தோட்ட எம்புலன்ஸில் டீசலும் ஏற்றப்படுகின்றது : நோயாளிகள் திண்டாட்டம்

தோட்டத்தொழிலாளர்களின் நலன் கருதி தோட்ட நிருவாகங்களுக்கு வழங்கப்படுகின்ற வளங்கள் பல தோட்ட நிருவாகங்களால் துஷ்பிரயோகம் செய்யப்படுவது குறித்து பரவலாக குற்றம் சாட்டப்படுகின்றது. குறிப்பாக பெருந்தோட்ட மனதவள அபிவிருத்தி நிறுவனத்தின் ஊடாக தோட்டப்பகுதி மக்களின் சுகாதார வைத்திய நலன் கருதி வழங்கப்படுகின்ற எம்புலன்ஸ் வாகனங்கள் தோட்டப்பகுதி நோயாளிகளை காவிச்செல்வதை விட தோட்ட நிருவாகிகளின் தனிப்பட்ட தேவைகளுக்குப்பயன் படுத்தப்பட்டு வருவதாக தோட்டத்தொழிலாளர்கள் கடந்த காலங்களில் சுட்டிக்காட்டியுள்ளனர். எனினும் இதற்கான ஆதாரங்களை இவர்களால் சமர்ப்பிக்கப்படுகின்ற போதும் அவை அதிகார தரப்பினர் முன்னிலையில் எடுபடுவதில்லை. எனினும் கடந்த 22 திகதி அட்டன் நகர மத்தியிலுள்ள எரிபொருள் நிரப்பு நிலையத்தில் நிறுத்தி வைக்கப்பட்டிருந்த வட்டவளை பெருந்தோட்டக்கம்பனிக்கு உட்பட்ட ரொசலை விக்டன் தோட்ட எம்புலன்ஸ் வாகனத்தில் பீப்பாய்கள் மூலம் டிசல் மற்றும் பெற்றோல் நிரப்பப்படுவதை பார்த்த போது பெரும் அதிர்ச்சிக்கு உள்ளாக வேண்டிய நிலைமை ஏற்பட்டது. நோயாளிகளை மிகவும் அவதானமாகவும் சுகாதாரத்துடனும் காவிச்செல்லக்கூடிய எம்புலன்ஸ் வாகனத்தினுள் இரண்டு பீப்பாய்கள் வைக்கப்பட்டு அதனுள் எரிபொருள் நிலையத்தின் டீசல் நிரப்பு குழாய் மூலமாக டீசல் நிரப்பப்பட்டது.அத்துடன் சிறிய கொல்கலன்களில் பெற்றோல் நிரப்பப்பட்டு அந்தக்கொள்கலன்களும் அந்த எம்புலன்ஸ் வாகனத்தில் ஏற்றப்பட்டன. இந்தக்காட்சியை படம் பிடித்துக்கொண்டிருந்த போது கூடியிருந்த மக்களுக்கு அப்போதுதான் நிலைமை புரிந்தது.இதுவரைக்காலமும் இவ்வாறு எத்தனை தோட்டங்களில் எம்புலன்ஸ் வாகனங்களில் எரிபொருள் மற்றும் சிலின்டர்களும் ,ஏனைய பொருட்களும் ஏற்றப்பட்டிப்பதை அவதானித்திருப்போம். ஆனால் எங்களால் எந்தவிதமான நடவடிக்கையும் எடுக்க முடியவில்லை.ஆனால் தற்போதைய இந்த விடயம் ஊடகங்களின் மூலம் வெளிவரும் என்று கூடியிருந்த மக்கள் என்னிடம் தெரிவித்தனர். இந்த நிலையில் டீசல் நிரப்பப்பட்ட மணத்துடன் அந்த எம்புலன்ஸ் வாகனத்தில் அவசர நோயாளிகளைக்காவிச்செல்ல வேண்டிய நிலைமை ஏற்படும் போது அந்த நோயாளிகளுக்கு ஏற்படக் கூடிய பாதிப்புக்களையும் நாம் நினைத்துப்பார்க்க வேண்டிய நிலைமை ஏற்பட்டுள்ளது. பெருந்தோட்டக்கம்பனிக்கு உட்பட்ட தோட்டப்பகுதிகளின் சுகாதார நலனோம்பு விடயங்களைப் பொறுப்பெடுத்துள்ள பெருந்தோட்ட மனித வள நிறுவனத்தின் ஆலோசனைகள் தோட்ட நிருவாகங்களினால் எவ்விதம் பின்பற்றப்படுகின்றன.இவ்வாறான நடவடிக்கைளால் தெரிலாளர்களின் நலன்கள் எவ்வாறு பாதிக்கப்படுகின்றன என்பது குறித்துப் பொறுப்பு வாய்ந்த தரப்புக்கள் இந்த ஆதரத்துடனான தகவலைக்கொண்டு உரிய நடவடிக்கை எடுக்க வேண்டும்.

ஹட்டன் வெளிஓயா தோட்டத்தொழிலாளர்களின் பணிநிறுத்தப்போராட்டம் சத்தியாக்கிரகப் போராட்டமாக மாற்றமடைந்துள்ளது.

தோட்ட முகாமையாளரை வெளியேற்றக்கோரி வெளிஓயா தோட்டப்பிரிவுகளைச்சேர்ந்த தோட்டத்தொழிலாளர்கள் சத்தியாக்கிரகப்போராட்டமொன்றில் இன்று 22 ஆம் திகதி ஈடுபட்டனர்.வெளிஓயா தோட்டத்தின் தேயிலைத்தொழிற்சாலைக்கு அருகிலுள்ள கோவில் முற்றத்திலும் தோட்ட அலுவலகத்துக்கு அருகிலும் பெண்தொழிலாளர்கள் உட்பட ஆண்தொழிலாளர்களும் ஏனையவர்களும் அமர்ந்திருந்து இந்தப்போராட்டத்தில் ஈடுபட்டனர். இவர்களின் போராட்டம் காரணமாக தோட்ட அலுவலகத்தின் பணியாளர்கள் பீதி நிலைக்கு உள்ளாகினர். இந்த நிலையில் சத்தியாக்கிரகத்தில் ஈடுபட்டுள்ள தொழிலாளர்கள் அட்டன் நகர் நோக்கி ஊர்வலமாக வரக்கூடும் எனக்கருதி அட்டன் பொலிஸார் அட்டன் - கனிகத்தேனை பிரதான பாதையில் செனன் சந்திக்கருகில் கூடியிருந்ததை அவதானிக்கக் கூடியதாக இருந்தது.
தோட்டத்தொழிலாளர்களை அச்சுறுத்தும் வகையில் நடந்து கொண்ட அட்டன் வெளிஓயா தோட்ட முகாமையாளரை இடமாற்றக்கோரி இந்தத் தோட்டத்தைச்சேர்ந்த 1097 தொழிலாளர்கள் கடந்த 13 ஆம் திகதி முதல் பணிநிறுத்தத்தில் ஈடுபட்டு வருகின்றனர்.
அட்டன் வெளிஓயா தோட்டத்தின் மேற்பிரிவு ,கீழ்ப்பிரிவு ,ஆக்ரஓயா ,புதுக்காடு ,தண்டுகலா ஆகிய தோட்டங்களைச் சேர்ந்த தொழிலாளர்களே பணிநிறுத்தத்தில் ஈடுபட்டு வருகின்றனர். வேலைப்பளுவை அதிகரித்துக் கொள்வதற்காக தோட்ட நிருவாகம் இராணுவத்தையும் பொலிஸாரையும் வரவழைத்துத் தம்மை அச்சுறுத்தும் வகையில் நடந்து கொண்ட வெளிஓயா தோட்ட முகாமையாளரை இடமாற்றக்கோரி கடந்த 13 ஆம் திகதி முதல் சுமார் 1000 தொழிலாளர்கள் பணிநிறுத்தப்போராட்டத்தில் ஈடுபட்டு வருகின்றனர். இந்தப்போராட்டம்; தொடர்பாக தொழிலாளர் தேசிய சங்கம் ,மலையக தொழிலாளர் முன்னணி ,இலங்கைத் தொழிலாளர் ஐக்கிய முன்னணி ஆகிய தொழிற்சங்கங்களின் முக்கியஸ்தர்கள் இந்தத் தோட்டங்களுக்கு விஜயம் செய்து தொழிலாளர் பிரதிநிதிகளுடன் கலந்து பேசியுள்ளனர். இந்த நிலையில் வெளிஓயா தோட்டத்தொழிலாளர்களின் இந்தப்போராட்டம் தொடர்பில் வட்டவளை பொதுமுனாமையாளர் ,அட்டன் தொழிற்திணைக்கள அதிகாரி ,தொழிற்சங்கங்கள் சார்பான பிரதிநிதிகள் கலந்து கொண்ட இரு சுற்றுப்பேச்சுவார்த்தைகளும் எவ்வித இணக்கப்பாடுமின்றி முறிவடைந்ததைத் தொடர்ந்து மேலுமொரு பேச்சுவார்த்தை இம் மாதம் 26 ஆம் திகதி இடம் பெறவுள்ளமைக்குறிப்பிடத்தக்கது.

மஹிந்தானந்தவின் தலையீட்டினால் தொழிலாளர் பணிபகிஸ்கரிப்பு கைவிடப்பட்டுள்ளது.

