தோட்டத்தொழிலாளர்களின் வீடில்லா பிரச்சினைக்கு எப்போது தீர்வு ?

சோ.ஸ்ரீதரன்
தோட்டப்பகுதிகளில் வாழுகின்ற தொழிலாளர் குடும்பங்களின் பெரும்பாலானோருக்குப் புதிய வீடுகளின் தேவை தற்போது அதிகரித்துள்ளது. இற்றைக்கு 150 வருடங்களுக்கு முன்பு நிர்மாணிக்கப்பட்ட லயன் குடியிருப்புக்களில் தோட்டத்தொழிலாளர்கள் பரம்பரை பரம்பரையாக வாழ்ந்து கொண்டிருக்கின்றார்கள். தமிழகத்திலிருந்து வந்தேறு குடிகளாக வந்தவர்கள் இன்று இந்த நாட்டில் நிரந்திரமாக வாழவேண்டிய சூழலிலுள்ளனர். இந்த நாட்டில் பெருந்தோட்டத்தொழிற்துறையை அறிமுகப்படுத்திய ஆங்கிலேயர்கள் தோட்டப்பகுதிகளில் தொழில் செய்கின்ற தொழிலாளர்களுக்காக தற்காலிகமாக அமைக்கப்பட்ட லயன் குடியிருப்புக்கள் இன்று இந்தத்தொழிலாளர்களின் நிரந்திர இருப்பிடங்களாக மாறிவிட்டன. பத்தடி விஸ்திரமான அறைக்குள் முடங்கி வாழும் அவர்களின் வாழ்க்கை இரண்டு சகாப்தத்தை நெருங்கி கொண்டிருக்கின்றது. எந்த விதமான வீட்டுரிமையோ காணியுரிமையோ இன்றி தோட்டத்தொழிலாளர் குடும்பங்கள் பரம்பரை பரம்பரையாக வாழ வேண்டி நிலைமை தொடர்கின்றது.

தோட்டப்பகுதிகளில் லயன் குடியிருப்பு ,இரட்டை வீடுகள் , தொடர் மாடி குடியிருப்புக்கள் என்ற ரீதியில் வீடுகள் அமைத்துக்கொடுக்கப்பட்டுள்ளன. ஆங்கிலேயர் காலத்தைத் தொடர்ந்து தோட்டத்தொழிலாளர்களுக்குக் குறிப்பிட்டுச்சொல்லக்கூடிய வகையில் இலவசமாக வீடுகள் கட்டிக்கொடுக்கப்படவில்லை. அமரர் பெ.சந்திரசேகரன் பிரதியமைச்சராக இருந்த காலத்தில் 7 பேர்ச்சர்ஸ் நிலத்தில் வீடமைப்பு அதிகார சபையின் ஊடாக தனிவீடுகள் கட்டிக்கொடுக்கப்பட்டன. தோட்ட உட்கட்டமைப்பு அமைச்சும் வீடமைப்பு அதிகாரசபையின் ஊடாக மீள கடன் செலுத்தும் திட்டத்திற்கேற்ப தொடர்மாடிகள் கட்டிக்கொடுக்கப்பட்டன. அதே வேளை தோட்டத்தொழிலாளர்களின் ஊழியர் சேமலாப நிதியத்திலிருந்து கடன் பெற்று பெருந்தோட்ட மனிதவள அபிவிருத்தி நிறுவனத்தின் ஊடாகவும் தோட்டப்பகுதிகளில் தனி வீடுகள் கட்டிக்கொடுக்கப்படுகின்றன. இவ்வாறானதொரு நிலையில் பெருந்தோட்டக்கம்பனிகள் தோட்டத்தொழிலாளர்களுக்குப் புதிய வீடுகள் கட்டிக்கொடுப்பதில்லை ,மாறாக பெருந்தோட்ட மனிதவள அபிவிருத்தி நிறுவனத்தின் ஊடாக லயன் குடியிருப்புகளுக்குக் கூரைத்தகரங்களை மாற்றும் நடவடிக்கைகளில் ஈடுபடுகின்றன.

தோட்டங்களில் தற்போது தொழிலாளர் குடும்பங்களின் எண்ணிக்கை அதிகரித்து வருகின்ற இந்த வேளையில் ஒரே வீட்டில் குறைந்தது மூன்று குடும்பங்கள் வாழ வேண்டிய நிலைமை ஏற்பட்டுள்ளது. இதே வேளை தோட்டங்களிலுள்ள ஒதுக்குப்புறங்களில் எவ்விதமான அடிப்படை வசதிகளுமின்றி தற்காலிக குடில்களை அமைத்துக்கொண்டு வாழ வேண்டிய நிலைமை தோட்டத் தொழிலாளர் குடும்பங்களுக்கு ஏற்பட்டுள்ளது.

கடந்த 2002 ஆம் ஆண்டு நுவரெலியா மாவட்டத்தில் 5000 தற்காலிக குடில்களில் வாழந்தவர்களுக்கு வீடமைத்துக்கொள்வதற்காக தோட்ட உட்கட்டமைப்பு அமைச்சினால் மக்கள் வங்கியின் ஊடாக ஒவ்வொரு குடும்பங்களுக்கும் வழங்கப்பட்ட 30 ஆயிரம் ரூபா இதுவரை உரியவர்களுக்குக் கிடைக்கவில்லை என்பதும் குறிப்பிடத்தக்கது.

எமது நாடடிலுள்ள ஒவ்வொரு தோட்டப்பிரிவிலும் லயன் குடியிருப்புக்களில் வாழுகின்றவர்களைத்தவிர சுமார் 50 க்கும் மேற்பட்ட தொழிலாளர் குடும்பங்கள் எவ்வித குடியிருப்பு வசதிகளுமின்றி வாழ்ந்து கொண்டிருக்கின்றார்கள்.இவ்வாறு பார்க்கின்ற போது சுமார் ஒரு இலட்சத்துக்கும் மேற்பட்டோருக்குப் புதிய வீடுகள் தேவைப்படுகின்றது.இவ்வாறானதொரு நிலையில் இந்திய அரசாங்கம் 4000 வீடுகளைத் தோட்டப்பகுதிகளில் அமைத்துக்கொடுக்கவுள்ளதாக இலங்கைக்கான இந்திய தூதுவர் அசோக் கே காந்தா அண்மையில் அறிவித்திருந்தார்.
இவ்வாறானதொரு நிலையில் மலையகத்திலுள்ள சில தொழிற்சங்கங்கள் தோட்டத்தொழிலாளர்களுக்கு தமது சங்கத்தின் ஊடாக வீடுகள் அமைத்தக்கொடுக்கப்போவதாகவும் குறிப்பிட்ட சங்கங்களில் அங்கத்துவம் உள்ளவர்களுக்கு மாத்திரமே வீடுகள் அமைத்துக்கொடுக்கப்படுமெனவும் தோட்டத்தொழிலாளர்களை ஏமாற்றம் நடவடிக்கைகளில் ஈடுபட்டுள்ளன. அத்துடன் இந்தத்தொழிற்சங்கங்கள் தொழிற்சங்கங்களுக்கு அங்கத்துவம் சேர்க்கும் போது தமது தலைவர்கள் ஊடாக வீடமைப்புத் தொடர்பாக சில விண்ணப்பங்களை விநியோகித்துள்ளமையும் குறிப்பிடத்தக்கது. தோட்டத்தொழிலாளர்களை எப்படியும் ஏமாற்றலாமென்ற ரீதியில் சில தொழிற்சங்கங்கள் செயற்படுவது வருந்தத்தக்க விடயமாகும்.
எனவே இந்திய அரசாங்கத்தினால் தோட்டப்பகுதிகளில் முன்னெடுக்கப்படுகின்ற வீடமைப்புத்திட்டமாகட்டும் அல்லது பெருந்தோட்ட மனிதவள அபிவிருத்தி நிறுவனத்தினால் முன்னெடுக்கப்படுகின்ற வீடமைப்புத்திட்டமாக இருக்கட்டும் இந்த வீடமைப்புத்திட்டங்கள் கட்சி தொழிற்சங்க ரீதியாக மேற்கொள்ள முடியாதென்பதை தோட்டத்தொழிலாளர்கள் தெளிவுடன் இருக்க வேண்டும். இந்த நிலையில் தோட்டத்தொழிலாளர்களுக்கு தனிவீட்டுத்திட்டங்களை முன்னெடுப்பதற்கு அரசாங்கம் நடவடிக்கை எடுக்க வேண்டும்.

