்தொழிலாளர்கள் தோட்டக்கம்பனிகளின் பல்வேறு நெருக்குவாரங்களுக்கு முகங்கொடுத்து வருகின்றனர். சில தோட்ட முகாமையாளர்கள் தோட்டத்தொழிலாளர்களின் வேலைப்பளுவை அதிகரிக்கும் வகையில் தொழிலாளர்களை அச்சுறுத்தும் வகையில் நடந்து கொள்கின்றனர்.அண்மையில் அட்டன் வெலிஓயா தோட்டத்தொழிலாளர்கள் எதிர் நோக்கிய வேலைப்பளு அதிகரிப்புத் தொடர்பான பிரச்சினையைத் தொழிலாளர் தேசிய சங்கம் முன்னின்று தொழிலாளர்களின் போராட்டத்திற்கு ஒத்துழைத்தமையை இங்கு தெரிவித்துக்கொள்கின்றேன். தோட்டங்களில் வேலைப்பளுவை அதிகரிப்பதற்கான எந்தவிதமான தன்னிச்சை அதிகாரமும் தோட்ட நிருவாகங்களுக்கு வழங்கப்படவில்லை என்பதை உணர்ந்து தொழிலாளர்கள் விழிப்புடன் செயற்படவேண்டும்.