நாவலப்பிட்டி போஹில் , பாராண்டா ஆகிய தோட்டங்களில் 110 ஏக்கர் நிலப்பகுதியை ஜனவசம நிறுவனத்தினால் வெளியாருக்கு வழங்கப்பட்டமைக்கு எதிர்ப்பு தெரிவித்து இந்தத்தோட்டத்தைச் சேர்ந்த தொழிலாளர்கள் கடந்த 8 நாட்களாக மேற்கொண்டு வந்த பணிநிறுத்தப்போராட்டம் அமைச்சர் மஹிந்தானந்த அலுத்கமகேவின் தலையீட்டினால் இன்று 12 ஆம் திகதி முதல் முடிவுக்குக் கொண்டு வரப்பட்டுள்ளது.
மக்கள் பெருந்தோட்ட அபிவிருத்திச் சபையினார் நிருவாக்கிக்கப்படுகின்ற போஹில் , பாரண்டா ஆகிய தோட்டங்களின் தேயிலைப் பயிர்ச்செய்கை நிலங்களை குறிப்பிட்ட சபை தோட்டத்தொழிலாளர்களுக்கு அறிவிக்காமல் வெளியாருக்கு வழங்கியுள்ளதாகவும் இந்த நிலப்பகுதியைப் பெற்றுக்கொண்டவர்கள் தற்போது உரிமைக்கோரி வருகின்றமைக்கு எதிர்ப்பு தெரிவித்து இந்தத்தோட்டங்களைச் சேர்ந்த 300 தொழிலாளர்கள் கடந்த 4 ஆம் திகதி முதல் பணிபகிஸ்கரிப்பில் ஈடுபட்டு வந்தனர். இந்த நிலையில்
மேற்படி தோட்டத் தொழிலாளர்களின் போராட்டம் தொடர்பில் அறிந்து கொள்வதற்காக ஸ்ரீலங்கா சுதந்திர தொழிலாளர் காங்கிரஸின் தலைவரும் விளையாட்டுத்துறை அமைச்சருமான மஹிந்தானந்த அலுத்கமகே இன்று 12 ஆம் திகதி குறிப்பிட்ட தோட்டங்களுக்கு விஜயம் செய்து தோட்ட அதிகாரியுடனும் தொழிலாளர்களிடமும் கலந்துரையாடியதைத் தொடர்ந்தே தொழிலாளர்களின் பணி பகிஷ்கரிப்பு முடிவுக்குக்கொண்டு வரப்பட்டுள்ளது. குறிப்பிட்டத் தோட்டங்களின் விளை நிலங்களை எக்காரணம் கொண்டும் வெளியாருக்க வழங்க முடியாது. இவ்விடயம் தொடர்பாக நான் ஜனவசம தலைவருடன் பேச்சுவார்த்தை நடத்தவுள்ளேன் என்று அமைச்சர் மஹிந்தானந்த அலுத்கமகே தொழிலாளர்களிடம் தெரிவித்ததைத் தொடர்ந்து தொழிலாளர்கள் தமது பணி பகிஸ்கரிப்பைக் கைவிட்டனர்.

தோட்டப்பகுதி அபிவிருத்திக்கு 50 இலட்சம் ரூபா நிதியொதுக்கீடு : பி.திகாம்பரம் எம்.பி தெரிவிப்பு

இவ்வருடத்துக்கான தனது பன்முகப்படுத்தப்பட்ட நிதியிலிருந்து நுவரெலியா மாவட்டத்தில் பல்வேறு அபிவிருத்தித் திட்டங்களுக்கு நிதியொதுக்கீடு செய்யப்பட்டுள்ளதாக தொழிலாளர் தேசிய சங்கத்தின் தலைவரும் நுவரெலியா மாவட்ட பாராளுமன்ற உறுப்பினருமான பி.திகாம்பரம் தெரிவித்தார்.

நுவரெலியா கந்தப்பளை பார்க் தோட்டத்தில் பாதை புனரமைப்புக்கான அடிக்கல் நாட்டு நிகழ்விலும் பார்க் தோட்டத்தில் மைதானப்புனரமைப்புக்கான அடிக்கல் நாட்டு நிகழ்விலும் கலந்து கொண்டு பேசிய போதே இவ்வாறு அவர் தெரிவித்தார்.
தொழிலாளர் தேசிய சங்கத்தின் நுவரெலியா அமைப்பாளரும் நுவரெலியா பிரதேச சபை உறுப்பினருமான அப்துல் அஸீஸ் தலைமையில் இடம் பெற்ற இந்த நிகழ்வில்
தொழிலாளர் தேசிய சங்கத்தின் தேசிய அமைப்பாளர் எஸ்.ஸ்ரீதரன் , தொழிலாளர் தேசிய சங்கத்தின் தொழிலாளர் கல்வி மற்றும் சர்வதேச விவகாரங்களுக்கான செயலாளர் அம்மாசி நல்லுசாமி ,தொழிலாளர் தேசிய சங்கத்தின் உபதலைவரும் நுவரெலியா பிரதேச சபை உறுப்பினருமான பி.சிவானந்தன் , தலவாக்கலை அமைப்பாளர் கிறே , கந்தப்பளை மாவட்டத்தலைவர் உதயசூரியன் , இணைப்பாளர் ரவிச்சந்திரன் உட்பட பலர் கலந்து கொண்டனர். இதே வேளை கந்தப்பளை யங் ஸ்டார் விளையாட்டுக்கழகம் கந்தப்பளை தோட்ட மைதானத்தில் ஏற்பாடு செய்திருந்த கரப்பந்தாட்ட இறுதிச்சுற்றுப்போட்டியில் பங்கு பற்றி வெற்றிப்பெற்றவர்களுக்கான பரிசில்களை வழங்குவதற்கான அனுசரணையையும் பாராளுமன்ற உறுப்பினர் பி.திகாம்பரம் வழங்கியிருந்தார்.
இந்த நிகழ்வில் கலந்து கொண்ட பாராளுமன்ற உறுப்பினர் பி.திகாம்பரம் கருத்துத் தெரிவிக்கையில் :
இவ்வருடம் பொருளாதார அபிவிருத்தி அமைச்சின் ஊடாக எனக்கு ஒதுக்கப்பட்ட 50 இலட்சம் ருபா பன்முகப்படுத்தப்பட்ட நிதியிலிருந்து சமூக மற்றும் பௌதிக செயற்றிட்டங்களுக்கு நிதியொதுக்கீடுகள் மேற்கொள்ளப்பட்டுள்ளன. இந்த வேலைத்திட்டங்களைப் பிரதேச செயலகங்கள் ஊடாக பூர்த்தி செய்வதற்கான நடவடிக்கைகள் தற்போது ஆரம்பிக்கப்பட்டுள்ளன. வேலைத்திட்டங்கள் பூரணப்படுத்தப்பட்டதன் பின்பு வெகு விரைவில் மக்கள் பயன்பாட்டுக்கு வழங்கப்படவுள்ளன. இந்த அடிப்படையில் பார்க் தோட்டத்திலுள்ள முஸ்லிம் பள்ளி வாசலுக்குச்செல்லும் பாதை வெகுவிரைவில் புனரமைக்கப்படவுள்ளமையையிட்டு மகிழ்ச்சியடைகின்றேன்.. அத்துடன் கந்தப்பளை தோட்ட கரப்பந்தாட்ட மைதானத்தினையும் சீரமைப்பதற்கு நடவடிக்கை எடுக்கவுள்ளேன்.

உலக குடியிருப்பாளர் தினமும் மலையக தோட்டத் தொழிலாளரின் குடியிருப்புப் பிரச்சினைகளும்

உலகம் முழுவதும் ஒவ்வொரு வருடமும் அக்டோபர் மாதம் முதலாம் திங்கட்கிழமை உலக குடியிருப்பாளர் தினம் கொண்டாப்பட்டுவருகின்றது. இத்தினமானது 1986 ஆம் ஆண்டு ஐக்கிய நாடுகள் தாபனத்தினால் அங்கீகரிக்ப்பட்டு உலகம் முழுவதும் கொண்டாடப்படுகின்றது. இதன் முதலாவது மாநாடு நைரோபி நகரில் நடைபெற்றது. இதன் தொனிப்பொருளாக 'வாழ்விடம் என்பது எனது உரிமை' (ளூநடவநச ளை அல சுiபாவள) அமைந்திருந்தது. இவ்வருடம் இதற்கான தொனிப்பொருள் 'நகரங்கள் மற்றும் காலநிலை மாற்றம்' அமைந்திருக்கிறது. இவ்வாறான நிலையில் இலங்கையிலும் ஒவ்வொருவருடமும் இத்தினம் அனுஸ்டிக்கப்படுகின்றது. இவ்வாறான பின்புலத்தில் இலங்கையில் வாழும் மக்களும் அவர்களுக்கான குடியிருப்புகளும் பற்றி பேசப்படவேண்டியது காலத்தின் தேவையாக உள்ளது.
இலங்கையின் குடியிருப்புகளை பற்றி பார்க்கவருகின்ற போது இலங்கையில் முக்கியமான குடியிருப்பு வகைகளாக நகரக் குடியிருப்பு, கிராமக் குடியிருப்பு, தோட்டக்குடியிருப்பு என பிரதான வகைப்படுத்தல்களுக்கு உட்பட்டுள்ளன. இதில் முதல் இரு வகையான குடியிருப்புகளும் இலங்கையின் உள்ளூராட்சி நிறுவனக் கட்டமைப்புகளின் கீழும் அதாவது, நகரக் குடியிருப்புகள் நகரசபைகளின் கீழும்;, கிராமக் குடியிருப்புகள் பிரதேசசபைகளின் கீழும் வருகின்றன. பெருந்தோட்டங்களை மையப்படுத்தி சுமார் 200 வருடங்களுக்கு முன்னர் உருவாக்கப்பட்ட குடியிருப்புகளே இலங்கையின் தோட்டக்குடியிருப்புகளின் கீழ் வருகின்றன. இவை முன்னர் நேரடியாக தோட்ட நிருவாகத்தினால் நிருவகிக்கப்பட்டதோடு, தற்போது அது கூட்டுறவு அபிவிருத்தி சங்கத்தின் கட்டுப்பாட்டின் கீழ் இயங்குகின்ற நிலையே காணப்பட்டாலும் தொடர்ந்தும் தோட்ட நிரவாகத்தின் தலையீடுகள் காணப்படுகின்றமை அநேகமாக அண்மைக் காலங்களில் சுட்டிக்காட்டப்படும் விடயமாகவுள்ளது.
ஆரம்பத்தில் குறிப்பட்டது போலவே நகரக் குடியிருப்புகளும், கிராமக் குடியிருப்புகளும் யாரோ ஒரு நபருக்கு செர்ந்தமானவையாக இருக்கின்றன. அதாவது தனிநபர் ஒருவருக்கு சொந்தமானதாக அல்லது கூட்டுடமையாக இருக்கின்றது. அதன் உரிமையினை அவர் அனுபவிக்கக் கூடியநிலை உண்டு. அவர் இதனை அனுவிக்கவும், விற்கவும் உரிமையுடையவராக உள்ளார். இவர்களது காணிக்கான உரித்துப் பத்திரம் முதலியவை அரசாங்கத்தால் பதிவு செய்யப்பட்டு வழஙக்கப்பட்டுள்ளன.
ஆனால், இந்நிலையினை மலையக சமூகத்தோடு ஒப்பீட்டு பார்ப்பின் நிலை தலைகீழாக உள்ளதனை அவதானிக்கலாம். 200 வருடங்களுக்கு மேலாக இந்நாட்டின் பொருளாதாரத்திற்கு அடித்தளமாக இருக்கும் பெருந்தோட்ட தொழிலாளர் சமூகத்தின் நிலை, இன்றும் கேள்விக்குரியானதாகவே உள்ளது. தோட்டங்கள் முன்பு ஆங்கிலேயர் உடைமைகளாகவே காணப்பட்டன. அப்போது ஆங்கிலேயர் இலங்கையில் பயன்படுத்தாத காட்டுப்பகுதிகளை தம்வசப்படுத்திக் கொண்டதோடு மலைநாட்டு சிங்களவர்களது காணிகளை பணம் கொடுத்தே பெற்றுள்ளனர். பெருந்தோட்டத்தொழில் துறை இலாபம் கொழிக்கும் தொழிலாக மாறியபோது பெரும்பான்மை கண்ணை குத்தியது. இதன்போது இந்தியத் தொழிலாளர்கள் தமது வாழ்விடயங்களையும் பொருளாதார நிலவுரிமையையும் பறித்துக்கொண்டதாக எண்ணினர். இது பெருபான்மை அரசியல் தலைவர்களுக்கு மனதில் தைத்து வைத்த விடயமாக மாறிப்போயின. தோட்டங்கள் அரசு உடைமையாக்கப்பட்டபோது தோட்டக் குடியிருப்பகளுக்கு உரித்துப்பெற்றுக் கொடுத்திருப்பதற்கு சந்தர்ப்பங்கள் பல வாய்த்தபோதும் அதனை மலையகத் தலைமைகள் பெற்றுக்கொள்ள சரியான வழிவகைகளை கையாளவில்லை. தொடர்ந்தும் அரச தோட்டங்கள், அரச லயன்களிலேயே இம்மக்கள் முடக்கப்பட்டனர்.