ரம்பொடை ஆஞ்சநேயர் ஆலயம்

சோ.ஸ்ரீதரன்
இலங்கை மற்றும் ஏனைய நாட்டு மக்களின் வணக்கஸ்தலமாக கருதப்படுகின்ற இடங்களில் றம்பொடை ஸ்ரீ பக்த அனுமன் ஆலயமுமொன்றாகும். நுவரெலியா மாவட்டத்தில் கம்பளை நுவரெலியா பிரதான பாதையில் றம்பொடை நகருக்கு அருகிலுள்ள மலை ஒன்றின் சிகரத்தில் இந்த ஆலயம் அமைந்துள்ளது .
இலங்கை சின்மயா மிஸ்ரீனினால் நிருவகிக்கப்படுகின்ற இந்த ஆலயம் சுவாமி சின்மயானந்தரின் விருப்பத்துக்கேற்ப 2001 ஆம் ஆண்டு அமைக்கப்பட்டது. றம்பொடை என்று அழைக்கப்படுகின்ற இந்த பிரதேசத்தை சிலர் இராமாயணத்துடன் தொடர்புபடும் வகையில் ராம்படை என்று குறிப்பிடுகின்றனர். இராவணன் சீதையை இலங்கைக்குக் கடத்தி வந்த போது சீதையைத் தேடி வந்த அனுமன் இந்தப்பிரதேசத்திலும் சீதையைத் தேடியதாகவும் இராவணனுடன் போர் செய்வதற்கு ராமர் படையொன்று இந்தப்பிரதேசத்தில் தயாராகவிருந்ததாகவும் இதனால் ராம்படை என்ற பெயர் வந்ததாகவும் காலப்போக்கில் றம்பொடையாக பெயர் திரிபடைந்ததாகவும் சொல்லப்படுகின்றது. எனினும் சுவாமி சின்மயானந்தர் இந்தப்பிரதேசத்தை இராம்போத ( இராமர் பற்றிய அறிவு ) என்று குறிப்பிட்டு இந்தப்பகுதியில் ஆச்சிரமம் ஒன்றும் ஸ்ரீ பக்த அனுமனுக்கு கோவிலொன்றும் ஏற்படுத்தப்பட்டது. இந்த ஆலயத்திலுள் ஸ்ரீ பக்த அனுமன் சிலை 16 அடி உயரமானது. தமிழ் நாட்டிலுள்ள மகாபலிபுரத்திலுள்ள ஒரே கல்லில் செதுக்கப்பட்ட இந்த அனுமன் சிலை தமிழகத்திலிருந்து கப்பல் மூலம் கொழும்பு துறைமுகத்துக்குக் கொண்டு வரப்பட்டு அங்கிருந்து றம்பொடைக்கு ஊர்வலமாக கொண்டு வரப்பட்டது. இவ்வாறு கொண்டு வரப்பட்ட இந்தச்சிலையைப் பிரதிஷ்டை செய்த பின்பு ஆலயம் நிர்மாணிக்கப்பட்டமைக் குறிப்பிடத்தக்க விடயமாகும்.
ஆலயத்தின் குன்று பகுதியிலிருந்து றம்பொடை பிரதேசத்தின் அழகினை ரசிக்க முடியும்.இந்த ஆலயத்துக்கு அருகில் றம்பொடை நீர்வீழ்ச்சி , இலங்கையில் நீண்ட சுரங்கப்பாதை ,கொத்மலை நீர்த்தேக்கம் என்பன உள்ளமை முக்கிய அம்சமாகும்.இந்த ஆலயத்தில் ஒவ்வொரு பூரணைத்தினத்தன்றும் இடம் பெறும் விசேட பூஜைகளில் உள்நாட்டு வெளிநாட்டு பக்தர்கள் ஆயிரக்கணக்கில் கலந்து கொள்வர். இந்த ஆலயத்துக்கு சகல இனமக்களும் சகல மதத்தினரும் வந்து செல்வது முக்கிய அம்சமாகும். றம்பொடை ஸ்ரீ பக்த அனுமன் ஆலய ஆச்சிரமத்தின் ஊடாக ஒவ்வொரு பூரணித்தினத்தன்றும் பக்தர்களுக்கு அன்னதானம் வழங்கப்படுகின்றது. இந்த ஆச்சிரமத்தினால் பிரதேசத்தில் வாழுகின்ற சிறுவர்களுக்கு முன்பள்ளி ,அறநெறி கல்வி புகட்டப்படுவதோடு ,கல்வி உதவிகளும் பெண்களுக்கு சுயத்தொழில் பயிற்சிகளும் வழங்கப்படுகின்றன.

ரம்பொடை சுரங்கப்பாதை

சோ.ஸ்ரீதரன்
இயற்கை எழில் கொஞ்சும் நுவரெலியா மாவட்டத்திற்குப் பல்வேறு தேவைகளுக்காக வருகின்ற மக்களுக்கு இலகுவான போக்குவரத்துச்சேவையை வழங்குவதற்காக யப்பான் நாட்டின் நிதியுதவியுடன் ஏற்படுத்தப்பட்டதே ரம்பொடை சுரங்கப்பாதை ஆகும். இந்த சுரங்கப்பாதை தான் இலங்கையிலுள்ள மிக நீண்ட சுரங்கப்பாதையாகும்.
54 கிலோ மீற்றர் தூரமுள்ள கம்பளை – நுவரெலியா பாதையில் தவலந்தென்ன சந்தியைத் தொடர்ந்துள்ள ரம்பொடையில் அமைக்கப்பட்டுள்ள இந்தச்சுரங்கப்பாதையின் நீளம் 225 மீற்றராகும். இதன் அகலம் 7 மீற்றராகும்.இந்த சுரங்கப்பாதையினுள் வாகனப்போக்குவரத்துகளுக்காக இரு வழிகள் ஏற்படுத்தப்பட்டுள்ளன.
ஜப்பான் அரசாங்கத்தின் 200 மில்லியன் ரூபா நிதியுதவியுடன் 2006 ஆம் ஆண்டு ஆரம்பிக்கப்பட்ட இந்தச் சுரங்கப்பாதையின் பணிகள் 2008 ஆம் ஆண்டு பூர்த்தி செய்யப்பட்டது.
இவ்வாறு பூர்த்தி செய்யப்பட்ட இந்தச்சுரங்கப்பாதையை ஜனாதிபதி மஹிந்தராஜபக்ஷ 2008 ஆம் ஆண்டு மார்ச்சு மாதம் 2 ஆம் திகதி உத்தியோகப்பூர்வமாக திறந்து வைத்தார்.
இந்தச்சுரங்கப்பாதை அமைக்கப்படுவதற்கு முன்பு பயன்படுத்தப்பட்ட பாதைப்பகுதியில் அடிக்கடி மண்சரிவுகள் ஏற்பட்டதால் வாகனப்போக்குவரத்துக்கள் தடைப்பட்டன.இந்தப்பிரச்சினைக்குத் தீர்வு காணுவதற்காக அருகிலுள்ள மலையைக் குடைந்து சுரங்கப்பாதை அமைக்கப்பட்டுள்ளமைக்குறிப்பிடத்தக்கது.
இந்தச்சுரங்கப்பாதையின் நுழைவாயிலில் சிறிய நீர் வீழ்ச்சியொன்று உள்ளது. சுரங்கப்பாதையைக்கடந்ததன் பின்பு ரம்பொடை நீர்வீழ்ச்சி உள்ளது.
சுரங்கப்பாதையினுள் இரவும் பகலும் மின்னொளி ஏற்படுத்தப்பட்டுள்ளது. அத்துடன் சுரங்கப்பாதையினுள் வாகனப்போக்குவரத்தக்களை அவதானிப்பதற்காக பொலிஸ் காவலரணொன்றும் ஏற்படுத்தப்பட்டுள்ளது.