ஜனாதிபதி பிரேமதாஸவின் ஆட்சிக் காலத்தில் 2000 வருடத்தில் 'யாவருக்கும் புகலிடம்' என்ற எண்ணக்கருவின்கீழ் பல தோட்டங்கள் துண்டாடப்பட்டு கிராமங்கள் (கம) உருவாக்கப்பட்டன. இவை மலைகயத் தமிழரின் இனச் செறிவினை திட்டமிட்டு அழிக்கும் நோக்குடையதாக காணப்பட்டது. அவரின் காலத்திலேயே மலையகத் தொழிலாளர்களின் குடியிருப்பு பிரச்சினைக்கு ஒரு தீர்வினைக் கண்டிருக்க முடியும். அதுவும் கைகூடாமலேயே போய்விட்டது. பின்னர் ஜனாதிபதி சந்திரிக்காவின் ஆட்சிக்காலத்தில் தோட்டத் தொழிலாளர் குடியிருப்புகளை சொந்தமாக்குவதாக பிரசாரம் செய்யப்பட்டதோடு, அதற்காக தனியானதொரு அமைச்சாக தோட்ட உட்கட்டமைப்பு அமைச்சு என ஒரு அமைச்சகம் உருவாக்கப்பட்டது. இக்காலத்தில் இதன் அமைச்சராக இருந்தவர் இதற்கான முன்னெடுப்புகளில் ஒன்றாக தோட்டத் தொழிலாளர்களுக்கு ஏழு பர்ச்சஸ் நிலத்தினை வழங்கியதோடு, குறித்த காணியில் வீடுகளை நிர்மாணிப்பதற்காக ரூபா 30000.00 கடனாக வழங்கப்பட்டதோடு, இக்கடனை 15 வருடக்காலத்தில் பூர்த்தி செய்யப்பட வேண்டும் என்ற நிபந்தனையோடும், இவ்வாறு இத்தொகையினை கட்டிமுடித்த பின்னர் காணிகளுக்கான உரித்து பத்திரம் வழங்கப்படும் என்றும் உறுதியளிக்கப்பட்டது. எனினும் இது இன்றளவிலும் வெறும் நீர் மேல் எழுத்தாகியுள்ளது.
இதனைத் தொடர்ந்து 2002 ஆம் ஆட்சியிலிருந்த பிரதமர் ரணில் விக்கிரமசிங்க அவர்களும் நுவரெலியாவாழ் தோட்டத்தொழிலாளர்களுக்கு தமது குடியிருப்புகளை சொந்தமாக்கிக் கொள்வதற்கான உரித்துப்பத்திரம் ஒன்றை வழங்கியிருந்தார். அதுவும் நடைமுறை சாத்தியமற்ற ஒன்றாகவே இருந்தது. இவ்வாறு தொடர்ந்து இந்நடைமுறைகள் சாத்தியம்ற்று போவதற்கு பெருந்தோட்ட மனிதவள அபிவிருத்தி நிதியமே (Pர்னுவு - வுசரளவ) பெரும்பங்கு ஆற்றியுள்ளது. இந்நிறுவனமானது பெருந்தோட்ட தொழிலாளர்களை தொடர்ந்து லயத்துவாசிகளாவே வைத்திருப்பதற்கு முனைப்பு காட்டி வருகின்றது. இதன் பெறுபேறாகவே லயத்து அமைப்பு முறை மாடிவீட்டுத் திட்டத்தின் கீழ் மாடி லயங்களாக புனர்ஜென்மம் பெற்றன.
இவ்வாறானதொரு பின்புலத்தில் 2005 ஆம் ஆண்டு ஜனாதிபதி தேர்தலில் போட்டியிடும் போது ஜனாதிபதி மகிந்த ராஜபக்ஷ அவர்கள் தன்னுடைய தேர்தல் விஞ்ஞாபனத்தில் 'ஜன செவன திட்டம்' என்ற ஒன்றின் மூலம் 'யாவருக்கும் வீடு' என அறிவித்திருந்தாலும் அது நடைமுறைப்படுத்தப்படவில்லை. இந்த தேர்தல் விஞ்ஞாபனத்தில் 100,000 வீட்டுத்திட்டம் என அது குறிப்பிடப்பட்டுள்ளது. அத்தோடு குறைந்த வருமானம் பெறுகின்ற நகரை அண்டிவாழும் மக்களுக்காகவும் இரண்டு பேர்ச்சஸ் நிலம் எவ்வித கட்டணங்களும் இன்றி வழங்கப்படும் என எழுதப்பட்டுள்ளமையையும் குறிப்பிட்டு காட்டவேண்டியதோடு இதில் வேண்டுமென்றே பெருந்தோட்டத் தொழிலாளர் குடியிருப்புகளை உள்ளடக்கவில்லை என்றே எண்ணத்தோன்றுகின்றது.
அதேப்போன்று 2010 ஆம் ஆண்டு அவருடைய மகிந்த சிந்தனை பாகம் இரண்டில் பெருந்தோட்டத் தொழிலாளர்களுக்கான நிலவுரிமை தொடர்பில் மிகத் தெளிவாக குறிப்பிடப்பட்டுள்ளது. 'ஐ றடைட pசழஎனைந ய pடழவ ழக டயனெ வழ நயஉh Pடயவெயவழைn றுழசமநசள...' என தொடங்குகின்றது. அதாவது ஒவ்வொரு பெருந்தோட்ட தொழிலாளருக்கும் ஒரு பகுதி நிலம் வழங்கப்படும். இதில் அவர்கள் விரும்பிய விடயங்களை (உற்பத்திகளை) செய்துக்கொள்வதற்கு ஏனைய பிரஜைகளுக்கு உள்ளவாறான உரிமையினை பெற்றுக்கொடுப்பேன் எனவும் குறிப்பிடப்பட்டுள்ளது.
மேலும் அதில் குறிப்பிடப்பட்டுள்ளதாவது பெருந்தோட்டங்களில் தற்காலிக குடியிருப்புகளில் வாழ்கின்றவர்களுக்கான தனியான வீட்டுத் திட்டம் ஒன்று 'ஜன செவன' திட்டத்தின் கீழ் உருவாக்கப்படும். இதன் கீழ் சுமார் 50,000 வீடுகள் கட்டித்தரப்படும் என்றும் குறிப்பிடப்பட்டுள்ளது.

மேலும் அதில் குறிப்பிடப்பட்டுள்ளதாவது பெருந்தோட்டத் தொழிலாளர்களுக்காக உள்ள திட்டத்தின்படி இருவது வருடங்களின் பின்னர் ஏழு பேர்ச்சஸ் இலவச நிலம் உரித்தாகும். எவ்வாறாயினும் இவ்வாறு வழங்கப்படுகின்ற நிலங்களை அவர்களின் உரிமையாக்குவேன் என்றும் அதில் குறிப்பிடப்பட்டுள்ளமையை சுட்டிக்காட்ட முடியும்.