கம்பளை வழியாக நுவரெலியாவுக்குச் செல்லுகின்ற உல்லாசப்பயணிகளும் ஏனையவர்களும் இந்தச்சுரங்கப்பாதை அருகில் தமது வாகனங்களை நிறுத்தி வைத்துவிட்டு ரசித்துச்செல்வதை அவதானிக்கலாம்.
இலங்கையின் மிக நீண்ட சுரங்கப்பாதையை நீங்களும் ஒரு நாள் சென்று ரசியுங்கள்.

சாமிமலை பிரதேசத்தில் குளவிகள் கொட்டியதால் பெண்தொழிலாளி பரிதாப மரணம்.

சாமிமலை ஸடெஸ்பி தோட்டப்பிரிவுகளில் குளவிகளின் பெருக்கம் அதிகரித்துள்ளதால் தோட்டத்தொழிலாளர்கள் பல்வேறு வகையில் பாதிப்புக்கு உள்ளாகி வருகின்றனர். சாமிமலை குமரி தோட்டத்தில் நேற்று 13 ஆம் திகதி கொழுந்து பறித்துக்கொண்டிருந்த பெண்தொழிலாளர்களைக் குளவிகள் சூழ்ந்து தாக்கியதில் ஒருவர் உயிரிழந்துள்ளதோடு இரண்டு பேர் பாதிப்புக்கு உள்ளாகி மஸ்கெலியா வைத்தியசாலையில் அனுமதிக்கப்பட்டுள்ளனர். தேயிலைச்செடிகளுக்கு அருகிலுள்ள குளவிக்கூடுகளை அப்புறப்படுத்துவதற்கு தோட்ட நிருவாகம் நடவடிக்கை எடுக்காமையே இந்த நிலைமைக்குக் காரணமெனத் தோட்டத்தொழிலாளர்கள் விசனம் தெரிவிக்கின்றனர். இந்த நிலையில் ஸ்டெஸ்பி தோட்ட வைத்தியசாலையில் கடந்த 4 மாதங்களுக்கு மேல் தோட்ட மருத்துவ உதவியாளர் ஒருவர் நியமிக்கப்படாத காரணத்தினால் இந்தத்தோட்டப்பகுதிகளில் திடீர் விபத்துக்கள் ஏற்படுகின்ற போது பாதிக்கப்பட்டவர்களுக்கு முதலுதவியைக்கூட பெற்றுக்கொள்ள முடியாத நிலைமை ஏற்பட்டுள்ளது. இவ்விடயத்தில் பெருந்தோட்ட மனித வள அபிவிருத்தி நிறுவனம் பொறுப்பற்ற விதத்தில் செயற்படுவதாக தொழிலாளர்கள் புகார் தெரிவிக்கின்றனர். எனவே சாமிமலை ஸடெஸ்பி தோட்ட வைத்தியசாலைக்கு வைத்தியர் ஒருவரை நியமிப்பதற்கு பெருந்தோட்ட மனித வள அபிவிருத்தி நிறுவனம் நடவடிக்கை எடுக்க வேண்டுமெனவும் ஸ்டெஸ்பி தோட்டப்பகுதிகளில் உள்ள குளவிக்கூடுகளை அப்புறப்படுத்துவதற்கு தோட்ட நிருவாகம் நடவடிக்கை எடுக்க வேண்டுமெனவும் தோட்ட மக்கள் கோரிக்கை விடுத்துள்ளனர். இந்த நிலையில் கொழுந்து பறித்துக்கொண்டிருந்த போது குளவிக் கொட்டுதலுக்கு இலக்காகி உயிரிழந்த பெண்ணின் குடும்பத்துக்குத் தோட்ட நிருவாகம் உரிய நஷ்ட ஈட்டை வழங்க வேண்டுமெனவும் குமரி தோட்ட மக்கள் கோரிக்கை விடுத்துள்ளனர்.

இன்றைய நவீன காலத்தில் மாணவர்கள் கொழுந்து மடுவத்தில் கல்வி கற்கும் பரிதாபம்

சோ.ஸ்ரீதரன்
மத்திய மாகாணத்திலுள்ள கல்வி வலயங்களில் அட்டன் கல்வி வலயத்தில் கல்வி வளர்ச்சி ஏற்பட்டு வருதற்கு இந்தக் கல்வி வலயத்திலுள்ள பெரும்பாலான பாடசாலைகளுக்கு ஆளணி மற்றும் பௌதிக வளங்கள் ஓரளவு கிடைத்து வருகின்றமையே காரணமென்று கூறப்படுகின்றது. இந்த நிலையில் இந்தக்கல்வி வலயத்தைச்சேர்ந்த அட்டன் மற்றும் கொட்டகலை நகரப்பகுதிக்கு அருகிலுள்ள பிட்டன்வின் தமிழ் பாடசாலை மாணவர்கள் எதிர்நோக்குகின்ற பிரச்சினைகள் குறித்து எவரும் கண்டு கொள்ளமல் இருப்பது வேதனைக்குரிய விடயமாகும். தோட்டக்குடியிருப்புக்கு மத்தியில் அமைந்துள்ள இந்தப்பாடசாலைக்கு உரிய வகுப்பறை கட்டிட வசதியில்லாத காரணத்தினால் கொழுந்து மடுவத்தில் கல்விக்கற்க வேண்டிய நிலைமை மாணவர்களுக்கு ஏற்பட்டுள்ளது. இந்தக்கொழுந்து மடுவத்தில் பெற்றோர் கொழுந்து நிறுவை செய்துகொண்டிருக்கின்ற அதேவேளை அதனைப்பார்த்துக்கொண்டு கல்விக்கற்க வேண்டிய நிலைமை மாணவர்களுக்கு ஏற்பட்டுள்ளது. சுமார் 90 மாணவர்கள் கல்விக்கற்கின்ற இந்தப்பாடசாலைக்கு புதிய கட்டிடம் ஒன்றை அமைப்பதற்கான இடமொன்றினை தோட்ட நிருவாகம் ஒதுக்கிக்கொடுத்துள்ள போதும் புதிய கட்டிடம் அமைப்பது தொடர்பில் மத்திய மாகாணக் கல்வியமைச்சு அக்கறை செலுத்துவதாக தெரியவில்லை என்று பெற்றோர் முறையிடுகின்றனர்.

நுவரெலியா சீதையம்மன் ஆலயம்

சோ.ஸ்ரீதரன்

எமது நாட்டில் உள்நாட்டு வெளிநாட்டு உல்லாச பயணிகளைக் கவர்ந்திழுப்பதில்
வரலாற்று முக்கியத்தவம் மிக்க வணக்கஸ்தலங்களும் உள்ளன. அந்த வகையில்இராமாணயத்தில் குறிப்பிடப்படுகின்ற அசோக வனமாக நுவரெலியா நகருக்கு அண்மையிலுள்ளசீதையம்மன் கோவில் சூழல் அமைகின்றது.
இராமன் , சீதை ,லக்குமணன் வனவாசம் செய்து கொண்டிருந்த போது இலங்கை அரசன் இராவணன் நயவஞ்சகமாய் சீதையைக் கவர்ந்து கொண்டு வந்து இலங்கையில் சிறையடைத்தான் என்று இராமாயணம் கூறுகின்றது. அவ்வாறு இராவணனால் இலங்கைக்குக் கொண்டு வரப்பட்ட சீதை இராவணனின் அரண்மனையில் தங்குவதற்கு மறுப்புத் தெரிவித்து அசோக வனத்தின்
அசோக மரத்துக்கு அடியில் தங்கியதாக இராமயணக்கதைகள் கூறுகின்றன.
அவ்வாறு இலங்கையில் சீதை தங்கிய இடமாக சீதா எலிய கருதப்படுகின்றது.
சீதை தங்கியதாக கருதப்படுகின்ற இடத்தில் தற்போது ஆலயமொன்று அமைக்கப்பட்டுள்ளது.இந்த ஆலயத்தில் ராமர் , சீதை ,லக்குமணன் , அனுமன் ஆகியோருக்குச் சிலைகள் உள்ளன. இந்த
ஆலயத்துக்கு அருகிலுள்ள ஆற்றில் சீதாதேவி குளிர்த்ததாகவும் அந்த ஆற்றோரத்திலுள்ள கற்பாறையில் அமர்ந்து கூந்தல் உலர்த்தியதாகவும் பிரதேச வாசிகள் கூறுகின்றனர்.


அத்துடன் இந்தக் கற்பாறையிலுள்ள பாதச்சுவடுகள் இராமனின் தூதுவனான அனுமானின் பாதச்சுவடுகளென்றும் அவனின் பாதச்சுவடுகள் கற்பாறையில் பதியும் வகையில் அவன் பலசாலி என்றும் தெரிவிக்கப்படுகின்றது. அதே வேளை இந்தச் சீதையம்மன் ஆலயத்ததைச்சூழவுள்ள பகுதிகளிலுள்ள மண் கரு நிறமாகவுள்ளமைக்கு அனுமன் இலங்கையை எரித்த போது மண் கருநிறமாக மாறியதாக பிரதேச மக்கள் கருத்துத் தெரிவிக்கின்றனர். நுவரெலியா நகரிலிருந்து 6 கிலோ மீற்றர் தூரமுள்ள இந்த சீதையம்மன் ஆலயத்துக்கு
வெலிமடைபாதையின் ஊடாக பயணிக்கின்ற போது காணலாம். அடர்ந்த காடுகள் சூழ்ந்த பகுதியிலுள்ள இந்த ஆலயத்துக்கு நாளாந்தம் இந்தியாவிலிந்து பக்தர்களும் உல்லாச பயணிகளும் அதிகமாக வந்து செல்வது குறிப்பிடத்தக்க விடயமாகும். இந்த ஆலயத்தின் உட்சுவர்களில் இராமாயண கதையினைச்சித்தரிக்கும் வகையில் ஓவியங்கள் தீட்டப்பட்டுள்ளன.
சிலைகளும் அமைக்கப்பட்டுள்ளன. எவ்வித இனமத பேதமின்றி சீதையம்மன் ஆலயத்துக்கு வந்துச்செல்வதில் இலங்கை மக்கள் ஆர்வத்துடன் உள்ளனர்.

50 ஆயிரம் கையொப்பங்கள் கையளிப்பு

பிரதேசசபை சேவைகளை தோட்டப்புறங்களுக்கு விரிவுப்படுத்தல் மற்றும் தோட்டக்குடியிருப்புகளை பிரதேச அலகுகளுக்கு கீழ் கொண்டுவருதல் தொடர்பான கையெழுத்து மகஜர் - நுவரெலியா மாவட்டச்செயலாளருக்கு பெருந்தோட்டத்துறை சமூகமாமன்றம் கையளித்துள்ளது.

பெருந்தோட்டத்துறை சமூகமாமன்றத்தின் அங்கத்துவ நிறுவனங்களின் பிரதிநிதிகள் பலர் அண்மையில் நுவரெலியா மாவட்டச்செயலாளரை சந்தித்து பிரதேசசபை சேவைகளை தோட்டப்புறங்களுக்கும் விஸ்தரித்தல் மற்றும் தோட்டத்குடியிருப்புகளை கிராமங்களாக அங்கீகரித்தல் தொடர்பான 50000 இற்கும் மேற்பட்ட கையெழுத்து அடங்கிய மகஜரை கையளித்தனர். இச்சந்திப்பில் கலந்துகொண்ட மாவட்டச் செயலாளர் குறிப்பிட்டதாவது, நுவரெலியா மாவட்டத்தில் வாழுகின்ற தமிழ் மக்களுக்கு பல்வேறு பிரச்சினைகள் இருப்பதை தான் 20 வருடங்களுக்கு மேலாக அறிந்திருப்பதாகவும், தன்னாலான எல்லாவித முயற்சிகளையும் எடுத்துள்ளதாகவும், தொடர்ந்தும் முன்னெடுப்பதாகவும் குறிப்பிட்டதோடு, உங்களைப்போன்ற நிறுவனங்கள் இதற்கான காத்திரமான பங்களிப்பினை வழங்குவதானது சிறப்பான ஒன்றாக இருக்கிறது என்றும் குறிப்பிட்டார். மேலும் அவர் குறிப்பிட்டதாவது எதிர்வரும் காலங்களில் உத்தேசிக்கப்பட்டுள்ள பிரதேச செயலக விஸ்தரிப்பில் நுவரெலியா மாவட்டத்திற்கு 12 பிரதேச செயலகங்கள் உருவாக்கப்படவிருப்பதாகவும் இதன் மூலம் முன்னரைவிட மிகச் சுலபமாக பெருந்தோட்ட மக்களும் தமது சேவைகளைப் பெற்றுக்கொள்ள முடியுமானதாக இருக்கும் அதேவேளை தொடர்ந்து தோட்டப்புறங்களுக்கு தனது சேவைகளை படிப்படியாக விஸ்தரித்து வருவதாகவும் குறிப்பிட்டார்.இந்தச்சந்திப்பில் கலந்து கொண்ட வணபிதா பெனி யே.ச அவர்கள் மகஜரை பற்றி விளக்கிக்கூறியதோடு, பெருந்தோட்டத்துறை சமூக மாமன்றத்தின் வலையமைப்பு பற்றியும் கருத்து தெரிவித்தார்.