எனினும் மதிப்புக்குரிய ஜனாதிபதி அவர்களின் முதலாவது தவணைக் காலத்தை முடித்துகொண்டது மட்டுமல்லாது, இரண்டாவது பதவிக்காலத்திலும் ஒரு வருட பூர்த்தியினை நவம்பர் மாதம் கொண்டாட இருக்கும் தறுவாயில் இதற்கான எந்த முன்னெடுப்புகளும் எடுக்கவில்லை என்பது குறிப்பிடத்தக்க விடயமாகும். இவ்வாறு இருக்க மதிப்புக்குரிய ஜனாதிபதி அவர்கள் கடந்த வாரம் நடைபெற்ற மக்கள் சந்திப்பொன்றில் 'எனது வாக்குறுதிகள் அனைத்தும் நிறைவேற்றப்பட்டு விட்டது. இனி எனக்கு செய்வதற்கு ஒன்றுமில்லை' என குறிப்பிட்டிருந்தமையும் இவ்விடத்தில் சுட்டிக்காட்ட வேண்டியுள்ளது.
எனினும் கடந்த வருடமளவில் இலங்கை தொழிலாளர் காங்கிரஸ் கொட்டகலை பிரதேசத்தில் இருபத்தைந்து தனிவீட்டுத் தொகுதிகளை அமைத்து பயனாளிகளுக்கு வழங்கியுள்ளது என்ற செய்தியும் பத்திரிகையில் வெளிவந்தது. இது பெரும்பாலும் தோட்டத் தொழிலாளர் சமூகத்திற்கு கிடைத்துள்ளது என்ற விடயம் ஓரளவு திருப்தி அளித்தாலும் இதற்கான உரித்துபத்திரம் தொழிலாளர்களுக்கு கிடைத்ததா என்பது ஐயத்திற்குரியதே.
அதேவேளை மேல் கொத்மலை நீர்மின் திட்டத்தின் கீழ் வீடுகளை இழந்த தோட்டத் தொழிலாளர்களுக்காக தலவாக்கலை நகரத்திற்கு அண்மையில் பாரிய தனி வீடமைத்திட்டம் ஒன்று நடைமுறைப்படுத்தப்பட்டாலும் இவ்வீடுகளுக்கும் தனியான உரித்துப்பத்திரம் எதுவும் வழங்கப்படவில்லை.
அதேப்போன்று கடந்த இரு வருடங்களாக நாடுமுழுவதும் உள்ள கிராம சேவகர் பிரிவுகளை உள்ளடக்கி 'காணிக்கச்சேரிகள்' நடத்தப்பட்டப்போதும் இதுவரையில் ஒரு தொழிலாளர் குடும்பத்திற்காவது காணிவழங்கப்பட்டதா என்பதை சிந்தித்துப்பார்க்க வேண்டியுள்ளது.
ஆனால் பெரும்பான்மை சமூகத்தை சார்ந்தவர்களுக்கான பல்வேறு குடியிருப்புத் திட்டங்களை அரசாங்கம் மிகவும் சிறப்பான முறையில் முன்னெடுத்து வருகின்றது. அதேப்போன்று இவர்களால் கைப்பற்றப்படுகின்ற தரிசு நிலங்களையும் அரசாங்கமானது 'சுவர்ணபூமி' உரித்து என்ற அடிப்படையில் வழங்கி வருகின்றமையை காணலாம்.
எனவே பெருந்தோட்டங்களை மையப்படுத்தி சுமார் 513 தோட்டக்குடியிருப்புகள் உள்ளதோடு, அவை அனைத்துமே தற்காலிக குடியிருப்புகளாகவே இருக்கின்றன. மஹிந்த சிந்தனை வேலைத்திட்டம் - 2ல் மதிப்புக்குரிய ஜனாதிபதி குறிப்பிட்டுள்ள வீட்டு உரிமைக்கான உறுதிமொழியினை நடைமுறை சாத்தியமாக்கிக் கொள்ள வேண்டிய காலக்கட்டத்தில் எமது அரசியல் தலைமைகள் உள்ளன என்பதை அவர்கள் உணர வேண்டும். இவர்கள் அனைவரும் அரசாங்கத்தை பிரதிநிதித்துவப்படுத்திதுகின்றனர் என்ற முறையிலும், அரசாங்கத்தின் வரப்பிரசாதங்களை அனுபவிக்கின்றனர் என்ற முறையிலும், பெருந்தோட்ட மக்களை பிரதிநிதித்துவப்படுத்தி இவர்கள் பாராளுமன்றத்தில் அமர்ந்திருக்கின்றார்கள் என்ற முறையிலும் தங்களுக்குள் கட்சி பேதமற்ற முறையில் ஓரணியில் திரண்டு வருகின்ற வருடத்திலாவது, வரவு-செலவு திட்டத்தில் பெருந்தோட்டக் குடியிருப்புகளை சுதந்திரமான குடியிருப்புகளாகவும், தனிநபர் உரிமையாகவும் ஆக்கப்பட வேண்டும் என்பதற்காகவும், காணி உரிமையினை பெற்றுக்கொடுக்கவும், தோட்டக்குடியிருப்புகளை அபிவிருத்தி செய்வதற்கும் கூடிய வகையில் நிதியினை ஒதுக்கிக் கொள்வதற்கான முன்மொழிவினை கொண்டு வருவதன் மூலம் தோட்டத் தொழிலாளர் குடியிருப்பு விடயம் குறித்த முனைப்பான செயற்பாடுகளை ஏற்படுத்தினால் தவிர இந்நிலைக்கு விமோசனமில்லை.

குயின்ஸ்பெரி ஸ்ரீ நவநாதர் சித்தர் ஆலயம்

இலங்கையிலுள்ள சித்தர் ஆலயங்களில் நாவலப்பிட்டி குயின்ஸ்பெரி தோட்டத்தில் அமைந்துள்ள ஸ்ரீ நவநாதர் சித்தர் ஆலயம் முக்கியதொன்றாகும். நுவரெலியா மாவட்டத்தில் கொத்மலை தேர்தல் தொகுதியில் குயின்ஸ்பெரி தோட்டத்தில் அமைந்துள்ள இந்த ஆலயத்துக்கு நாவலப்பிட்டிய கட்டபூலா வழியாகவும் தலவாக்கலை – அட்டன் பிரதான பாதையில் பத்தனை வழியாகவும் செல்ல முடியும். தமிழகத்தில் கொல்லிமலையைச்சேர்ந்த நவநாதர் சித்தர் 1901 ஆம் ஆண்டு இலங்கைக்கு வருகைத்தந்து குயின்ஸ்பெரி தோட்டப்பகுதியில் ஆன்மீகப்பணிகளில் ஈடுபட்டதாகவும் அதன் பின்பு அவர் 1902 ஆம் ஆண்டு பங்குனிமாதம் நிர்விகர்ப்ப சமாதியடைந்ததாகவும் அறிய முடிகின்றது. மலையகத்தில் முதற் பெண்கங்காணியான நாகன் பெருமாள் அம்மாள் நவநாதர் சித்தரின் மீதுள்ள பற்றுகாரணமாக இந்த சித்தருக்கு குயின்ஸ்பெரி தோட்டத்தில் கோவில் அமைத்ததாகவும் தெரிவிக்கப்படுகின்றது.
குயின்ஸ்பெரி தோட்டத்திலிருந்து சுமார் 8 கிலோமீற்றர் தூரமுள்ள காட்டில் தவமிருந்து கொண்டிருந்த நவநாதர் சித்தரை வழிபடச்சென்றிருந்த போது நாகன் பெருமாள் அம்மாள் அங்கு ஒரு பிடி அசிரியால் உணவு சமைத்து பக்தர்களுக்குப்பறிமாரி கொண்டிருந்த போது அப்போது 150 க்கும் மேற்பட்ட பக்தர்கள் அவ்விடத்திற்கு வந்ததாகவும் இதன் போது அந்த அம்மாள் நவநாதர் சித்தரிடம் ' சாமி ' என்ன செய்வது என்று கேட்ட போது அதற்கு அவர் ' நீ போட்டுக்கொண்டிரு தாயே ' என்று கூறியுள்ளார்.அவர் கூறியபடியே அந்த ஒரு பிடி அரிசியிலிருந்து 150 பேருக்கும் சோறு வழங்கப்பட்டாதாகவும் இந்தச்சம்பவம் நவநாதர் சித்தரின் அற்புதங்களில் ஒன்று என்றும் தோட்டமக்கள் தெரிவிக்கின்றனர். இந்தப்பின்னணியில் இந்தச்சமபவத்தை நினைவு கூரும் வகையில் கடந்த பல வருடங்களாக பொங்கல் தினத்தன்று ஸ்ரீநவநாதர் சித்தர் தபோவனத்தில் பக்தர்கள் ஒன்று கூடி பொங்கல் படைத்து தத்தமது நேர்த்தி கடன்களை நிறைவேற்றி வருகின்றனர். பொங்கல் தினத்தன்று ஸ்ரீநவநாதர் சித்தரின் திருவுருவம் தாங்கிய சப்பரம் அவரின் ஜீவசமாதியிலிருந்து குயின்ஸ்பெரி தோட்ட மக்களால் தபோவனத்திற்கு எடுத்துச்செல்லப்படும். அங்கு பூஜைகள் இடம் பெறும் அதன் பின்பு அவரின் திருவுவப்படம் தாங்கிய சப்பரம் மீண்டும் கோவிலுக்குக்கொண்டு வரப்பட்டு விசேட பூஜைகள் இடம் பெறும். இந்த ஆலயத்தில் பௌணர்மி தினங்களில் விசேட பூஜைகள் இடம் பெறும்

சர்வதேச ஆசிரியர் தினத்தினை முன்னிட்டு ஆக்க இலக்கிய மற்றும் விளையாட்டுப்போட்டிகள் : மலையக ஆசிரியர் ஒன்றியம் ஏற்பாடு