சுமார் 15 நிமிடங்கள் வரை நீடித்த இச்சந்திப்பில் இறுதியில் அருட்தந்தை பெனி யே.ச அவர்களினால் கையெழுத்து மகஜர் நுவரெலியா மாவட்ட செயலாளர் டி.பி.ஜி குமாரசிறியிடம் கையளிக்கப்பட்டது. இச்சந்திப்பிற்கு பெருந்தோட்டத்துறை சமூக மாமன்றத்தின் வலையமைப்பு நிறுவன பிரதிநிதிகளான அருட்தந்தை பெனி யே.ச - ஊளுஊ, ஏ.சி.ஆர். ஜோன் - ஊளுஊ செல்வி கே யோகேஸ்வரி - ஐளுனு என்டன் - ஊளுஊ, கருனாகரன் - Pசுநுனுழு திருமதி விஜயலெட்சுமி ஜோசப் - யுளுஊனுழு மற்றும் பெருந்தோட்டத்துறை சமூக மாமன்றத்தின் நிகழ்ச்சித்திட்ட உத்தியோகத்தர் இரா. சந்திரமோகன் என்போர் பங்குப்பற்றினர்.
மேலும் இதேப்போன்றதொரு சந்திப்பும் மகஜர் கையளிப்பும் மே மாதம் 27 ஆம் திகதி கண்டி மாவட்டச் செயலாளருக்கு கண்டி சமூக அபிவிருத்தி நிறுவகத்தின் தலைவர் திரு பெ. முத்துலிங்கம் மற்றும் பிரிடோ நிறுவனத்தின் தலைவர் மைக்கல் ஆர் ஜேர்க்கிம் தலைமையில் நடைபெற்றதோடு,
பெருந்தோட்டத்துறை சமூக மாமன்றத்தின் இணைப்பாளரும் அகில இலங்கை ஐக்கிய தொழிலாளர் காங்கிரசின் பொதுச்செயலாளருமான எஸ் முருகையா தலைமையில் 21.06.2011 ஆந் திகதி பஸ்பாகே கோரளை பிரதேச செயலாளருக்கும் கையளிக்கப்படுள்ளமை குறிப்பிடத்தக்க அம்சமாகும்.

ஹற்றன் ஹைலன்ட்ஸ் கல்லூரியின் நிறுவகர் தினமும் பரிசளிப்பு விழாவும்

சோ.ஸ்ரீதரன்
இலங்கைத்திரு நாட்டில் மணி மகுடமென விளங்கும் ஹற்றன் ஹைலன்ட்ஸ் கல்லூரி மழலயகத்தமிழ்க் கல்வித்துறையில் வீறு நடைபோட்டு 121 ஆவது மைல் கல்லில் தடம் பதித்துள்ளது. ஒவ்வொரு வருடமும் ஜீன் மாதம் 29 இந்தக்கல்லூரியின் ஸ்தாபகர் தினம் பெருமையுடன் நினைவு கூரப்பட்டு வருகின்றது. இதற்கேற்ப இவ்வருடத்திற்கான கல்லூரியின் நிருவகர் தினமும் அதனோடு ஒட்டிய பரிசளிப்பு விழாவும் கடந்த மாதம் 29 ஆம் திகதி ஹற்றன் D.K.W கலாசார மண்டபத்தில் அதிபர். எஸ். விஜயசிங் தலைமையில் மிகச்சிறப்பாக இடம் பெற்றது.









இவ் விழாவிற்கு பிரதம அதிதியாக முன்னைய நாள் பீடாதிபதியும், கொழும்பு பல்கலைக்கழகத்தின் விரிவுரையாளருமான சோ. சந்திரசேகரன்;, சிறப்பு அதிதியாக ஹைலன்ட்ஸ் கல்லூரியில் இருந்து வைத்திய பீடத்திற்குத் தெரிவாகிய, முதல் மாணவியான, வைத்திய காலநிதி வாசுகி குருசாமி வருகை தந்து சிறப்பித்தனர்;. மிகக் குறுகிய கால, செல் நெறியில் பெருந்தோட்ட பாடசாலைகளின் கௌரவத்தை நிலை நிறுத்தும் பெறுமதி மிக்க உயர் பீடமாக இக் கல்லூரி திகழ்கிறது. 'வலியது வாழும்' என்னும் வாய்மொழிக்கேற்ப பல்வேறு சவால்களுக்கும் மத்தியில் சாதனைக்களமாக மாறியுள்ளது. தேசிய நிலையிலான பெறுபேறுகள் பெரும்பாலான பாடசாலைகளில் கவலை தரக் கூடிய வகையில் அமையும் அதேவேளை ஹைலன்ட்ஸ் கல்லூரி, கடந்த தசாப்தங்களில் வியக்கத்தக்க வகையில் பெறுபேறுகளைப் பெற்றிருப்பது பெருமைக்குரியது.
ஹைலன்ட்ஸ் கல்லூரியின் சாதனைப் பட்டியல் வரிசையில் புலமைப்பரிசில் பரீட்சைப் பெறுபேறு குறிப்பிடத்தக்கது. கடந்த வருடம் பரீட்சைக்குத் தோற்றிய 113 மாணவர்களுள் 140 என்ற வெட்டுப்புள்ளிக்கு மேல் பெற்று 33 மாணவர்கள் சித்திபெற்றனர். 66 மாணவர்கள் 100 புள்ளிகளுக்கு மேல் பெற்ற அதேவேளை அனைத்து மாணவர்களும் 70 புள்ளிகளுக்கு மேல் பெற்று கல்லூரியின் தரத்தை நிலைநிறுத்தினர்.
செல்வன். S. கவினாஸ் 175 புள்ளிகள், செல்வன். C. தனுஷன் 174 புள்ளிகள், செல்வி. R. பவாஷினி 172 புள்ளிகள் என்ற அடிப்படையில் பெற்று 06, 11, 14 என்ற மாவட்ட நிலைகளையும் தட்டிச் சென்றனர். இம் மாணவர்களின் முன்னேற்றத்துக்கு தம்மை அர்ப்பணித்த அதிபர், ஆசிரியர்கள், பெற்றோர்கள் பாராட்டுக்குரியவர்கள். க.பொ.த சாதாரண தரப் பரீட்சைப் பெறுபேறுகள் கடந்த காலங்களை விட மனநிறைவைத் தரும் வகையில் அமைந்துள்ளன. 164 மாணவர்கள் பரீட்சைக்குத் தோற்றினர். அவர்களுள் 155 மாணவர்கள் 6 பாடங்களுக்கு மேல் சித்தி பெற்றுள்ளனர். 143 மாணவர்கள் க.பொ.த உயர்தரத்திற்குத் தகுதி பெற்றுள்ளனர். அத்தோடு அதி விஷேட சித்தியான 9யு சித்தியை 05 மாணவர்கள் பெற்றுள்ளனர். செல்வன். R. டிலச்ஷன், செல்வன். M. கௌசிக், செல்வன். R. திலக்சான், செல்வி. J. சிந்துஷா, செல்வி. J. லக்சாலினி ஆகியோர் அச் சிறப்பிற்குரியவர்கள். அதி உயர் புள்ளிகளைப் பெற்ற மாணவர்களுள் ஒருவராக செல்வன்.R டிலக்ஷன் ஜனாதிபதி விருதைப் பெறுவதற்கு ஹைலன்ட்ஸ் கல்லூரியிலிருந்து தெரிவு செய்யப்பட்ட ஒரு தமிழ் மாணவன் என்பது பெருமைக்குரிய விடயம்.

ஹக்கலை தாவரத்தோட்டம்

சோ.ஸ்ரீதரன் -
இலங்கையின் இயற்கையின் அழகினைக் கண்டு களிப்பதற்கு மலையகப்பகுதிளை நாடி வருகின்றவர்களின் எண்ணிக்கை நாளுக்கு நாள் அதிகரித்து வருகின்றது.நாட்டில் தற்போது ஏற்பட்டுள்ள சுமுகமான நிலையைத் தொடர்ந்து உள்நாட்டு மற்றம் வெளிநாட்டு உல்லாச பயணிகளின் வருகையும் மலையகப்பகுதிகளில் தற்போது அதிகரித்துள்ளது. குறிப்பாக மலையகத்திலுள்ள வரலாற்று முக்கியத்துவமுள்ள இடங்களையும் இயற்கைக்கு எழிலூட்டும் இடங்களையும் பார்த்து ரசிப்பதில் மிகவும் ஆர்வம் செலுத்துகின்றனர். இந்த நிலையில் எமது சூழலில் உள்ள இந்த இடங்களின் முக்கியத்துவத்தினை அறிந்து நாமும் கண்டு களிக்கும் சந்தர்ப்பத்தினை இழந்து விடக்கூடாது.
அந்த வகையில் நுவரெலியா மாவட்டத்திலுள்ள
ஹக்கலை தாவரத்தோட்டம் பற்றிய தகவல்களை தெரிந்து கொள்வோம். 1860 ஆம் ஆண்டு ஏற்படுத்தப்பட்ட இந்தத்தாவரப் பூங்கா நுவரெலியா நகரிலிருந்து வெலிமடைக்குச்செல்லும் பிரதான பாதையின் 9.6 கிலோ மீற்றர் தூரத்திலுள்ளது. இந்தத்தாவரத ;தோட்டத்தின் விஸ்தீரணம் 27.2 ஹெக்டயர் ஆகும். கடல் மட்டத்திலிருந்து 1670 மீற்றர் உயரமுள்ள இந்தத்தாவரத் தோட்டத்தில் உள்ள ஹக்கலை குன்றின் உயரம் 2000 மீற்றராகும்.