கடந்த இரண்டு தசாப்தங்களாக மலையக ஆசிரியர்களின் கௌரத்தையும் தாற்பரியத்தையும் வளர்த்தெடுத்த மலையக ஆசிரியர் ஒன்றியம் இவ்வாண்டிலும் ஆசிரியத்துவத்தின் செழுமையைக் காத்தெடுக்க துணிந்துள்ள எமது அங்கத்தினர்களுக்கு இனிய ஆசிரிய தின வாழ்த்துக்களைத் தெரிவிப்பதி;ல் பெரும் மகிழ்வு கொள்கிறது என்று சர்வதேச ஆசிரியர் தினத்தினை முன்னிட்டு மலையக ஆசிரியர் ஒன்றியத்தின் தலைவர் ஆர். ஸ்ரீதர் வெளியிட்டுள்ள அறிக்கையில் குறிப்பிட்டுள்ளார். ஆசிரியர்களின் உரிமையையும் கௌரவத்தையும் வென்றெடுப்பதில் தங்களின் அர்ப்பணிப்பு மிக்க பங்களிப்பை நினைவு கூர்வதோடு தொடர்ந்தும் இதே காத்திரமிக்க பங்களிப்பை எதிர்பார்க்கின்றோம். இநந்த நிலையில் இந்த ஆசிரியர் தினத்தினை முன்னிட்டு எமது அங்கத்தவர்களுக்கிடையில் ஆக்க இலக்கிய போட்டிகளையும் விளையாட்டுப்போட்டிகளையும் இவ்வருடமும் சிறப்பாக கொண்டாடுவதற்கு நடவடிக்கை எடுத்துள்ளோம். இந்தப்போட்டிகள் பற்றிய விதிமுறைகளை எமது அங்கத்தவர்களுக்கு பின்வருமாறு தெரிவித்துக்கொள்கின்றோம். ஆக்க, இலக்கிய போட்டிகளாக கவிதை ,சிறுகதை , கட்டுரை ஆகிய போட்டிகளை நடத்த உள்ளோம். இந்தப்போட்டிகளில் பங்குபற்றவுள்ளவர்கள் பின்வரும் விடயங்கள் கவனம் செலுத்த வேண்டும். படைப்புகள் சழூக அக்கறை மிக்கதாக இருத்தல் வேண்டும். கவிதைகள் மரபு கவிதையாகவோ புதுகவிதையாகவோ அமையலாம்.. கட்டுரைகள் ஆய்வு பண்புகளை கொண்டதாகவும் உசாத்துணைகள் இணைக்கப்பட்டதாகவும் இருத்தல் வேண்டும். ஆக்கங்கள் ஒரு பக்கத்திள் மட்டும் தட்டச்சு செய்யப்பட்டு அனுப்புதல் வேண்டும். ஏலவே பிரசுரிக்கப்பட்டதாகவோ தழுவலாகவோ இருத்தல் கூடாது. ஆக்கங்கள் 07.11.2011க்கு முன்பதாக செயலாளர் மலையக ஆசிரியர் ஒன்றியம் 133 1ஃ1 திம்புள்ள வீதி ஹட்டன். என்ற முகவரிக்கு பதிவு தபாலில் அனுப்பி வைத்தல் வேண்டும். ஆக்க இலக்கிய போட்டிகளுக்கான பரிசில்கள் வழங்கப்படும்;.
ஆசிரியர்களுக்கான விளையாட்டுப் போட்டிகளாக உள்ளக விளையாட்டு போட்டி ,கிளைச் சங்கங்களுக்கு இடையிலான கிரிக்கட் போட்டி , தடகள போட்டிகள் என்பன இடம் பெறவுள்ளன. விளையாட்டுப் போட்டிகளுக்கான திகதி உரிய காலத்தில் அறிவிக்கப்படும். போட்டிகளில் வெற்றி பெறுபவர்களுக்கு கடந்தகாலங்களைப்போல பெறுமதி மிக்கப் பணப் பரிசில்களும் சான்றிதழ்களும் வழங்கப்படும்.

டிக்கோயா காசல்ரீ தோட்ட மக்களுக்கு மின்னிணைப்புக்கான நிதியுதவி

தோட்டத்தொழிலாளர்கள் எதிர் நோக்குகின்ற தொழிற்பிணக்குகளைத் தீர்த்து வைக்கின்ற அதே வேளைத் தோட்டப்பகுதிகளின் அபிவிருத்தியிலும் தொழிலாளர் தேசிய சங்கம் முனைப்புடன் செயற்பட்டு வருவதாக தொழிலாளர் தேசிய சங்கத்தின் சிரேஷ்ட தொழிலுறவு நிருவாக ஆலோசகரும் மத்திய மாகாணசபை உறுப்பினருமான சிங்பொன்னையா தெரிவித்தார்.
தொழிலாளர் தேசிய தேசிய சங்கத்தின் தலைவரும் நுவரெலியா மாவட்ட பாராளுமன்ற உறுப்பினருமான பி.திகாம்பரத்தின் ஆலோசனைக்கேற்ப டிக்கோயா காசல்ரீ தோட்டத்தில் இதுவரை காலமும் மின்னிணைப்பு வசதியில்லாதவர்களுக்கு நிதியுதவி வழங்கும் நிகழ்வில் கலந்து கொண்டு பேசிய போதே இவ்வாறு அவர் தெரிவி;த்தார்.
இன்று 2 ஆம் திகதி மாலை இடம் பெற்ற இந்த நிகழ்வில் தொழிலாளர் தேசிய சங்கத்தின் பொதுச்செயலாளர் எஸ்.பிலிப் ,தேசிய அமைப்பாளர் எஸ்.ஸ்ரீதரன் உட்பட பலர் கலந்து கொண்டனர்.
தொழிலாளர் தேசிய சங்கத்தின் மக்கள் பிரதிநிதிகளுக்கு ஒதுக்கப்படுகின்ற நிதியொதுக்கீடுகளில் காசல்ரீ ,லெதண்டி , காபெக்ஸ் ,சமர்வெலி உட்பட பல தோட்டங்களின் உட்கட்டமைப்பு வசதிகளுக்கு முன்னரிமை வழங்கப்பட்டுள்ளதாக தொழிலாளர் தேசிய சங்கத்தின் தேசிய அமைப்பாளர் எஸ்.ஸ்ரீதரன் தெரிவித்தார்.

ஹைதராபாத்தில் தலைமைத்துவப்பயிற்சி செயலமர்வில் நுவரெலியா மாவட்டம் சார்பாக தமிழர் ஒருவர் பங்கேற்பு

இந்தியாவிலுள்ள பாலவிக்காஷா நிறுவனத்தின் ஏற்பாட்டில் கடந்த முதலாம் திகதி முதல் ஹைதராபாத்தில் நடத்தப்படுகின்ற தலைமைத்துவ பயிற்சி செயலமர்வில் நுவரெலியா மாவட்டம் சார்பாக இராஜேந்திரன் கனகராஜ் கலந்து கொண்டுள்ளார். எதிர்வரும் 10 ஆம் திகதி வரை நடைபெறவுள்ள இந்தப் பயிற்சியில் இலங்கையில் இருந்து 60 பேர் கலந்து கொண்டுள்ளனர். இவர்களில் தேசிய இளைஞர் சேவைகள் மன்றத்தினூhக 50 உறுப்பினர்கள் பங்கேற்கின்றனர். இந்தப்பயிற்சி செயலமர்வில் நுவரெலியா மாவட்டம் சார்பாக கலந்து கொண்டிருக்கின்ற இராஜேந்திரன் கனகராஜ் பொகவந்தலாவை கில்லார்னி தோட்டத்தைச் சேர்ந்தவரும் ஹொலிரோசரி தமிழ் மகா வித்தியாலயத்தின் பழைய மாணவருமாவார். அத்துடன் சூரியா இளைஞர் கழகத்தின் செயலாளராகவும் தேசிய இளைஞர் சேவைகள் மன்றத்தின் அம்பகமுவை பிரதேச சம்மேளனத்தின் தலைவராகவும், நுவரெலியா மாவட்ட சம்மேளனத்தின் அமைப்பாளராகவும் தேசிய சம்மேளன நுவரெலியா மாவட்ட உறுப்பினராகவும் செயற்பட்டு வருகின்றார்.

இந்திய தூதரகத்தினால் விளையாட்டுப்பொருட்கள் கையளிப்பு

கண்டி இந்திய உதவி தூதரகத்தின் அனுசரணையுடன் ஒரு இலட்சம் ரூபா பெறுமதியான விளையாட்டு உபகரணங்கள் நாவலப்பிட்டி கதிரேசன் மத்திய கல்லூரிக்கு வழங்கப்பட்டுள்ளன. இந்த விளையாட்டு உபகரணங்களை கண்டி உதவி இந்திய தூதரகத்தின் உதவிச்செயலாளர் ஓ.பி. ஸ்ரீவத்சாவா கல்லூரியின் பிரதி அதிபர் பத்மநாதனிடம் கையளித்தார்.
இந்த நிகழ்வில் இந்தக்கல்லூரியின் மாணவர்களும் ஆசிரியர்களும் கலந்து கொண்டனர்.

கொட்டியாட்டியாக்கலைத் தோட்டத்தொழிலாளர்கள் தொடர்பான பேச்சுவார்த்தை ஒத்திவைப்பு

பல்வேறு கோரிக்கைகளை முன்வைத்து பொகவந்தலாவை கொட்டியாக்கலைத் தோட்டப்பிரிவுகளில் கடந்த பல நாட்களாக தொழிலாளர்கள் மேற்கொண்டு வந்த கவனயீர்ப்புப் போராட்டம் தொடர்பில் அட்டன் உதவி தொழில் ஆணையாளர் முன்னிலையில் தொழிற்சங்க பிரதிநிதிகளுக்கும் தோட்ட முகாமைத்துவத்துக்குமிடையில் இன்று பொகவந்தலாவையில் பேச்சுவார்த்தை ஒன்று இடம் பெற்றுள்ளது. இந்தப்பேச்சுவார்த்தையில் பாராளுமன்ற உறுப்பினர் ஆர். யோகராஜன் தொழிலாளர் தேசிய சங்கத்தின் பொதுச்செயலாளர் எஸ்.பிலிப் உட்பட சில தொழிற்சங்கங்களின் முக்கியஸ்தர்கள் கலந்து கொண்டனர்.
இதன் போது கொட்டியாக்கலைத் தோட்டத்தொழிலாளர்கள் தற்போது ஒரு நாட் அடிப்படைச்சம்பளத்திற்காக பறிக்கின்ற கொழுந்தினைத் தொடர்ந்து பறிக்க வேண்டும் என்றும் எதிர்வரும் 6 ஆம் திகதி அட்டன் தொழிற்திணைக்களத்தில் பேச்சுவார்த்தை இடம் பெறும் வரை தோட்ட முகாமையாளர் தொழிலாளர்களின் பணிகளை மேற்பார்வை செய்ய மாட்டாரென்றும் இந்தப்பேச்சுவார்ததையின் போது தீர்மானிக்கப்பட்டதாக தொழிலாளர் தேசிய சங்கத்தின் பொதுச்செயலாளர் எஸ்.பிலிப் தெரிவித்தார்.