இங்கு பல வகையான பூக்கள் என்றும் பூத்துக்குலுங்கும் அழகோ கொள்ளை அழகு. அத்துடன் றோசாத்தோட்டம் ,குன்றுத்தோட்டம் ,பன்னத்தோட்டம் ,ஜப்பான் தோட்டம் ,நாற்றுமேடை ,பூஞ்செடி விற்பனை நிலையம் ,சுற்றுலா விடுதி உட்பட பல்வேறு அம்சங்கள் உள்ளன.
பொழுதைப்பயனுள்ள முறையில் களிப்பதற்கு ஹக்கலை தாவரவியல் தோட்டத்திற்கு விஜயம் செய்யுங்கள்.

நுவரெலியா மாவட்டம் டிக்கோயா கிளங்கன் வைத்தியசாலை இந்திய அரசாங்கத்தின் உதவியால் தரமுயர்த்தும் பணிகள் ஆரம்பம்

சோ.ஸ்ரீதரன் -

மஸ்கெலியா தேர்தல் தொகுதியைச் சேர்ந்த மக்களின் நீண்டகால எதிர்பார்ப்பொன்று தற்போது நிறைவேறுவதற்கான காலமொன்று மலர்ந்துள்ளது. ஆம். அட்டன் ,டிக்கோயா ,நோர்வூட் ,பொகவந்தலாவை ,மஸ்கெலியா பிரதேசங்களில் வாழுகின்ற ஆயிரக்கணக்கான மக்களின் வைத்திய சேவையினை தாம் வாழும் சூழலிலேயே பெற்றுக்கொள்ளக்கூடிய சந்தர்ப்பம் ஒன்று தற்போது ஏற்பட்டுள்ளது. மேற்படி பிரதேச மக்கள் எதிர்நோக்கி வந்த வைத்திய சேவை தொடர்பான பிரச்சினைகள் குறித்து மலையகத்தமிழ் அரசியல்வாதிகளாலும் சமூக ஆர்வலர்களாலும் ஊடகவியலாளர்களாலும் பலமுறை சுட்டிக்காட்டப்பட்டதன் பயனாக இந்திய அரசாங்கத்தின் நன்கொடையின் மூலமாக டிக்கோயா கிளங்கன் மாவட்ட வைத்தியசாலை தரமுயர்த்தப்படுவதற்கான வாய்ப்பு தற்போது ஏற்பட்டுள்ளது. இந்த அடிப்படையில் இந்த வைத்தியசாலையின் தரமுயர்த்தலின் முதற்கட்டமாக 150 படுக்கை அறைகள் கொண்ட மாடிக்கட்டிடத்தொகுதி ஒன்று இந்திய அரசாங்கத்தின் 120 கோடி ரூபா செலவில் நிர்மாணிக்கப்படவுள்ளது. 2013 ஆம் ஆண்டு பூர்த்தியடையவுள்ள இந்த நிர்மாணப்பணிக்கான அடிக்கல் நாட்டும் நிகழ்வு 4 ஆம் திகதி டிக்கோயா கிளங்கன் வைத்தியசாலையின் வளாகத்தில் இடம் பெற்றது.

அமைச்சர் ஆறுமுகன் தொண்டான் தலைமையில் இடம் பெற்ற இந்த நிகழ்வில் இலங்கைக்கான இந்திய தூதுவர் அசோக் கே .காந்தா உட்பட அமைச்சர்களான மைத்திரிபால சிறிசேன நவீன் திசாநாயக்க ,மத்திய மாகாண ஆளுநர் டிக்கிரி கொப்பேகடுவ ,மத்தியமாகாண முதலமைச்சர் சரத்ஏக்கநாயக்க ,பிரதியமைச்சர் முத்துசிவலிங்கம் ,மத்திய மாகாண அமைச்சர்களான சுனில்அமரதுங்க ,திருமதி அனுஷியா சிவராஜா உட்பட பலர் கலந்து கொண்டனர்.

இந்த நிகழ்வில் இலங்கைக்கான இந்திய தூதுவர் அசோக் கே .காந்தா பேசுகையில் :
இந்திய அரசாங்கத்தின் உதவியால் இந்த வைத்தியசாலை தரமுயர்த்தப்பட வேண்டும் என்பது அமரர் சௌமியமூர்த்தி தொண்டமானின் கனவாக இருந்தது. அந்தக்கனவு நனவாகும் காலம் தற்போது கனிந்துள்ளது. இந்த வைத்தியசாலை தரமுயர்த்தப்படுவதால் பிரதேச மக்கள் பல்வேறு நன்மைகளை பெறவுள்ளனர். இந்திய அரசாங்கம் மலையக மக்களின் நலன்கருதி கல்வி ,போக்குவரத்து போன்ற துறைகளுக்கு உதவி நல்கி வருகின்றது. அத்துடன் பெருந்தோட்டப்பகுதிகளில் நான்காயிரம் வீடுகளை அமைக்கும் திட்டமொன்றினையும் அமுல்படுத்தப்படவுள்ளது என்றார்.