தீ விபத்தினால் பாதிக்கப்பட்டவர்களுக்கு நிதியுதவி

கடந்த 25 ஆம் திகதி லிந்துலை நாகசேநை தோட்டத்தில் லயன் குடியிருப்பொன்று தீவிபத்தினால் சேதமுற்ற போது அந்தக்குடியிருப்பில் வாழ்ந்த 10 குடும்பங்களைச் சேர்ந்த 54 பேர் தற்போது லிந்துலை டிலிகூல்ற்றி தமிழ் வித்தியாலயத்தில் தங்க வைக்கப்பட்டுள்ளனர்.
இவ்வாறு தங்க வைக்கப்பட்டவர்களை நேற்று 27 ஆம் திகதி சந்தித்து அவர்களுக்கு ஆறுதல் கூறிய தொழிலாளர் தேசிய சங்கத்தின் பிரதித்லைவரும் மத்திய மாகாணசபை உறுப்பினருமான எம். உதயகுமார் ஒவ்வொரு குடும்பத்தினருக்கும் நிதியுதவினை
வழங்கினார்.

மலையகத்தமிழ் மாணவர்கள் தொடர் கற்றலில் அக்கறை செலுத்த வேண்டும் : ம.மா. உ. எம். உதயகுமார்

கல்வியில் சிறந்து விளங்குகின்றவர்கள் மூலமாகவே சிறந்த சமூகமொன்றினைக்கட்டியெழுப்ப முடியும் என்று தொழிலாளர் தேசிய சங்கத்தின் பிரதித்தலைவரும் மத்திய மாகாணசபை உறுப்பினருமான எம். உதயகுமார் தெரிவித்தார்.
லிந்துலை சரஸ்வதி தமிழ் மகா வித்தியாலயத்தில் 27 ஆம் திகதி இடம் பெற்ற நிகழ்வொன்று கலந்து கொண்டு பேசிய போதே இவ்வாறு அவர் தெரிவித்தார்.

இந்த நிகழ்வின் போது ஐந்hந்தரப்பலமைப்பரிசில் பரீட்சையில் சித்திப்பெற்ற மாணவர்களுக்கும் இந்தப்பரீட்சையில் 100 புள்ளிகளுக்கு மேல் பெற்ற மாணவர்களுக்கும் பரிசில்களும் பதக்கங்களும் வழங்கப்பட்டன. பல்வேறு கஷ்டங்களில் மத்தியில் வாழுகின்ற பெருந்தோட்ட மாணவர் சமூகத்தினர் தொடர்ச்சியான கற்றலுக்கு முக்கியத்துவம் செலுத்த வேண்டும். உயர்தரத்தில் கலைப்பிரிவில் மாத்திரம் அக்கறை செலுத்தாமல் சட்டம் ,விஞ்ஞானம் ,கணிதத்துறையிலும் மாணவர்கள் அதிக அக்கறை செலுத்த வேண்டுமென மத்திய மாகாணசபை உறுப்பினர் எம். உதயகுமார் மேலும் தெரிவி;த்தார்.

டிக்கோயா பீரட் தோட்ட வைத்தியசாலைக்குப் பொருளுதவி

தொழிலாளர் தேசிய சங்கத்தின் பிரதித்தலைவரும் மத்திய மாகாணசபை உறுப்பினருமான எம். உதயகுமார் டிக்கோயா பீரட் தோட்ட வைத்தியசாலைக்கு மருந்துப்பொருட்களையும் மகப்பேற்றுப்பிரிவுக்குத் தேவையான பொருட்களையும் தோட்ட வைத்தியரிடம் நேற்று 27 ஆம் திகதி வழங்கி வைத்தார்.
இந்த நிகழ்வில் பீரட் தோட்ட அதிகாரிகள் , தோட்ட மக்கள் உட்பட தொழிலாளர் தேசிய சங்கத்தின் முக்கியஸ்தர்கள் பலர் கலந்து கொண்டனர்.

தரம் 5 புலமைப்பரிசில் பரீட்சையில் ஹற்றன் ஹைலண்ஸ் கல்லூரியில் 40 மாணவர்கள் சித்தி

இவ்வருடம் இடம் பெற்ற ஐந்தாந்தரப்புலமைப்பரிசில் பரீட்சையில் அட்டன் ஹைலண்ஸ் கல்லூரியிலிருந்து பரீட்சைக்குத் தோற்றிய 102 மாணவர்களில் 40 மாணவர்கள் சித்திப்பெற்றுள்ளனர். மேலும் 53 மாணவர்கள் 100 புள்ளிகளுக்கு மேல் பெற்றுள்ளனர். ஆர். ரோய்ஸ் தீபன் 188 புள்ளிகளைப் பெற்று நுவரெலியா மாவட்டத்தில் 2 ஆவது இடத்தினையும் வை. லுதர்சன் 180 புள்ளிகளைப் பெற்று மாவட்டத்தில் 9 ஆவது இடத்தையும் என். ராகவி 180 புள்ளிகளைப் பெற்று மாவட்டத்தில் 9 ஆவது இடத்தையும் என். தினுசிகா 178 புள்ளிகளைப் பெற்று மாவட்டத்தில் 15 ஆவது இடத்தினையும் பெற்றுள்ளனர்.
மேலும் எஸ். யுவராஜன் 175 புள்ளிகளையும் எஸ்.சதுசனா 174 புள்ளிகளையும் ஆர். அபினா ஏவன்ஜலின் 173 புள்ளிகளையும் எஸ். அபிஷேக் 172 புள்ளிகளையும் எஸ்.சதுர்ஷிகா , எஸ்;. நவீன்யா காயத்திரி , டி. அபிராமி ஆகியோர் 171 புள்ளிகளையும் வி. கையூரன் 170 புள்ளிகளையும் எஸ்.சிந்துஜா 168 புள்ளிகளையும் எஸ். ஹரினி 167 புள்ளிகளையும் கே. துசாலிகா ,டி. தக்ஷானி ஆகியோர் 166 புள்ளிகளையும் எம்.கார்த்திகா , என். திவோன்அனுஷ்கர் , பி. தியோன் ஜொனதன் ஆகியோர் 165 புள்ளிகளையும் எஸ்.நிரோன்வின்குமார் , வி.யஸ்வின் , கே. ட்ரேசி ஒலிவியா , எஸ். டிலானி டினிஷிகா ஆகியோர் 164 புள்ளிகளையும் எல். டிலுக்ஷன் 163 புள்ளிகளையும் பி. மொஹமட் பஹான் 160 புள்ளிகளையும் எம். ஜக்கீர் முஹமட் ருஸயன் , ஆர்.கவிப்பிரியன் ,ஏ.எஸ்தர் ஜோஹான்னா ஆகியோர் 158 புள்ளிகளையும் என் இந்தன்ஷியா , எஸ்.ஹம்சிதான் ஆகியோர் 156 புள்ளிகளையும் ஏ. மதுர்ஷன் , இ. சிவரூபன் ஆகியோர் 155 புள்ளிகளையும் வி. விக்காஷனா 154 புள்ளிகளையும் எம். ஷிரோஸ் முஹமட் ஷப்ரி 153 புள்ளிகளையும் என். லக்ஷிகா 152 புள்ளிகளையும் ஆர் .ரோஷான் ,எஸ். பிரணவன் , பி.சுவாதி ஆகியோர் 151 புள்ளிகளையும் என்.தனுஜா , எஸ்.ஜெயநீதன் ஆகியோர் 149 புள்ளிகளையும் பெற்றுள்ளனர். இந்த மாணவர்களை வழிநடத்திய ஹைலண்ஸ் கல்லூரியின் ஆரம்பப்பிரிவுக்குப் பொறுப்பான பிரதி அதிபர் எம்.ஜோர்ஜ் விசுவாசம் மாணவர்களுக்குக்ற்பித்த ஆசிரியைகளான திருமதி .கே. இந்திராகாந்தி ,திருமதி , பி.இராஜேஸ்வரி , திருமதி வி. கலையரசி ஆகியோருக்கு கல்லூரியின் அதிபர் எஸ்.விஜயசிங் தனது வாழ்த்துக்களைத் தெரிவித்துக்கொண்டார்.

தரம் 5 பரீட்சையில் அட்டன் பொஸ்கோ கல்லூரியில் 15 பேர் சித்தி

இவ்வருடம் இடம் பெற்ற ஐந்தாந்தரப்புலமைப்பரிசில் பரீட்சையில் அட்டன் பொஸ்கோகல்லூரியிலிருந்து தமிழ் மொழிப்பிரிவில் தோற்றிய மாணவர்களில் 15 பேர் சித்திப்பெற்றுள்ளனர். எம். பவன்ஹனும் ( 183 புள்ளிகள் ) எஸ். ஜோய் ஜக்கின்சன் ( 181 புள்ளிகள் ) கே.. அபிஷேக் ( 180 புள்ளிகள் ) கே. கபிலன் ( 174 புள்ளிகள் ) டி. ஷகில் ( 170 புள்ளிகள் ) ஈ . சஞ்ஜை ( 160 புள்ளிகள் )
டி. கிருஷாந்தன் ( 159 புள்ளிகள் ) கே. லக்ஜான் ( 158 புள்ளிகள் )
எஸ். ஜெக்சன் பிரேங் ( 157 புள்ளிகள் ) ஏ. கெவின்லாசன் ( 154 புள்ளிகள் )
அம்.டி. உஸ்மான் ( 154 புள்ளிகள் ) எஸ். நவீந்திரன் ( 153 புள்ளிகள் )
எம். பாரத் ( 153 புள்ளிகள் ) எஸ். சஜன் ( 150 புள்ளிகள் ) எஸ். ரென்யு பிரனோஸ் ( 149 புள்ளிகள் ) பெற்றுள்ளனர். இந்த மாணவர்களுடன் கல்லூரி அதிபர் என்.எஸ்.குரூஸ் , உப அதிபர் சங்கரமணிவண்ணன் , ஆரம்பப்பிரிவு தலைவர் திருமதி எம்.கீதாஞ்சலி , கற்பித்த ஆசிரியர்களான வை. ரேணுகாதேவி, சுசானா மெக்லின் மேரி, ஏ. வசந்தி ஆகியோரை படங்களில் காணலாம்.