இந்த நிகழ்வில் கலந்து கொண்ட சுகாதார அமைச்சர் மைத்திரிபால சிறிசேன பேசுகையில் : டிக்கோயா கிளங்கன் வைத்தியசாலைக்கு 150 படுக்கையறைகள் கொண்ட கட்டிடத்தொகுதி ஒன்றினை அமைப்பதற்காக இந்திய அரசாங்கம் 120 கோடி ரூபாவை நன்கொடையாக வழங்கியமைக்கு இலங்கை அரசாங்கத்தின் சார்பாக இந்திய அரசாங்கத்துக்கு எனது நன்றியைத் தெரிவித்துக்கொள்கின்றேன். இந்திய அரசாங்கம் எமது நாட்டுக்குப்பல்வேறு வகையில் உதவி செய்கின்றது. குறிப்பாக பாதுகாப்பு ,சுகாதாரம் ,பொருளாதார உதவிகளை வழங்குவதில் எமது நட்பு நாடாக இந்தியா திகழுகின்றது. இவ்வாறானதொரு நிலையில் எமது அரசாங்கம் இலவச சுகாதார வைத்திய சேவைக்குப் பாரிய நிதியினை வருடாந்தம் செலவழிக்கின்றது. வருடாந்தம் இலவச மருந்துப்பொருட்களுக்கு மாத்திரம் அரசாங்கம்; 12 பில்லியன் ரூபாவை செலவழித்து வந்தது. இந்த நிலையில் நாட்டிலுள்ள வைத்தியசாலைகளின் வெளிநோயாளர் பிரிவின் காலம் பிற்பகல் 4 மணியிலிருந்து இரவு 8 மணிவரை நீடிக்கப்பட்டுள்ளதால் இலவச மருந்துப் பொருட்களுக்காக வருடாந்தம் 16 பில்லியன் ரூபாவை செலவழிக்க வேண்டிய தேவை தற்போது அரசாங்கத்திற்கு ஏற்பட்டுள்ளது.இவ்வாறு பாரிய நிதியினை அரசாங்கம் செலவிடுவதற்கு நாட்டு மக்கள் ஆரோக்கியமாக வாழவேண்டும் என்பதற்காகும்.எனினும் நீரிழிவு உட்பட பல்வேறு நோய்கள் காரணமாக எமது நாட்டில் நாளொன்றுக்கு சுமார் 300 தொடக்கம் 350 பேர் மரணிக்கின்றனர். மதுபானம் , புகைத்தல் என்பனவற்றுக்கு அடிமையானவர்களின் எண்ணிக்கை அதிகரித்து வருவதால் இவர்களினதும் இவர்களைத் தங்கி வாழுகின்றவர்களும் பல்வேறு பாதிப்புக்கு உள்ளாக வேண்டிய நிலைமை ஏற்பட்டுள்ளது. ஆகவே மதுபானம் ,புகைத்தல் என்பனவற்றால் பாதிக்கப்பட்டவர்கள் அவற்றிலிருந்து விடுபட்டு ஆரோக்கியமாக வாழுகின்ற நிலைமை ஏற்பட வேண்டும். இந்த நிலையில் எமது நாட்டு மக்களின் போஷனை தொடர்பில் நாம் முக்கிய கவனம் செலுத்தி வருகின்றோம். நுவரெலியா மாவட்டத்திலேயே போஷனைக்குறைப்பாடு அதிகமாகவுள்ளது. இந்தப்போஷனைக்குறைப்பாட்டினை நிவர்த்தி செய்வதற்காக தேசிய போஷனை சபையின் மூலமாக விழிப்புணர்வு திட்டங்களை முன்னெடுத்து வருகின்றோம். இந்தத்திட்டத்தினை நாம் நுவரெலியா மாவட்டத்தில் ஆரம்பித்துள்ளோம்.இதற்கு அனைவரும் ஒத்துழைப்பு வழங்க வேண்டும். இதே வேளை நுவரெலியா மாவட்ட மக்கள் தமது போஷனைத் தேவையினைப் பூர்த்தி செய்து கொள்ளும் வகையில் காலநிலைக்கேற்ப விவசாயப்பயிர்ச்செய்கையில் ஈடுபடுவதற்கு முன்வரவேண்டும். தோட்டப்பகுதி மக்களின் சுகாதார வைத்திய சேவையை மேலும் விஸ்தரிப்பதற்காக 52 தோட்ட வைத்தியசாலைகளை எமது அமைச்சின் கீழ் பொறுப்பெடுத்துள்ளோம். இந்த வைத்தியசாலைகளின் அடிப்படைத்தேவைகள் குறைப்பாடுகளை விரைவில் நிவர்த்தி செய்வோம். அமைச்சர் ஆறுமுகன் தொண்டமான் எனது கவனத்திற்கு கொண்டு வந்ததுக்கேற்ப மஸ்கெலியா மாவட்ட வைத்தியசாலையை தரமுயர்த்தவுள்ளோம் என்றார்.

தொழிலாளர் தேசிய சங்கத்தின் ஊடாக அரசாங்கத்தின் அபிவிருத்தித்திட்டங்கள் தோட்டப்பகுதிகளில் ஆரம்பம்