கோயில் அமைக்க அடிக்கல் நாட்டு விழா

நோர்வூட் வெஞ்சர் தோட்ட தேயிலைத்தொழிற்சாலை பிரிவிலுள்ள அருள் மிகு ஸ்ரீ காளியம்மன் ஆலய நிர்மாணத்திற்கான அடிக்கல் நாட்டு நிகழ்வில் மத்திய மாகாணசபை உறுப்பினர் சிங்பொன்னையா , தொழிலாளர் தேசிய சங்கத்தின் தேசிய அமைப்பாளர் எஸ்.ஸ்ரீதரன் உட்பட முக்கியஸ்தர்கள் கலந்து கொண்டனர்.

இலங்கையின் தேயிலைத்தொழிற்துறை வீழ்ச்சியை நோக்கி செல்வது உண்மையா ?

இலங்கையின் தேயிலை விலை சர்வதேச சந்தையில் வீழ்ச்சிக்கண்டு வருவது மற்றும் இலங்கையின் தேயிலையை அதிகமாக கொள்வனவு செய்கின்ற மத்திய கிழக்கு நாடுகளில் ஏற்பட்டுள்ள அசாதாரண நிலைமையின் காரணமாக இலங்கையின் தேயிலைத்தொழிற்துறைக்குப் பெரும் பாதிப்பு ஏற்பட்டு வருதாக அண்மைக்காலமாக தோட்ட முதலாளிமார் சம்மேளனம் கருத்துத் தெரிவித்து வருகின்றது. அத்துடன் தோட்டங்களின் முகாமையாளர்களும் தோட்டத்தொழிற்துறை வீழ்ச்சிக்கண்டு வருதாக தொழிற்சங்க பிரதிநிதிகளிடம் கருத்துரை வழங்கி வருகின்றனர். இந்த நிலையில் தோட்டத்தொழிலாளர்கள் தற்போது வாங்குகின்ற சம்பளத்தில் 100 ரூபா குறைப்பு ஏற்படலாமெனவும் உறுதிப்படுத்தாத தகவல்கள் தெரிவிக்கின்றன. மேலும் ஒரு கிலோ தேயிலைத்தூளினை உற்பத்தி செய்வதற்கு 565 ரூபா செலவாகுவதாகவும் அதனால் தோட்டத்தொழிலாளர்கள் ஒரு நாள் அடிப்படைச்சம்பளத்துக்காக பறிக்க வேண்டிய கொழுந்தின் அளவை எவ்விதத்திலும் குறைக்க முடியாதென்றும் அவ்வாறு குறைத்துப்பறிக்கப்படுமானால் அரைநாள் வேதனமே வழங்கப்படுமெனவும் தோட்ட நிருவாகங்கள் தொழிலாற்களுக்கு அறிவித்துள்ளன.எனினும் எட்டு மணி நேரம் வேலை செய்கின்ற தோட்டத்தொழிலாளர்களுக்கு முழுமையான சம்பளம் வழங்கப்பட வேண்டுமெனவும் தோட்டத்தொழிற்சங்கங்கள் கருத்துத் தெரிவித்து வருகின்றன. இந்த நிலையில் தற்போதைய தோட்டத்தொழிற்துறை தொடர்பாக
பெருந்தோட்ட முதலாளிமார் சம்மேளனம் வெளியிட்டுள்ள அறிக்கை ஒன்றில் பின்வருமாறு கூறப்பட்டுள்ளது. பெருந்தோட்டத்துறையானது பெரும் நிதி நெருக்கடியை சந்தித்துள்ளது. தற்போது நிலவும் குறைவான விலை சூழ்நிலையும், மத்திய கிழக்கு பிராந்தியத்தில் நிலவும் அமைதியற்ற சூழ்நிலை மற்றும் அண்மையில் பெருந்தோட்ட தொழிலாளர்களுக்கு வழங்கப்பட்ட சம்பள அதிகரிப்பு போன்றன காரணமாக இந்த நெருக்கடி நிலை ஏற்பட்டுள்ளது.
எனவே இது போன்ற நிலைமையில் அனைத்து துறைசார்ந்தவர்களும் தமது பூரண ஒத்துழைப்பை வழங்கி இந்த துறை தற்போது எதிர்கொண்டுள்ள சவாலான நிலையிலிருந்து விடுபடுவதற்கான செயற்பாடுகளை முன்னெடுக்க வேண்டும். தொழிலாளர்களுக்கும் இந்த நிலை குறித்து விழிப்புணர்வை ஏற்படுத்தி அவர்களுக்கு தற்போதுள்ள நிலை தொடருமாயின் ஏற்படும் பின்விளைவுகள் குறித்தும் தெளிவுபடுத்த வேண்டும் என குறிப்பிடப்பட்டுள்ளது. மேலும், தற்போது ஏற்பட்டுள்ள சிக்கலான நிலையை தணிக்கும் வகையில் அனைத்து தரப்பினரும் ஒத்துழைக்க தவறும்பட்சத்தில் பெருந்தோட்ட கம்பனிகள் தமது நிதி செயற்பாடுகளில் பெரும்பின்னடைவை சந்திக்க நேரிடும் எனவும் இவை தொழிலாளர்களின் சம்பளத்திலும் பாதிப்பை ஏற்படுத்துவதாக அமையும் எனவும் குறிப்பிட்டுள்ளது. நூற்றாண்டு காலம் பழமையான பெருந்தோட்டத்துறையை பாதுகாக்கும் வகையில் அவ்வப்பபோது ஏற்படும் பிணக்குகளை தீர்ப்பதற்காக சமரச பேச்சுவார்த்தைகளை முன்னெடுத்து வந்துள்ளது. இவற்றின் மூலம் சுமூகமான தீர்வுகளும் எய்தப்பட்டுள்ளன. தகாத வார்த்தை பிரயோகங்கள், உடல் ரீதியான அச்சுறுத்தல்கள், வேலை நிறுத்தங்கள், கலவரங்கள் மற்றும் தேசிய உடைமைகளுக்கு பாதிப்பு ஏற்படுத்தல் போன்ற செயற்பாடுகளை ஒருபோதும் தாம் வரவேற்றதில்லை என பெருந்தோட்ட முதலாளிமார் சம்மேளனம் வெளியிட்டுள்ள அறிக்கையில் மேலும் குறிப்பிடப்பட்டுள்ளது.
எனவே இனிவரும் காலங்களில் பெருந்தோட்ட பகுதிகளில் இது போன்ற அநாகரீகமான செயற்பாடுகளை ஏற்படவிடாமல் அனைத்து தரப்பினரும் இந்த துறையை பாதுகாக்கும் நடவடிக்கையில் ஈடுபட முன்வரவேண்டும். பிணக்குகள் ஏற்படின் அவற்றை சமரச பேச்சுவார்த்தைகளை முன்னெடுப்பதன் மூலம் தீர்ப்பதற்கு முன்வர வேண்டும் எனவும் கேட்டுக்கொண்டுள்ளது.

தோட்டத்தொழிலாளர்களின் வீடில்லா பிரச்சினைக்கு எப்போது தீர்வு ?

சோ.ஸ்ரீதரன்
தோட்டப்பகுதிகளில் வாழுகின்ற தொழிலாளர் குடும்பங்களின் பெரும்பாலானோருக்குப் புதிய வீடுகளின் தேவை தற்போது அதிகரித்துள்ளது. இற்றைக்கு 150 வருடங்களுக்கு முன்பு நிர்மாணிக்கப்பட்ட லயன் குடியிருப்புக்களில் தோட்டத்தொழிலாளர்கள் பரம்பரை பரம்பரையாக வாழ்ந்து கொண்டிருக்கின்றார்கள். தமிழகத்திலிருந்து வந்தேறு குடிகளாக வந்தவர்கள் இன்று இந்த நாட்டில் நிரந்திரமாக வாழவேண்டிய சூழலிலுள்ளனர். இந்த நாட்டில் பெருந்தோட்டத்தொழிற்துறையை அறிமுகப்படுத்திய ஆங்கிலேயர்கள் தோட்டப்பகுதிகளில் தொழில் செய்கின்ற தொழிலாளர்களுக்காக தற்காலிகமாக அமைக்கப்பட்ட லயன் குடியிருப்புக்கள் இன்று இந்தத்தொழிலாளர்களின் நிரந்திர இருப்பிடங்களாக மாறிவிட்டன. பத்தடி விஸ்திரமான அறைக்குள் முடங்கி வாழும் அவர்களின் வாழ்க்கை இரண்டு சகாப்தத்தை நெருங்கி கொண்டிருக்கின்றது. எந்த விதமான வீட்டுரிமையோ காணியுரிமையோ இன்றி தோட்டத்தொழிலாளர் குடும்பங்கள் பரம்பரை பரம்பரையாக வாழ வேண்டி நிலைமை தொடர்கின்றது.

தோட்டப்பகுதிகளில் லயன் குடியிருப்பு ,இரட்டை வீடுகள் , தொடர் மாடி குடியிருப்புக்கள் என்ற ரீதியில் வீடுகள் அமைத்துக்கொடுக்கப்பட்டுள்ளன. ஆங்கிலேயர் காலத்தைத் தொடர்ந்து தோட்டத்தொழிலாளர்களுக்குக் குறிப்பிட்டுச்சொல்லக்கூடிய வகையில் இலவசமாக வீடுகள் கட்டிக்கொடுக்கப்படவில்லை. அமரர் பெ.சந்திரசேகரன் பிரதியமைச்சராக இருந்த காலத்தில் 7 பேர்ச்சர்ஸ் நிலத்தில் வீடமைப்பு அதிகார சபையின் ஊடாக தனிவீடுகள் கட்டிக்கொடுக்கப்பட்டன. தோட்ட உட்கட்டமைப்பு அமைச்சும் வீடமைப்பு அதிகாரசபையின் ஊடாக மீள கடன் செலுத்தும் திட்டத்திற்கேற்ப தொடர்மாடிகள் கட்டிக்கொடுக்கப்பட்டன. அதே வேளை தோட்டத்தொழிலாளர்களின் ஊழியர் சேமலாப நிதியத்திலிருந்து கடன் பெற்று பெருந்தோட்ட மனிதவள அபிவிருத்தி நிறுவனத்தின் ஊடாகவும் தோட்டப்பகுதிகளில் தனி வீடுகள் கட்டிக்கொடுக்கப்படுகின்றன. இவ்வாறானதொரு நிலையில் பெருந்தோட்டக்கம்பனிகள் தோட்டத்தொழிலாளர்களுக்குப் புதிய வீடுகள் கட்டிக்கொடுப்பதில்லை ,மாறாக பெருந்தோட்ட மனிதவள அபிவிருத்தி நிறுவனத்தின் ஊடாக லயன் குடியிருப்புகளுக்குக் கூரைத்தகரங்களை மாற்றும் நடவடிக்கைகளில் ஈடுபடுகின்றன.

தோட்டங்களில் தற்போது தொழிலாளர் குடும்பங்களின் எண்ணிக்கை அதிகரித்து வருகின்ற இந்த வேளையில் ஒரே வீட்டில் குறைந்தது மூன்று குடும்பங்கள் வாழ வேண்டிய நிலைமை ஏற்பட்டுள்ளது. இதே வேளை தோட்டங்களிலுள்ள ஒதுக்குப்புறங்களில் எவ்விதமான அடிப்படை வசதிகளுமின்றி தற்காலிக குடில்களை அமைத்துக்கொண்டு வாழ வேண்டிய நிலைமை தோட்டத் தொழிலாளர் குடும்பங்களுக்கு ஏற்பட்டுள்ளது.

கடந்த 2002 ஆம் ஆண்டு நுவரெலியா மாவட்டத்தில் 5000 தற்காலிக குடில்களில் வாழந்தவர்களுக்கு வீடமைத்துக்கொள்வதற்காக தோட்ட உட்கட்டமைப்பு அமைச்சினால் மக்கள் வங்கியின் ஊடாக ஒவ்வொரு குடும்பங்களுக்கும் வழங்கப்பட்ட 30 ஆயிரம் ரூபா இதுவரை உரியவர்களுக்குக் கிடைக்கவில்லை என்பதும் குறிப்பிடத்தக்கது.

எமது நாடடிலுள்ள ஒவ்வொரு தோட்டப்பிரிவிலும் லயன் குடியிருப்புக்களில் வாழுகின்றவர்களைத்தவிர சுமார் 50 க்கும் மேற்பட்ட தொழிலாளர் குடும்பங்கள் எவ்வித குடியிருப்பு வசதிகளுமின்றி வாழ்ந்து கொண்டிருக்கின்றார்கள்.இவ்வாறு பார்க்கின்ற போது சுமார் ஒரு இலட்சத்துக்கும் மேற்பட்டோருக்குப் புதிய வீடுகள் தேவைப்படுகின்றது.இவ்வாறானதொரு நிலையில் இந்திய அரசாங்கம் 4000 வீடுகளைத் தோட்டப்பகுதிகளில் அமைத்துக்கொடுக்கவுள்ளதாக இலங்கைக்கான இந்திய தூதுவர் அசோக் கே காந்தா அண்மையில் அறிவித்திருந்தார்.
இவ்வாறானதொரு நிலையில் மலையகத்திலுள்ள சில தொழிற்சங்கங்கள் தோட்டத்தொழிலாளர்களுக்கு தமது சங்கத்தின் ஊடாக வீடுகள் அமைத்தக்கொடுக்கப்போவதாகவும் குறிப்பிட்ட சங்கங்களில் அங்கத்துவம் உள்ளவர்களுக்கு மாத்திரமே வீடுகள் அமைத்துக்கொடுக்கப்படுமெனவும் தோட்டத்தொழிலாளர்களை ஏமாற்றம் நடவடிக்கைகளில் ஈடுபட்டுள்ளன. அத்துடன் இந்தத்தொழிற்சங்கங்கள் தொழிற்சங்கங்களுக்கு அங்கத்துவம் சேர்க்கும் போது தமது தலைவர்கள் ஊடாக வீடமைப்புத் தொடர்பாக சில விண்ணப்பங்களை விநியோகித்துள்ளமையும் குறிப்பிடத்தக்கது. தோட்டத்தொழிலாளர்களை எப்படியும் ஏமாற்றலாமென்ற ரீதியில் சில தொழிற்சங்கங்கள் செயற்படுவது வருந்தத்தக்க விடயமாகும்.
எனவே இந்திய அரசாங்கத்தினால் தோட்டப்பகுதிகளில் முன்னெடுக்கப்படுகின்ற வீடமைப்புத்திட்டமாகட்டும் அல்லது பெருந்தோட்ட மனிதவள அபிவிருத்தி நிறுவனத்தினால் முன்னெடுக்கப்படுகின்ற வீடமைப்புத்திட்டமாக இருக்கட்டும் இந்த வீடமைப்புத்திட்டங்கள் கட்சி தொழிற்சங்க ரீதியாக மேற்கொள்ள முடியாதென்பதை தோட்டத்தொழிலாளர்கள் தெளிவுடன் இருக்க வேண்டும். இந்த நிலையில் தோட்டத்தொழிலாளர்களுக்கு தனிவீட்டுத்திட்டங்களை முன்னெடுப்பதற்கு அரசாங்கம் நடவடிக்கை எடுக்க வேண்டும்.

ரம்பொடை ஆஞ்சநேயர் ஆலயம்

சோ.ஸ்ரீதரன்
இலங்கை மற்றும் ஏனைய நாட்டு மக்களின் வணக்கஸ்தலமாக கருதப்படுகின்ற இடங்களில் றம்பொடை ஸ்ரீ பக்த அனுமன் ஆலயமுமொன்றாகும். நுவரெலியா மாவட்டத்தில் கம்பளை நுவரெலியா பிரதான பாதையில் றம்பொடை நகருக்கு அருகிலுள்ள மலை ஒன்றின் சிகரத்தில் இந்த ஆலயம் அமைந்துள்ளது .
இலங்கை சின்மயா மிஸ்ரீனினால் நிருவகிக்கப்படுகின்ற இந்த ஆலயம் சுவாமி சின்மயானந்தரின் விருப்பத்துக்கேற்ப 2001 ஆம் ஆண்டு அமைக்கப்பட்டது. றம்பொடை என்று அழைக்கப்படுகின்ற இந்த பிரதேசத்தை சிலர் இராமாயணத்துடன் தொடர்புபடும் வகையில் ராம்படை என்று குறிப்பிடுகின்றனர். இராவணன் சீதையை இலங்கைக்குக் கடத்தி வந்த போது சீதையைத் தேடி வந்த அனுமன் இந்தப்பிரதேசத்திலும் சீதையைத் தேடியதாகவும் இராவணனுடன் போர் செய்வதற்கு ராமர் படையொன்று இந்தப்பிரதேசத்தில் தயாராகவிருந்ததாகவும் இதனால் ராம்படை என்ற பெயர் வந்ததாகவும் காலப்போக்கில் றம்பொடையாக பெயர் திரிபடைந்ததாகவும் சொல்லப்படுகின்றது. எனினும் சுவாமி சின்மயானந்தர் இந்தப்பிரதேசத்தை இராம்போத ( இராமர் பற்றிய அறிவு ) என்று குறிப்பிட்டு இந்தப்பகுதியில் ஆச்சிரமம் ஒன்றும் ஸ்ரீ பக்த அனுமனுக்கு கோவிலொன்றும் ஏற்படுத்தப்பட்டது. இந்த ஆலயத்திலுள் ஸ்ரீ பக்த அனுமன் சிலை 16 அடி உயரமானது. தமிழ் நாட்டிலுள்ள மகாபலிபுரத்திலுள்ள ஒரே கல்லில் செதுக்கப்பட்ட இந்த அனுமன் சிலை தமிழகத்திலிருந்து கப்பல் மூலம் கொழும்பு துறைமுகத்துக்குக் கொண்டு வரப்பட்டு அங்கிருந்து றம்பொடைக்கு ஊர்வலமாக கொண்டு வரப்பட்டது. இவ்வாறு கொண்டு வரப்பட்ட இந்தச்சிலையைப் பிரதிஷ்டை செய்த பின்பு ஆலயம் நிர்மாணிக்கப்பட்டமைக் குறிப்பிடத்தக்க விடயமாகும்.
ஆலயத்தின் குன்று பகுதியிலிருந்து றம்பொடை பிரதேசத்தின் அழகினை ரசிக்க முடியும்.இந்த ஆலயத்துக்கு அருகில் றம்பொடை நீர்வீழ்ச்சி , இலங்கையில் நீண்ட சுரங்கப்பாதை ,கொத்மலை நீர்த்தேக்கம் என்பன உள்ளமை முக்கிய அம்சமாகும்.இந்த ஆலயத்தில் ஒவ்வொரு பூரணைத்தினத்தன்றும் இடம் பெறும் விசேட பூஜைகளில் உள்நாட்டு வெளிநாட்டு பக்தர்கள் ஆயிரக்கணக்கில் கலந்து கொள்வர். இந்த ஆலயத்துக்கு சகல இனமக்களும் சகல மதத்தினரும் வந்து செல்வது முக்கிய அம்சமாகும். றம்பொடை ஸ்ரீ பக்த அனுமன் ஆலய ஆச்சிரமத்தின் ஊடாக ஒவ்வொரு பூரணித்தினத்தன்றும் பக்தர்களுக்கு அன்னதானம் வழங்கப்படுகின்றது. இந்த ஆச்சிரமத்தினால் பிரதேசத்தில் வாழுகின்ற சிறுவர்களுக்கு முன்பள்ளி ,அறநெறி கல்வி புகட்டப்படுவதோடு ,கல்வி உதவிகளும் பெண்களுக்கு சுயத்தொழில் பயிற்சிகளும் வழங்கப்படுகின்றன.