- சோ.ஸ்ரீதரன். -
ஜனாதிபதியின் மகிந்த சிந்தனைத்திட்டத்தின் கீழ் பாராளுமன்ற உறுப்பினர் பி.திகாம்பரத்தின் வேண்டுகோளுக்கிணங்க ஜனாதிபதி மகிந்த ராஜபக்ஷ வழங்கியுள்ள 500 இலட்சம் ரூபா நிதியொதுக்கீட்டில் நுவரெலியா மாவட்டத்திலுள்ள 50 தோட்டப்பாதைகளை அபிவிருத்திச் செய்யும் திட்டத்தின் அங்குராரப்பண நிகழ்வு கடந்த 3 ஆம் திகதி டிக்கோயா தோட்டத்தில் இடம் பெற்றது. இந்தத்திட்டத்தின் கீழ் அம்பகமுவ பிரதேச செயலகத்துக்கு உட்பட்ட பகுதிகளிலுள்ள 20 தோட்டங்களிலும் நுவரெலியா பிரதேச செயலகத்துக்கு உட்பட்ட 20 தோட்டங்களிலும்கொத்மலை மற்றும் வலப்பனை பிரதேச செயலகப்பிரிவுக்கு உட்பட்ட தோட்டப்பகுதிகளில் தலா 5 பாதைகளும் செப்பனிடப்படவுள்ளன. அரசாங்கத்தின் நேரடி வேலைத்திட்டமொன்று தொழிலாளர் தேசிய சங்கத்தின் ஊடாக முதன் முறையாக முன்னெடுப்பதற்கான வாய்ப்பொன்றைத் தொழிலாளர் தேசிய சங்கத்தின் தலைவரும் நுவரெலியா மாவட்ட பாராளுமன்ற உறுப்பினருமான பி.திகாம்பரம் தொழிலாளர் தேசிய சங்கத்திற்கு ஏற்படுத்திக்கொடுத்துள்ளமையைக் குறிப்பிடத்தக்க விடயமாகும்.
தொழிலாளர் தேசிய சங்கத்தின் தலைவரும் நுவரெலியா மாவட்ட பாராளுமன்ற உறுப்பினருமான பி.திகாம்பரம் தொழிலாளர் தேசிய சங்கத்தின் பிரதித்தலைவரும் மத்திய மாகாணசபை உறுப்பினருமான எம்.உதயகுமார் ,இந்தச்சங்கத்தின் சிரேஷ்ட தொழிலுறவு நிருவாக ஆலோசகரும் மத்திய மாகாணசபை உறுப்பினருமான சிங்பொன்னையா ,தொழிலாளர் தேசிய சங்கத்தின் பொதுச்செயலாளர் எஸ்.பிலிப் உட்பட பலர் கலந்து கொண்ட மேற்படி அங்குரார்ப்பண நிகழ்வில் பிரதம அதிதியாக கலந்து கொண்ட
பிரதியமைச்சர் நிர்மல கொத்தலாவெல உரையாற்றுகையில் :
மலையகத்தில் ஜனாதிபதியின் அபிவிருத்தித்திட்டங்களை முன்னெடுக்கக் கூடிய சக்தி மிக்க தலைவராக தொழிலாளர் தேசிய சங்கத்தின் தலைவரும் நுவரெலியா மாவட்ட பாராளுமன்ற உறுப்பினருமான பி.திகாம்பரம் திகழுகின்றார். மலையகத்தமிழ் மக்கள் மத்தியில் மக்கள் செல்வாக்கு உள்ள இளம் தலைவராக திகாரம்பரம் செயற்பட்டுக் கொண்டிருக்கின்றார். தனக்கு வாக்களித்த மக்களுக்கு நேர்மையாக சேவை செய்ய வேண்டும் என்பதில் உறுதியாக இருக்கின்றார். அந்த அடிப்படையில் எமது ஜனாதிபதியுடன் தொடர்பு கொண்டதன் பேரில் 50 தோட்டப்பாதைகளை அபிவிருத்தி செய்வதற்கான நிதியினை எமது அமைச்சின் ஊடாகப் பெற்றுக் கொண்டுள்ளார். ஜனாதிபதியின் அபிவிருத்தி வேலைத் திட்டங்களுக்கும் அவருக்கு ஆதரவு தெரிவிப்பதிலும் திகாம்பரம் முன்னின்று செயற்பட்டு வருகின்றார். இந்த நிலையில் இந்த நாட்டில் வாழுகின்ற சகல இனமக்களுக்கும் எவ்வித பாரபட்சமுமின்றி எமது நாட்டு ஜனாதிபதி சேவையாற்றி வருகின்றார். நாட்டு மக்களின் இன்றைய மற்றும் எதிர்கால நலன் கருதி பாரிய அபவிருத்தி திட்டங்களை முன்னெடுத்து வருகின்றார். திகாம்பரத்தின் வேண்டுகோளுக்கிணங்க மலையகத்தில் மேலும் பல அபவிருத்தித்திட்டங்களை முன்னெடுப்பதற்கான நிலைமை ஏற்பட்டுள்ளது என்பதை இங்கு கூறிக்கொள்வதில் பெருமகிழ்ச்சியடைகின்றேன் என்றார்.
இந்த நிகழ்வில் கலந்து கொண்ட தொழிலாளர் தேசிய சங்கத்தின் தலைவரும் நுவரெலியா மாவட்ட பாராளுமன்ற உறுப்பினருமான பி.திகாம்பரம் பேசுகையில் : மலையகத்தமிழ் மக்களுக்கும் பாரபட்சமின்றி அபிவிருத்தித்திட்டங்களை முன்னெடுக்கின்ற இன்றைய அரசாங்கத்தக்கும் ஜனாதிபதி மகிந்த ராஜபக்ஷவுக்கும் மலையகத்தமிழ் மக்கள் நன்றியுள்ளவர்களாக செயற்படவேண்டும் . ஜனாதிபதி மகிந்த ராஜபக்ஷவின் அரசாங்கத்தின் ஊடாக மலையகப்பகுதிகளில் பல்வேறு அபிவிருத்தித்திட்டங்கள் முன்னெடுக்கப்பட்டு வருகின்றன. அந்த அடிப்படையில் நான் ஜனாதிபதியிடம் முன்வைத்த வேண்டுகோளுக்கிணங்க தோட்டப்பாதைகளை அபிவிருத்தி செய்வதற்கு பெருந்தெருக்கள் அமைச்சின் ஊடாக 500 இலட்சம் ரூபாவை ஒதுக்கீடு செய்துள்ளார். அதற்காக மலையகத்தமிழ் மக்கள் சார்பாக எனது நன்றியினைத் தெரிவித்துக்கொள்கின்றேன். இந்தப்பாதை அபிவிருத்தித்திட்டத்தினை எதிர்வரும் மூன்று மாத காலப்பகுதிக்குள் நிறைவு செய்து மேலும் பல அபிவிருத்தித்திட்டங்களை அரசாங்கத்தின் ஊடாக மேற்கொள்வதற்கு தயாராகவுள்ளேன். ஆகவே நாம் இந்த அரசாங்கத்திற்கும் ஜனாதிபதி மகிந்தராஜபக்ஷவுக்கும் நன்றியுள்ளவர்களாக இருக்க வேண்டும். இன்றைய இந்த அங்குரார்ப்பண நிகழ்வுக்கு எனது அழைப்பினை ஏற்று வந்த பெருந்தெருக்கள் பிரதியமைச்சர் நிர்மல கொத்தலாவெலவுக்கும் சிலர் எதிரப்பு காட்ட முயன்றதாக கேள்விப்பட்டேன் . மலையகத்தமிழ் மக்களுக்குச்சேவை செய்ய முனைகின்றவர்களைத் தடுப்பதற்கு எவருக்கம் அருகதை கிடையாது. மக்கள் செல்வாக்குடன் களத்தில் இருப்பதால் நாம் எவருக்கம் அஞ்சப்போவதில்லை. கடந்த பொதுத்தேர்தலி;ல் தோட்டப்பகுதி மக்கள் எனக்கு பெருவாரியாக வாக்களித்து வெற்றிப்பெறச் செய்தார்கள் அந்த அடிப்படையிலேயே தோட்டப்பகுதிகளில் அபிவிருத்தித்திட்டங்களை முன்னெடுத்து வருகின்றேன். இதே வேளை மலையகத்தமிழ் மக்கள் ஐக்கிய தேசிய கட்சிக்கு வாக்களித்த போதும் அந்தக்கட்சியினால் மலையகப்பெருந்தோட்ட மக்களுக்கு குறிப்பிட்டுச் சொல்லக்கூடிய எவ்விதமான நன்மையும் இதுவரை கிடைக்கவில்லை.ஆனால் இன்றைய அரசாங்கத்தின் மூலமாக இந்த மக்களுக்குப்பல்வேறு நன்மைகள் கிடைத்து வருகின்றன. தோட்டத்தொழிலாளர்களின் சம்பள விடயத்தில் கூட ஐக்கிய தேசிய கட்சி தொடர்ந்து தோட்டத்தொழிலாளர்களுக்குத் துரோகம் விளைவித்து வருகின்றது என்பதை மக்கள் புரிந்து கொள்ள வேண்டும் என்றார்.
இந்த நிகழ்வில் கலந்து கொண்ட தொழிலாளர் தேசிய சங்கத்தின் பிரதித்தலைவரும் மத்திய மாகாணசபை உறுப்பினருமான எம். உதயகுமார் பேசுகையில் கூறியதாவது : பெருந்தோட்டப்பகுதிகளுக்கான அரசாங்கத்தின் அபிவிருத்தித்திட்டங்களைத் தொழிலாளர் தேசிய சங்கத்தின் ஊடாகவும் மேற்கொள்வதற்கான சந்தர்ப்பம் தற்போது ஏற்பட்டுள்ளது.
எமது தலைவர் திகாம்பரம் ஜனாதிபதியிடம் முன்வைத்த வேண்டுகோளுக்கிணங்க பெருந்தெருக்கள் அபிவிருத்தி அமைச்சு மூலமாக 50 தோட்டப்பாதைகளை செப்பனிடுவதற்கான சந்தர்ப்பம் எமக்குக் கிடைத்துள்ளது. தோட்டப்பகுதி மக்களின் உட்கட்டமைப்பு வசதிகளின் ஒன்றான பாதைகள் அபிவிருத்தி செய்யப்படுகின்ற போது தான் அவர்களின் அன்றாட போக்குவரத்துக்களைச் சிரமமின்றி மேற்கொள்ளக்கூடியதாக இருக்கும் .அந்த அடிப்படையிலேயே முதற்கட்டமாக 50 தோட்டப்பாதைகளை அபிவிருத்தி செய்வதற்கான சந்தர்ப்பம் எமக்குக்கிடைத்துள்ளது. இந்தப்பாதைகளை அபிவிருத்தி செய்வதற்கான அங்குரார்ப்பண நிகழ்வில் பெருந்தெருக்கள் பிரதியமைச்சர் நிர்மல கொத்தலாவெல கலந்து கொண்டிருப்பது எமக்கு இரட்டிப்பு மகிழச்சியை ஏற்படுத்தியுள்ளது. இவ்வாறு அரசாங்கத்தின் அபிவிருத்தித்திட்டங்களை முன்னெடுக்கின்ற அதேவேளை
எமக்க ஒதுக்கப்படுகின்ற பன்முகப்படுத்தப்பட்ட நிதியொதுக்கீட்டின் மூலமாகவும் தோட்டப்பகுதி மக்களின் தேவைக்கருதி சிறு அபிவிருத்தித்திட்டங்களையும் முன்னெடுத்து வருகின்றோம். குறிப்பாக தோட்டப்பகுதிகளில் குடிநீர்விநியோகக்கட்டமைப்பு ,மின்சாரம் வழங்கல் போன்றனவற்றை செய்து கொடுப்பதிலும் கரிசனையுடன் செயற்பட்டு வருகின்றோம் என்றார்.